ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༦ཚེས་༢༡ཉིན། འདི་ནི་དྷ་རམ་ས་ལར་བརྟེན་གཞི་བྱས་ཡོད་པའི་རོགས་པ་༼བུ་བཅོལ་ཁང་༽གི་འགན་འཛིན་བསྟན་འཛིན་འཇམ་དབྱངས་ལགས་སུ། ༼རོགས་པ་༽ཞེས་པའི་བྱིས་པའི་དགེ་རྩ་ཚོགས་པ་དེ་ཉིད་ཀྱི་བྱུང་རིམ་དང༌། ངོ་བོ་བཅས་ཀྱི་སྐོར་བཅར་འདྲི་བྱས་པའི་གནས་ཚུལ་ཞིག་ཡིན།ཁོང་གིས་༼རོགས་པ་༽བུ་བཅོལ་ཁང་འདི་ནི་ངོས་དང་ངའི་ཆུང་མ་གཉིས་ཀྱིས་ཕྱི་ལོ་༢༠༠༤ལོར་གསར་འཛུགས་བྱས་པ་ཞིག་ཡིན། ཐོག་མའི་ཆར་ཕ་མ་གཉིས་ཀ་ལས་ཀར་ཕྱིན་ནས་ལྟ་རྟོགས་གནང་མཁན་མེད་པའི་བྱིས་པ་༦ཙམ་ལ་བལྟ་སྐྱོང་བྱས་པ་ཡིན།
རིམ་བཞིན་ཚོགས་པ་འདི་ཡར་རྒྱས་ཕྱིན་བ་དང་ཆབས་ཅིག ད་ལྟའི་ཆར་དྷ་རམ་ས་ལར་བཙན་བྱོལ་བོད་མིའི་སྤྱི་ཚོགས་ནང་ནས་ཁྱོན་བྱིས་པ་གྲངས་༣༥ཙམ་ལ་བལྟ་སྐྱོང་བྱས་དང་བྱེད་བཞིན་པ་ཞིག་ཡིན། གཞན་ཡང་ང་ཚོས་ཁྱོ་ག་མེད་པའི་བུད་མེད་དེ་འདྲ་ཁག་ཅིག་ལ་འཚེམ་བུ་སྐོར་ལག་ཤེས་སྦྱོང་བརྡར་གྱི་གོ་སྐབས་དེ་འདྲ་ཡང་སྤྲོད་བཞིན་ཡོད།
ཁོང་ཚོས་བཟོས་པའི་ཅ་དངོས་དེ་དག་ Rogpa Shop and Café རོགས་པའི་ཚོང་ཁང་དང་འཚིག་ཇ་ཁང་ནང་དུ་འཚོང་བཞིན་པ་ཡིན། ཚོང་ཁང་དང་འཚིག་ཇ་ཁང་དེའི་ནང་གི་ལས་ཀ་མང་ཆེ་བ་དང་བླངས་བ་དེ་ཚོས་གནང་གིན་ཡོད་པ་རེད། གཞན་ཡང་ང་ཚོས་བྱིས་པ་དེ་ཚོའི་ཆེད་༼དཔེ་མཛོད་ཁང་༽ཞིག་ཀྱང་གཉེར་རྒྱུའི་འཆར་གཞི་ཡོད་ཅེས་གསུངས་བྱུང༌།
རོགས་པ་ཞེས་པའི་བུ་བཅོལ་ཁང་འདི་འདྲ་ཞིག་གསར་འཛུགས་བྱ་རྒྱུར་སྐུལ་སློང་གང་ནས་བྱུང་མིན་བཅས་བཅར་འདྲི་ཞུས་སྐབས། ཁོང་གིས། ངོས་རང་ཉིད་ཆུང་དུས་སུ་ཕྱི་དྲན་ཞིག་བྱས་ཚེ། ངོས་རང་ལོ་ན་༡༠སྐབས་སུ་སློབ་སྦྱོང་བྱེད་པར་སློབ་ཡོན་ཐད་དཀའ་ངལ་མི་ཉུང་བ་ཞིག་འཕྲད་མྱོང་ཡོད། དེར་བརྟེན་ད་ཆ་ངོས་རང་གིས་མི་གཞན་ལ་ཕན་ཐོགས་ཤིག་བསྒྲུབ་ཆེད། རོགས་པ་བུ་བཅོལ་ཁང་འདི་འདྲ་ཞིག་གསར་འཛུགས་བྱས་པ་ཡིན། རོགས་པ་བུ་བཅོལ་ཁང་འདི་ནི་ངོས་གཅིག་པུའི་མ་ཡིན་པར། འདི་ནི་སྤྱི་ཚོགས་ལ་དབང་བའི་རོགས་པ་ཞིག་ཆགས་ཡོད་ཅེས་འགྲེལ་བརྗོད་གནང་བྱུང༌།
