ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༨ཚེས་༢༩ཉིན། ཕྱི་ལོ་༢༠༡༡ལོ་ནས་བཟུང་རྒྱ་ནག་ནང་བོད་ཀྱི་བུད་མེད་དང་བྱིས་པ་གཡོ་ཚོང་བྱེད་པའི་གཅོད་དོན་འཕར་སྣོན་བྱུང་བཞིན་ཡོད་འདུགདེ་ཡང་ཐའེ་ཝན་བོད་ཀྱི་དོན་གཅོད་ཁང་གི་ཉམས་ཞིབ་པ་བསོད་ནམས་རྡོ་རྗེ་ལགས་ཀྱིས་བརྗོད་རྒྱུར། བོད་རང་སྐྱོང་ཟེར་བའི་ཁོངས་གཏོགས་ཀྱི་རྫོང་ཁག་༧༢ཡི་ནང་ནས་རྫོང་༤༥ཡི་ནང་དུ་བོད་ཀྱི་བུད་མེད་ལ་མགོ་སྐོར་བཏངབའི་ཉེས་དོན་རྒྱ་གཞུང་གི་གཏུག་བཤེར་གཅོད་གཞིའི་ནང་ཚུད་ཡོད་པ་རེད་ཅེས་བརྗོད་ཡོད་ལ། དེ་བཞིན་དུ་ལྷ་ས་གྲོང་ཁྱེར་གྱི་སྤྱི་བདེ་ཉེན་རྟོག་ཁང་གིས་ཕྱི་ལོ་༢༠༠༨ནས་༢༠༡༢བར་གྱི་ཁ་བྱང་དུ་༼བུད་མེད་དང་བྱིས་པ་བཙན་འཁྲིད་གཡོ་ཚོང་བྱེད་པའི་ཉེས་དོན་འཕར་སྣོན་བྱུང་བཞིན་པའི་ཐད་ཀྱི་བསམ་གཞིགས་འགའ༽ཞེས་པའི་སྙན་ཐོ་ཞིག་བཏོན་ཡོད་པ་རེད།
སྙན་ཐོ་དེའི་ནང་དུ་བོད་ཁུལ་ནས་བུད་མེད་དང་བྱིས་པ་༡༠༠ལ་ཉེ་བ་རྒྱ་ནག་གི་ཞིང་ཆེན་ཁག་གི་ནང་དུ་བཙན་འཁྲིད་གཡོ་ཚོང་བྱས་ཡོད་པ་རེད་ཅེས་བཀོད་ཡོད་པ་མ་ཟད། མིག་སྔར་དེའི་སྐོར་གྱི་གཅོད་དོན་རིགས་བཞི་བྱུང་བ་ཤེས་རྟོགས་བྱུང་ཡོད་པ་དང༌། ཕྱི་ལོ་༢༠༡༡ནང་དུ་དེ་འབྲེལ་གྱི་གཅོད་དོན་༣༧དང་༢༠༡༠ལོར་གཅོད་དོན་༡༢། ༢༠༠༩ལོར་༣བཅས་ཤེས་རྟོགས་ཐུབ་ཡོད་ལ། ཕྱི་ལོ་༢༠༠༨ ལོར་དེ་རིགས་ཀྱི་གཅོད་དོན་༡༣ཞུ་གཏུག་བྱས་ཡོད་པ་རེད་ཅེས་དང༌།
ཡང་མུ་མཐུད་དུ་བཀོད་དོན། རྒྱ་ནག་ཉེན་རྟོག་ཁང་གིས་གཅོད་དོན་དེ་དག་གི་ནང་ནས་བོད་མི་༨༥སྐྱབས་སྟེ་ཕྱིར་རང་གི་ཕ་ཡུལ་དུ་ལོག་ཐུབ་པ་བྱུང་ཡོད། འདས་པའི་མི་ལོ་༤ཡི་ནང་དུ་བོད་ཁུལ་དུ་ཁྱོན་མི་གྲངས་༧༠བཙན་འཁྲིད་བྱས་ཡོད་ལ། གཡོ་ཚོང་བྱས་པའི་བུད་མེད་ཚང་མ་སོ་སོ་དང་ཆེས་འབྲེལ་འདྲིས་བཟང་པའི་སྐྱེས་པ་དེ་ཚོའི་གཡོ་འོག་ཚུད་ཡོད་པ་རེད། བུད་མེད་དེ་ཚོ་དང་ཐོག་ལས་ཀ་ཡང་ན་ཁྱོ་ག་ཡག་པོ་རག་རྒྱུར་ཁ་གཡར་ནས་རྒྱ་ནག་ནང་འཁྲིད་ཀྱི་ཡོད། ཡིན་ནའང༌། དོན་དངོས་ཐོག ཁོ་ཚོ་རྒྱ་ནག་ཏུ་འཁྲིད་ནས་བྱིས་པ་དབང་བོ་སྐྱོན་ཅན་ཁང་གི་ལས་གཡོག་ཡང་ན་རྒྱ་རིགས་རྒན་པོ་རེའི་ཆུང་མ་བྱེད་རྒྱུ་དེ་ཡིན་ལ། ཡང་བོད་རིགས་བུད་མེད་མང་ཆེ་གཞང་ཚོང་ཁང་དུ་ཡང་གཡོ་ཚོང་བྱེད་ཀྱི་ཡོད་པ་རེད།
གཅོད་དོན་མང་པོའི་ནང་བོད་རིགས་བུད་མེད་ཚོར་སྨན་རྫས་རིགས་སྤྱད་དེ་གཞན་གྱི་གཡོ་ཚོང་བྱས་པ་མང་པོ་ཡོད་ལ། གཞན་གྱི་གཡོ་འོག་ཏུ་ཚུད་པའི་བུད་མེད་མང་ཆེ་བ་བོད་ཁུལ་གྱི་ཞིང་པ་ཡིག་རྨོངས་པ་དང་སློབ་གྲྭ་མཐའ་ཆོད་པ་རྐྱང་རྐྱང་ཡིན་པ་རེད་ཅེས་བཀོད་འདུག
ཡང་ཐའེ་ཝན་དོན་གཅོད་ཀྱི་ཉམས་ཞིབ་པ་བསོད་ནམས་རྡོ་རྗེ་ལགས་ཀྱིས་བརྗོད་རྒྱུར། ལྷ་སའི་གཞིས་ཀ་རྩེ་དང་འདམ་གཞོང་ཁུལ་ནི་བུད་མེད་གཡོ་ཚོང་གི་གཅོད་དོན་བྱུང་ས་ཆེས་ཚབས་ཆེ་ཤོས་གཉིས་ཡིན་ལ། གཡོ་ཚོང་གི་བརྒྱུད་རིམ་ནི་དང་ཐོག་རྒྱ་རིགས་བཟོ་ལས་པ་ཚོ་ས་གནས་དེར་ཡོང་ནས་བོད་རིགས་བུད་མེད་དང་འབྲེལ་འདྲིས་བྱུང་བ་དང༌། ཕ་མས་གཉེན་སྒྲིག་བྱེད་རྒྱུར་མོས་མཐུན་མ་བྱས་པར་བརྟེན། ལྷག་བསམ་རྣམ་དག་གི་བོད་རིགས་ཞིང་བའི་བུ་མོ་རྒྱ་རིགས་དེ་ཚོས་རྒྱ་ནག་ནང་འཁྲིད་འགྲོ་གི་ཡོད་ལ། ལས་ཀ་ཡག་པོ་ཞིག་དང་སྔར་ལས་བཟང་པའི་འཚོ་བ་ཞིག་གི་ཆེད་དུ་བོད་རིགས་བུ་མོ་དེ་ཚོ་འགྲོ་གི་ཡོད་པ་རེད། ཡིན་ནའང༌། རྒྱ་ནག་ཏུ་སླེབས་དུས་མནར་གཅོད་དང་བྲན་གཡོག་གི་འཚོ་བ་སྐྱེལ་དགོས་བྱུང་གི་ཡོད་པ་རེད། ཅེས་བརྗོད་འདུག
ཡང་ཨ་རིའི་རྒྱལ་སྲིད་སྤྱི་ཁྱབ་ཁང་གི་ཕྱི་ལོ་༢༠༡༢ལོའི་མི་གཡོ་ཚོང་གི་སྙན་ཐོའི་ནང་དུ། རྒྱ་གཞུང་གིས་མི་གཡོ་ཚོང་བྱེད་མཁན་ལ་རྒོལ་རྡུང་བྱེད་པའི་ཁས་ལེན་བྱས་ཡོད་ཀྱང༌། རྒྱལ་སྤྱིའི་ཚད་གཞིར་སླེབས་ཡོད་པ་མ་རེད་ཅེས་དང༌། བརྒྱ་ནག་ནི་མི་གཡོ་ཚོང་བྱེད་སའི་འབྱུང་ཁུངས་དང་དམིགས་འབེན་འཛིན་ས་གཙོ་བོ་ཞིག་ཏུ་གྱུར་ཡོད་པ་རེད་ཅེས་བརྗོད་ཡོད་པ་མ་ཟད། འཛམ་གླིང་རྒྱལ་ཁབ་ཁག་གི་ནང་ནས་རྟོག་ཞིབ་དགོས་པའི་མིང་གཞུང་གི་ཨང་རིམ་གཉིས་པ་དེ་ཆགས་ཡོད་པ་རེད།
