ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༡ཟླ་༡༡ཚེས་༢༡ཉིན། རི་ཁུལ་གཙང་བཟོ་ཚོགས་པས་རྡ་སའི་ཡུལ་མི་དང་སྤྲོ་འཆམ་པ་སོགས་ལ་ཁོར་ཡུག་གང་ལེགས་བསྐྲུན་ཆེད་རྒྱུན་དུ་ལག་ལེན་དངོས་ལ་ཞུགས་ནས་རྡ་སའི་གྲོང་གསེབ་ཁག་གི་ནང་དུ་གད་སྙིགས་བསྡུ་སྒྲུག་སོགས་ཀྱི་སྤྱི་ཚོགས་ཞབས་ཞུ་བསྒྲུབ་བཞིན་ཡོད་འདུག
ཚོགས་པ་དེ་ནི་ཕྱི་ལོ་༢༠༠༩ལོར་ལྕམ་ཌིར་ཧེ་ལགས་ཀྱིས་རྒྱ་གར་བྱང་ཕྱོགས་རྡ་རམ་ས་རུ་གསར་དུ་བཙུགས་པ་དང༌། ཚོགས་པ་དེའི་དང་བླངས་བ་ཚོ་རྒྱ་གར་ཡུལ་མི་དང་ཡུལ་སྐོར་སྤྲོ་འཆམ་པ་ཡིན་ལ། དང་ཐོག་རྡ་རམ་ས་ལའི་རི་རྩེ་ཊིན་ཌི་ཁུལ་གྱི་གད་སྙིགས་བསྡུ་སྒྲུག་བྱས་ཏེ་ས་གནས་མི་མང་དང་སྤྲོ་འཆམ་པ་སོགས་ལ་དྭངས་གཙང་གི་ཁོར་ཡུག་ཅིག་བསྐྲུན་ཡོད་པ་དང༌། ད་ལྟ་གཞི་རྒྱ་ཆེ་རུ་བཏང་ཏེ་བྷ་སུའུ་དང་མག་གྷན་སོགས་ཚུད་པའི་ཡུལ་སྐོར་སྤྲོ་འཆམ་ཁུལ་མང་པོར་གཙང་སྦྲ་བྱེད་བཞིན་ཡོད་འདུག
ཚོགས་པ་དེ་ཐོག་མར་འཛུགས་མཁན་ལྕམ་ཇོ་ཌིས་ཨན་ཌིར་ཧེ་ལགས་ཕྱི་ལོ་༢༠༠༩ལོར་རྡ་རམ་ས་ལར་གསར་དུ་སླེབས་པ་དང༌། བོད་ཁྱིམ་སློབ་གྲྭ་རུ་དང་བླངས་ཀྱིས་དགེ་རྒན་གནང་ཡོད་པ་མ་ཟད། ཆོན་ཊི་རཱ་བོད་ཁྱིམ་གྱི་སློབ་ཕྲུག་ཉམ་ཐག་གཉིས་ལ་སྦྱིན་བདག་ཀྱང་གནང་བཞིན་ཡོད་འདུག
ཁོ་མོས་འདི་གའི་གསར་འགོད་པར་བརྗོད་རྒྱུར། ང་ཚོས་བྱ་བ་འདི་ཚེགས་ཚུད་པོ་དང་ལེགས་པོ་ཞིག་བསྒྲུབ་ཐུབ་པར་ཡིད་ཆེས་བྱེད་ཀྱི་ཡོད༌། བྱ་བ་འདི་གནས་སྐབས་ཀྱི་བྱ་བ་ཙམ་་མ་ཡིན་པར་ས་གནས་མི་མང་དང་སྤྲོ་འཆམ་པ། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་སོགས་ནས་རྒྱུན་དུ་མཉམ་རུབ་ཀྱིས་ཁོར་ཡུག་ཐོག་དོ་ཁུར་བྱེད་དགོས་ཀྱི་འདུག་ཅེས་དང༌། དང་བླངས་སྤྱི་ཚོགས་ཞབས་ཞུ་ནི་ཉམས་མྱོང་བསགས་པའི་རླབས་ཆེན་གྱི་བྱ་བ་ཞིག་ཡིན་ལ། དང་བླངས་བྱས་པ་བརྒྱུད་སོ་སོའི་ནུས་པ་དང་ཡིད་ཆེས་གོང་མཐོར་གཏོང་ཐུབ་པ་མ་ཟད། ཀུན་གྱིས་བསྔགས་བརྗོད་བྱེད་ས་ཞིག་ཀྱང་རེད། ད་ལོ་རྒྱ་གར་དང་བླངས་བ་མང་པོ་སླེབས་སོང༌། ཡིན་ནའང་བོད་པའི་ནང་དུ་རེ་བ་རྒྱག་བཞིན་པའི་སྐབས་ཡིན་ཞེས་བརྗོད་འདུག
ཡང་ཁོ་མོས། ང་ཚོ་ཚང་མ་མཉམ་གཅིག་ཏུ་རྡ་ས་རུ་འཚོ་སྡོད་བྱས་ཡོད་པ་རེད། ༧གོང་ས་མཆོག་གིས་རྒྱུན་དུ་ཁོར་ཡུག་སྲུང་སྐྱོབ་སྐོར་ལ་བཀའ་སློབ་ནན་མོ་ཕེབས་བཞིན་པ་ལྟར་ང་ཚོས་རྡ་ས་ཁུལ་གྱི་ཁོར་ཡུག་གཙང་མ་ཉར་བ་ཡིན་ན། ༧མགོན་པོ་གང་ཉིད་ནས་ཏན་ཏན་ཐུགས་མཉེས་པོ་གནང་ངེས་རེད་ཅེས་བརྗོད་ཡོད་པ་རེད།
ད་ལོའི་འཛམ་གླིང་ཁོར་ཡུག་ཉིན་མོར་རི་ཁུལ་གཙང་བཟོ་ཚོགས་པའི་བོད་རིགས་དང་བླངས་བ་འཕྲིན་ལས་རྣམ་རྒྱལ་ལགས་ཀྱིས་འདི་གའི་གསར་འགོད་པར་བརྗོད་དོན། ངའི་གྲོགས་པོ་ཚོས་ངས་ལས་ཀ་ག་རེ་བྱེད་དགོས་ན་ཞེས་དྲིས་སྐབས། ངས་རྒྱུན་དུ་ང་ཚོ་རི་ཁུལ་གཙང་བཟོ་ཚོགས་པར་དང་བླངས་བ་དགོས་མཁོ་ཆེ་ཚུལ་འགྲེལ་བཤད་བྱེད་ཀྱི་ཡོད་ཀྱང༌། ཁོ་ཚོ་ག་རེ་བྱས་ནས་མ་ཡོང་བ་ཤེས་མ་སོང་ཞེས་བརྗོད་འདུག
རི་ཁུལ་གཙང་བཟོ་ཚོགས་པའི་མིག་སྔར་གྱི་དཀའ་གནད་ཆེ་ཤོས་མ་དངུལ་ཡིན་པས། བྱ་བ་རྒྱུན་འཁྱོངས་དང་ལེགས་འགྲུབ་ཡོང་ཕྱིར་ཚོགས་པ་དེ་མཱ་ཧིན་ཌ་ཚོགས་པའི་ཟླ་རེའི་བྱ་དགའི་འགྲན་བསྡུར་ཁྲོད་འཛུལ་བྱེད་བཞིན་ཡོད་འདུག མཱ་ཧིན་ཌ་ཚོགས་པས་རྒྱ་གར་ནང་གསར་གཏོད་ཀྱི་བསམ་བློ་ཡར་སྐུལ་བྱེད་པར་ལས་གཞི་འདྲ་མིན་འགྲོ་བཞིན་ཡོད་ལ། ཟླ་རེར་བྱ་དགའ་རིགས་༥༢སྤྲོད་ཀྱི་ཡོད་པ་མ་ཟད། བྱ་དགའ་ཐོབ་མཁན་ཚོར་ཟླ་རེར་དམའ་ཤོས་ཧིན་སྒོར་ཁྲི་༤དང་མཐོ་ཤོས་ཧིན་སྒོར་ཁྲི་༤༠བྱ་དགའ་ཡོད་འདུག (Spark the Rise)ཞེས་པའི་དྲ་ལམ་བརྒྱུད་དེ་མི་མང་གིས་ཐད་ཀར་འོས་ཤོག་བླུགས་སྟེ་འོས་འདེམས་བྱེད་ཀྱི་ཡོད་འདུག
ལྕམ་ཇོ་ཌིས་ཨན་ཌིར་ཧེ་ལགས་ཀྱིས་ང་ཚོ་ལ་མཚོན་ནས་བཤད་ན། དེ་ནི་གོ་སྐབས་ལེགས་ཤོས་ཤིག་ཡིན་པས། མི་མང་གིས་འོས་ཤོག་དང་སོ་སོས་བརྗོད་འདོད་པའི་ཡིག་འབྲུ་རེ་རེས་ང་ཚོར་རྒྱབ་སྐྱོར་བྱེད་དགོས་ཀྱི་འདུག་ཅེས་བརྗོད་འདུག
འོས་ཤོག་བླུགས་སའི་ཁ་བྱང་ནི་ http://www.sparktherise.com/projectdetail.php?pid=4895ཡིན་ལ། གལ་སྲིད་རི་ཁུལ་གཙང་བཟོ་ཚོགས་པའི་སྐོར་གྱི་གནས་ཚུལ་ཞིབ་ཕྲ་དགོས་པའམ་ཚོགས་མིའི་ནང་དུ་འཛུལ་འདོད་ཡོད་ཚེ། འདིའི་ནང་དུ་གཟིགས་རོགས་ཞུ། www.mountaincleaners.org
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས་བོད་སྒྱུར་བྱས།
