ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༦ཚེས་༢༠ཉིན། ༼སྙིང་རྗེ་ཡུལ་༽ཉམས་ཐག་རོགས་སྐྱོར་ཐེབས་རྩ། Bridging East and West ཤར་ནུབ་བར་གྱི་འབྲེལ་ཟམ་ཞེས་གཞན་ཕན་དང་སྙིང་རྗེ་ཅན་གྱི་ཚོགས་པ་དེ་ནི། བོད་མི་རྡོ་རྗེ་ཚེ་རིང་ལགས་ཀྱིས་གསར་འཛུགས་གནང་བ་ཞིག་རེད་འདུག
རྡོ་རྗེ་ཚེ་རིང་ལགས་ཀྱི་མི་ཚེའི་ནང་དཀའ་སྡུག་དང་ཉམས་མྱོང་མང་པོ་བརྒྱུད། ཁོང་གིས་གཞན་ཕན་དང་སྙིང་རྗེའི་ཀུན་ནས་བསླངས་བའི་ཉམས་ཐག་རོགས་སྐྱོར་གྱི་ཐེབས་རྩ་འདི་ནི་ཕྱི་ལོ་༢༠༠༩ལོར་ཁོང་གིས་གསར་འཛུགས་གནང་བ་ཞིག་རེད་འདུག་ལ། ཐེབས་རྩ་འདིས་བཙན་བྱོལ་དུ་གྱར་བའི་བོད་མི་ནད་གཅོང་དང༌། དབང་པོ་མ་ཚང་བ། ལྟ་སྐྱོང་བྱེད་མཁན་མེད་པའི་རྒས་ཁོག་དེ་ཚོར་རོགས་རམ་གནང་དང་གནང་བཞིན་པ་ཞིག་རེད་འདུག
གཞན་ཡང་ཉམས་ཐག་རོགས་སྐྱོར་ཐེབས་རྩ་འདིར་ཕྱག་ལས་གཙོ་བོར་གནང་མཁན་ཨོ་སི་ཊི་རི་ཡ་ནས་སྐྱེས་དམན་ Judith Moritz ཇུ་ཌེ་ཐི་མོ་རེ་ཛེ་ཞུ་བ་ཞིག་འདུག་པར་ཁོང་མོས་ཀྱང༌། ཐེབས་རྩ་འདིའི་ཆེད་དུ་ཕྱག་ལས་མང་པོ་ཞིག་གནང་དང་གནང་བཞིན་པ་རེད་འདུག
རྡོ་རྗེ་ཚེ་རིང་ལགས་ནི་ཕྱི་ལོ་༡༩༦༣ལོར་རྒྱ་གར་ཧི་མ་ཅལ་མངའ་སྡེའི་ཀུ་ལུ་ཁུལ་དུ་སྐྱེས། ཁོང་གི་ཕ་མ་གཉིས་པོ་ནི་བོད་མི་སྐྱབས་བཅོལ་བ་གཞན་དག་དང་གཅིག་མཚུངས་སུ་ཕྱི་ལོ་༡༩༥༩ལོར་རྒྱ་གར་ལ་བཙན་བྱོལ་དུ་འབྱོར་ཞིང་གཉིས་ཀ་སྐབས་དེར་ཀུ་ལུ་མ་ཎ་ལི་ཁུལ་དུ་ལམ་བཟོའི་ལས་ཀར་ཞུགས། ཁོང་ནི་དུས་ཚོད་གཉན་འཕྲང་ཅན་དེར་སྐྱེས་ཤིང༌། སྤྱིར་ཁོང་གི་ཕ་མ་གཉིས་པོར་བྱིས་པ་༡༣ཙམ་བཙས་ཡོད་འདུག་ཀྱང༌། རྡོ་རྗེ་ཚེ་རིང་གཅིག་པུ་ལས་གཞན་ཚང་མ་འདས་གྲོངས་སུ་ཕྱིན།
ཁོང་གི་ནང་མིར་དཀའ་ཚེགས་ཆེ་བའི་དུས་ཚོད་དེར་ཨ་མ་འདས་གྲོངས་སུ་ཕྱིན་རྗེས་ཁོང་གི་ཕས་ཁོང་ཉིད་བོད་ཕྲུག་ཁྱིམ་སྡེའི་སློབ་གྲྭའི་ནང་བསྐྱལ་ནས་ཁོང་ཉིད་རྒྱ་གར་ལྷོ་ཕྱོགས་ཧོང་སུ་ཁུལ་དུ་གཞིས་བསྐྱོད་བྱས་ཀྱང་ལོ་འགའ་ལས་མ་འགོར་བར་ཁོང་གི་ཕ་ཡང་འདས་གྲོངས་སུ་ཕྱིན།
རྡོ་རྗེ་ཚེ་རིང་ལགས་བོད་ཕྲུག་ཁྱིམ་སྡེ་ནས་འཛིན་རིམ་༡༠པ་ཐོན་རྗེས་བོད་ཕྲུག་ཁྱིམ་སྡེའི་ལག་ཤེས་འཚེམ་བུ་སྡེ་ཚན་ནང་ཁྱོན་ལོ་ངོ་༤ཙམ་རིང་འཚེམ་བུ་སྦྱོར་བརྡར་བྱས། དེ་རྗེས་རྒྱ་གར་ལྷོ་ཕྱོགས་བྷེ་ཀོབ་དང༌། བལ་ཡུལ། ཏེ་ཙུ་གཞིས་ཆགས་སོགས་ས་གནས་མང་པོའི་ནང་བསྐྱོད་ནས་ཕྱག་ལས་གནང་བ་དང༌། རྡོ་རྗེ་ཚེ་རིང་ལགས་ཀྱིས་ཁོང་གི་ཕ་མ་གཉིས་པོར་ཞབས་ཞུ་སྒྲུབ་པའི་སྐལ་བ་མ་བྱུང་ཡང་། དུས་ཡུན་རིང་པོར་ཁོང་གི་རེ་འདོད་ལྟར་ཕྱི་ལོ་༢༠༠༩ལོར་ཁོང་གིས་༼སྙིང་རྗེ་ཡུལ་༽ཞེས་པའི་ཉམས་ཐག་རོགས་སྐྱོར་གྱི་ཐེབས་རྩ་འདི་ཉིད་གསར་འཛུགས་གནང་བ་ཞིག་རེད་འདུག
ཉམས་ཐག་རོགས་སྐྱོར་གྱི་ཐེབས་རྩ་འདིའི་སྐོར་ཤེས་རྟོགས་དེ་ལས་མང་བ་གནང་འདོད་ཡོད་ཚེ་ www. giving-kindness.org དྲ་རྒྱ་འདིར་གཟིགས་རོགས།
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས།
