ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༠ལོའི་ཟླ་༡པའི་ཚེས་༢༢ཉིན། ཟླ་འདིའི་ཚེས་༢༠ཉིན། མཉམ་འབྲེལ་རྒྱལ་ཚོགས་ཀྱི་གནམ་གཤིས་ཆེད་མཁས་པས་ཕྱི་ལོ་༢༠༣༥སླེབས་དུས་རི་བོ་ཧི་མ་ལ་ཡའི་འཁྱགས་རོམ་བཞུས་ཚར་ཡོད་རྒྱུ་རེད་ཅེས་པའི་ཉེན་བརྡ་ལ་ཚན་རིག་གི་ཁུངས་སྐྱེལ་རྒྱབ་འདེགས་མི་མཆིས་ལུགས་འགྲེལ་བརྗོད་བྱས་ཡོད་འདུག
མཉམ་འབྲེལ་རྒྱལ་ཚོགས་ཀྱི་གནས་གཤིས་འགྱུར་ལྡོག་ཐད་ཀྱི་ལྷན་ཁང་གིས་ཕྱི་ལོ་༢༠༠༧ལོར་བཏོན་པའི་སྙན་ཐོ་ཞིག་གི་ནང༌། ལོ་ངོ་སུམ་ཅུའི་དུས་ཡུན་ནང་རི་བོ་ཧི་མ་ལ་ཡའི་འཁྱགས་རོམ་བཞུས་ཚར་ཏེ་མེད་པར་ཆགས་རྒྱུ་རེད་ཅེས་བཀོད་ཡོད་འདུག་མོད། ད་ལྟ་ལྷན་ཁང་དེའི་གནམ་གཤིས་ཆེད་མཁས་པ་དག་གིས་གོང་གི་སྙན་ཐོ་དེ་ལ་ཚན་རིག་གི་ཁུངས་སྐྱེལ་རམ་འདེགས་མི་འདངས་ལུགས་གསལ་བསྒྲགས་བྱས་ཡོད་འདུག
རྒྱ་གར་གྱི་ཁོར་ཡུག་བློན་ཆེན་ཇའ་རམ་ར་མུས་ཞི་ལགས་ཀྱིས་ཕྱི་ཚེས་༡༩ཉིན། མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་ལྷན་ཁང་ལ་ཁུངས་མི་བཙན་པའི་སྙན་ཐོ་སྤེལ་བར་སྐྱོན་བརྗོད་ཤུགས་ཆེན་བྱས་ཡོད་དོན། རི་བོ་ཧི་མ་ལ་ཡའི་འཁྱག་རོམ་གྱི་བདེ་ཐང་ནི་བློ་འཚུབ་དང་དོགས་ཟོན་གྱི་འབྱུང་རྩ་རེད། རྒྱལ་ཚོགས་ཀྱི་གནམ་གཤིས་འགྱུར་ལྡོག་ལྷན་ཁང་གིས་ཚན་རིག་གི་ཁུངས་སྐྱེལ་རམ་འདེགས་མེད་པར་ཕྱི་ལོ་༢༠༣༥སླེབས་དུས་འཁྱགས་རོམ་བཞུས་ཚར་རྒྱུ་རེད་ཅེས་སྙན་ཐོག་བཏོན་ཡོད་པ་རེད། ཅེས་བརྗོད་ཡོད་འདུག
དེ་ཡང་རྒྱལ་ཚོགས་ཀྱི་གནམ་གཤིས་འགྱུར་ལྡོག་ཐད་ཀྱི་ལྷན་ཁང་དེས་ཕྱི་ལོ་༢༠༠༧ལོར་བཏོན་པའི་སྙན་ཐོའི་ནང༌། རི་བོ་ཧི་མ་ལ་ཡའི་འཁྱགས་རོམ་གྱི་བཞུ་ཚད་དེ་འཛམ་གླིང་ཡུལ་ཕྱོགས་གཞན་ལས་མགྱོགས་པ་དང༌། སའི་གོ་ལའི་དྲོད་ཚད་ཇེ་ཆེར་འགྲོ་བ་དང་བསྟུན་རི་བོ་ཧི་མ་ལ་ཡའི་འཁྱགས་རོམ་དེ་ཕྱི་ལོ་༢༠༣༥སླེབས་དུས་བཞུས་ཚར་རྒྱུ་རེད། ཅེས་བཀོད་ཡོད་འདུག་མོད། ལྷན་ཁང་དེ་གའི་གསལ་ཐོ་གཞན་ཞིག་གི་ནང་ཕྱི་ལོ་༢༠༣༥སླེབས་དུས་ཧི་མ་ལ་ཡའི་འཁྱགས་རོམ་སྟོང་སྨིས་གྲུ་བཞི་མ་༥༠༠.༠༠ནས་༡༠༠.༠༠༠རུ་བཀུམས་རྒྱུ་རེད་ཅེས་བཀོད་ཡོད་འདུག
རྒྱལ་ཚོགས་ཀྱི་འབྲེལ་ཡོད་ལྷན་ཁང་དེའི་འགན་འཛིན་དང༌། འགན་འཛིན་གཞོན་པ། དེ་བཞིན་འགན་འཛིན་ལས་རོགས་སོགས་ཀྱི་མཐོ་རིམ་འགོ་ཁྲིད་ཁག་ཅིག་ལྷན་ཁང་དེ་གས་ཧི་མ་ལ་ཡའི་འཁྱགས་རོམ་གྱི་གནས་བབས་ཐད་བརྟག་དཔྱད་སྐྱོ་བོ་བྱས་པའི་ལས་དོན་ཐད་བློ་འགྱོད་སྐྱེས་ཀྱིན་ཡོད་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་གཡང་བྱམས་ཀྱིས་ཕབ་བསྒྱུར་བྱས།
