ཆེད་སྒྲིག 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༦ཚེས་༡ཉིན། ཟླ་༥ཚེས་༣༠ཉིན་གྱི་ཕྱི་དྲོར་རྒྱལ་གཅེས་དཔའ་མོ་རི་ཀྱོ་ལགས་ཀྱིས་རྒྱ་གཞུང་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་ནས་སྐུ་གྲོངས་པར། བོད་ཀྱི་བུད་མེད་ལྷན་ཚོགས་ཀྱིས་གདུང་སེམས་མཉམ་སྐྱེད་དང་ཛ་དྲག་གི་བསྒྲགས་གཏམ་ཞིག་སྤེལ་འདུག
ཁ་སང་ཕྱི་ཚེས་༣༡ཉིན་གྱི་དགོང་མོར། བོད་ཀྱི་བུད་མེད་ལྷན་ཚོགས་ཀྱི་ངོས་ནས་རྒྱལ་གཅེས་དཔའ་མོ་རི་ཀྱོ་ལགས་ལ་མྱ་ངན་གུས་འདུད་མཚོན་པའི་མར་མེའི་ཁྲོམ་སྐོར་ཞིག་གོ་སྒྲིག་ཞུས་ཡོད་ལ།
རྒྱལ་གཅེས་དཔའ་མོ་རི་ཀྱོ་ལགས་ནི་བོད་རྒྱལ་ཁབ་ཀྱི་ཆེད་དུ་རང་ལུས་མེ་རུ་སྒྲོན་མཁན་བོད་རིགས་༣༨པ་དང་བུད་མེད་རང་ལུས་མེར་སྲེག་གཏོང་མཁན་དྲུག་པ། གཅེས་པའི་བུ་ཕྲུག་སོགས་བློས་གཏོང་མཁན་ཨ་མ་གཉིས་པ་དེ་ཆགས་ཡོད་ལ། སྔ་གཞུག་ཏུ་བྱུང་བའི་རང་ལུས་མེར་སྲེག་གི་དོན་རྐྱེན་ཁག་ལ་བོད་ཀྱི་བུད་མེད་ལྷན་ཚོགས་ཀྱི་ངོས་ནས་སེམས་འཚབ་དྲག་པོ་ཡོད་པའི་རྣམ་འགྱུར་རྒྱལ་སྤྱིའི་ཐོག་གསལ་བོ་བསྟན་དང་སྟོན་བཞིན་ཡོད་པ་མ་ཟད། སོ་སོའི་གཅེས་པའི་ཚེ་སྲོག་བློས་བཏང་ཏེ། ༼བོད་ལ་རང་དབང་རང་བཙན་སྤྲོད་དགོས།༽དང་༼༧རྒྱལ་བ་ཡིད་བཞིན་ནོར་བུ་བོད་ལ་གདན་འདྲེན་ཞུ་དགོས༽པའི་རེ་འབོད་ལ་རྒྱ་གཞུང་གིས་གསན་བསམ་དགོས་པའི་ནན་སྐུལ་ཞུ་བཞིན་ཡོད་པ་རེད།
གཞན་ཡང་བོད་ཀྱི་བུད་མེད་ལྷན་ཚོགས་ཀྱི་བསྒྲགས་གཏམ་ནང་དུ། འདི་ལོའི་སྤྱི་ཟླ་བཞི་བའི་ནང་དུ་བུད་མེད་ལྷན་ཚོགས་ཀྱིས་ཕྱི་ལོ་༢༠༠༩ཟླ་༢ཚེས་༢༧ནས་འདི་ལོའི་ཕྱི་ཟླ་༣ཚེས་༣༠བར་བྱུང་བའི་བོད་མི་རང་ལུས་མེར་སྲེག་གཏོང་མཁན་རྣམ་གྱི་གོ་རིམ་དང་ཀུན་སྤྱོད། རྣམ་འགྱུར་ལ་བསྐྱར་ཞིབ་ཅེས་པའི་དེབ་ཅིག་དཔར་སྐྲུན་འགྲེམས་སྤེལ་གྱིས། རྒྱལ་སྤྱིའི་ངོས་ནས་དེ་ལ་ཡ་ལན་རྣམ་འགྱུར་ག་རེ་བསྟན་པ་དང༌། འཚེ་མེད་ཞི་བའི་བྱེད་ཐབས་དེ་ལ་འཛམ་གླིང་ཁྱོན་ཡོངས་ལ་འགུལ་ཤུགས་གསལ་བརྡ་ག་རེ་སྟོན་གྱི་ཡོད་པ་སོགས་འགྲེལ་བརྗོད་བྱས་པ་བསྟུན། འཛམ་གླིང་གི་རྒྱལ་ཁབ་ཁག་གིས་བོད་ནང་དྲག་གནོན་མཚམས་འཇོག་ཡོང་བར་རྒྱ་གཞུང་ལ་གནོན་ཤུགས་སྤྲོད་དགོས་པ་དང༌། འགྲོ་བ་མིའི་ཐོབ་ཐང་ལྟ་ཞིབ་ཚོགས་ཆུང་གི་སྤྱི་ཁྱབ་འགན་འཛིན་ལྕམ་(Navanethem pillay)མཆོག་གིས་གཙོ་གནང་བའི་ལྟ་ཞིབ་མི་སྣ་བོད་ནང་དུ་ངེས་ཕེབས་ཡོང་རྒྱུར་རེ་འབོད་ཞུ་རྒྱུ་དང༌། ཕམ་ཉེས་རིམ་པར་བྱུང་བཞིན་པའི་རྒྱ་ནག་དམར་ཕྱོགས་ཚོིགས་པས་ད་ལྟའི་བར་མཁྲེགས་བཟུང་བྱས་པའི་གཅིག་སྡུག་ལམ་ལུགས་ལ་བསྐྱར་ཞིབ་གཙོས་ངེས་པར་འགྱུར་བ་གཏོང་རྒྱུའི་འབོད་སྐུལ་ཞུ་རྒྱུ་དང༌། ལྷག་པར་དུ་བཙན་བྱོལ་བོད་མིའི་སྐུ་ཚབ་དང་ལྷན་དུ་ད་ལྟའི་བོད་ནང་གི་ཛ་དྲག་གནས་སྟངས་ཞི་འཇགས་དང་རང་དབང་ལྡན་པའི་ཁོར་ཡུག་ཅིག་བསྐྲུན་པར་གྲོས་མོལ་གནང་དགོས་པའི་འབོད་སྐུལ་ཤུགས་དྲག་ཞུ་བཞིན་ཡོད་ཅེས་འཁོད་འདུག
འབྲེལ་གཏུག་གནང་ཡུལ།
ཚོགས་གཙོ། བཀྲ་ཤིས་སྒྲོལ་མ། ༠༩༤༥༦༡༡༤༡༣༢
ཚོགས་གཞོན། བསམ་གཏན་ཆོས་སྒྲོན། ༠༩༨༨༢༢༦༩༤༩༡
དྲུང་ཡིག ཉི་མ་ལྷ་མོ། ༠༩༨༨༢༥༠༢༨༢༡
ཉམས་ཞིབ་པ། པད་མ་ཆོས་སྒྲོན། ༠༨༦༧༩༧༡༨༤༨༡
