The Tibet Post

རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༠ཟླ་༥ཚེས་༡༠ཉིན། བོད་ཀྱི་བུད་མེད་ལྷན་ཚོགས་དང་སིད་སུར་རྟེན་གཞི་བྱས་པའི་ཚན་རིག་ནང་ཆོས་དང་ངོ་ཕྲད་ཅེས་པའི་ཤེས་ཡོན་ལྟེ་གནས་ཁང་གཉིས་ཀྱི་མཉམ་རུབ་བཀོད་སྒྲིག་འོག བོད་རིགས་བཙུན་མའི་འགོ་ཁྲིད་ཟབ་སྦྱོངས་ཐེངས་གཉིས་པ་དེ་ཟླ་སྔོན་མའི་ཚེས་༢༦ནས་༣༠བར་རྒྱ་གར་ལྷོ་ཕྱོགས་ཀྱི་བྱང་ཆུབ་ཆོས་གླིང་དང༌། མོན་གོ་ཌི། ཁར་ན་ཊར་ཀ་བཅས་སུ་བསྡུས་ཡོད་འདུག

ཟབ་སྦྱོངས་དབུ་འབྱེད་ཀྱི་དངོས་གཞིའི་མཛད་སྒོའི་ཐོག་བྱང་ཆུབ་ཆོས་གླིང་བཙུན་དགོན་གྱི་མཁན་རིན་པོ་ཆེ་དཀོན་མཆོག་ཐབས་རྒྱས་ལགས་དང༌། ཡུལ་དེ་གའི་བདེ་དོན་ལས་བྱེད་དམ་ས་གནས་བོད་ཀྱི་གཞོན་ནུ་ཚོགས་པའི་ཚོགས་གཞོན་དཔལ་ལྡན་ལགས་གཉིས་ཀྱིས་གཏམ་བཤད་སྤེལ་ཡོད་འདུག་ཅིང༌། ཟབ་སྦྱོངས་ལས་རིམ་ནང་བྱང་ཆུབ་གླིང་གི་ཨ་ནེ་༢༢ལྷག་ངོ་ཞུགས་གནང་འདུག་ལ། བོད་ཀྱི་བུད་མེད་ལྷན་ཚོགས་ཀྱི་ཟུང་དྲུང་བསྟན་འཛིན་སྒྲོལ་མ་དང་ལས་འཆར་འབྲེད་མཐུད་པ་ཉི་མ་ལྷ་མོ་གཉིས་ཀྱིས་ཟབ་སྦྱོངས་ལས་རིམ་གྱི་སྣེ་ཁྲིད་ཡོད་འདུག

ཐེངས་འདིའི་ཟབ་སྦྱོངས་ལས་རིམ་ནང་ཇི་ལྟར་སྤྱི་ཚོགས་སྟེང་གི་འགོ་ཁྲིད་པའི་ལས་ཁུར་གནང་སྟངས་དང༌། འགོ་ཁྲིད་ཅིག་ལ་ཚང་དགོས་པའི་ཡོན་ཏན། འབྲེལ་མོལ་བྱེད་སྟངས་ཀྱི་ཐབས་ལམ། རུ་ཁག་འཛིན་སྐྱོང་བྱེད་སྟངས། དེ་བཞིན་རང་ཉིད་ཀྱི་གོ་དོན་སོགས་ཀྱི་གོ་རྟོགས་མཐོར་འདེགས་གཏོང་བ་གཙོ་གནད་དུ་བཟུང་ཡོད་འདུག

གཞན་ཡང་ཉིན་བཞིའི་རིང་གི་ཟབ་སྦྱོང་ལས་རིམ་ཐོག་དངོས་བྱུང་གློག་བརྙན་ཁག་ཅིག་གཟིགས་འབུལ་ཞུས་འདུག་པ་དང༌། དེ་རྗེས་གློག་བརྙན་གྱི་བརྗོད་གཞི་དང་འབྲེལ་བའི་བགྲོ་གླེང་གོ་བསྡུར་ཞིག་ཟབ་སྦྱོངས་པ་དག་གི་ནང་ཁུལ་དུ་བསྐངས་ཡོད་འདུག

བོད་ཀྱི་བུད་མེད་ལྷན་ཚོགས་ངོ་སྤྲོད་མདོར་བསྡུར་ཞིག་ཞུས་ན།

ཚོགས་པ་དེར་ཡན་ལག་ཁག་༥༢ཡོད་ཅིང༌། ཚོགས་མི་༡༥༠༠༠ལྷག་རྒྱ་གར་གཙོས་ཕྱི་རྒྱལ་ཁབ་ཏུ་གནས་འཁོད་བྱས་ཡོད་འདུག ཚོགས་པ་དེ་ནི་བཙན་བྱོལ་ཁྲོད་གཞུང་འབྲེལ་མ་ཡིན་པའི་ཚོགས་པ་ཆེ་ཤོས་ཨང་གཉིས་པ་དེ་ཡིན་འདུག ཚོགས་པའི་ལས་དོན་གཙོ་བོ་ནི་ཚོགས་པ་དེས་བོད་ནང་ཡོད་པའི་བུད་མེད་ཀྱི་ཐོབ་ཐང་རྩོད་ལེན་བྱེད་ཀྱི་འདུག་པ་མ་ཟད། བཙན་བྱོལ་སྤྱི་ཚོགས་དང་བོད་ནས་གསར་དུ་འབྱོར་བ་ཚོར་ནུས་སྟོབས་འཕེལ་རྒྱས་ཀྱི་སྲིད་ཞུ་སྒྲུབ་ཀྱིན་ཡོད་འདུག