གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༥ཚེས་༡༡ཉིན། ཁ་སང་ཕྱི་ཚེས་༡༠ཉིན་གྱི་ཞོགས་པར། བོད་དོན་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་མ་བུ་གསུམ་རྒྱ་གར་གྱི་ས་མཚམས་བརྒལ་ནས་བལ་ཡུལ་གྱི་ས་མཚམས་སོ་ན་ལེ་རུ་འབྱོར་ཡོད་ཀྱང༌། བལ་ཡུལ་ས་མཚམས་ཉེན་རྟོག་པས་བཀག་ཡོད་འདུག
ད་ལོའི་སུམ་བཅུའི་དུས་དྲན་ཉིན་བཞུགས་སྒར་དྷ་རམ་ས་ལ་ནས་མགོ་འཛུགས་ཀྱིས་བོད་བར་གོམ་བགྲོད་གནང་མཁན་གླིང་ཚ་ཚེ་བརྟན་རྡོ་རྗེ་མ་བུ་གསུམ་ཁ་སང་ཕྱི་ཚེས་༡༠ཉིན་རྒྱ་གར་གྱི་ས་མཚམས་བརྒལ་རྒྱུ་ཡིན་པ་ལྟར། དུས་ཡུན་ཟླ་གཉིས་རིང་དཀའ་བ་ཁྱད་དུ་བསད་ནས་བོད་དོན་གོམ་བགྲོད་གནང་དང་གནང་བཞིན་པའི་སྙིང་སྟོབས་དང་ཆོད་སེམས་ལ་རྒྱབ་སྐྱོར་མཚོན་ཆེད། ཕྱི་ཚེས་༩ཉིན་གྱི་ཕྱི་དྲོར། བལ་ཡུལ་མདོ་སྨད་རྒྱུན་ལས་ཀྱི་ཚོགས་གཙོ་རྒྱ་མཚོ་དང་ཚོགས་གཞོན་བཀྲ་ཤིས་དོན་འགྲུབ། གཞན་ཡང་འབྲུག་ལྷ་དང་ལྷ་མོ་སྐྱབས། བསྟན་འཛིན། ཨ་ཚེ་སོགས་བོད་མི་༦དང༌། དེ་བཞིན་བལ་ཡུལ་འགྲོ་བ་མིའི་ཐོབ་ཐང་ཚོགས་པའི་མི་སྣ་༢བཅས་སོ་ན་ལེ་རུ་ཕེབས་བསུར་ཆེད་ཕེབས་གནང་ཡོད་འདུག
གོམ་བགྲོད་པ་མ་བུ་གསུམ་བདེ་ལེགས་ངང་བལ་བོའི་ས་ཐོག་ཏུ་འབྱོར་ཐུབ་ཡོད་ཀྱང༌། བལ་བོའི་ས་མཚམས་ཉེན་རྟོག་པས་ཁོང་ཚོ་གང་ནས་ཡོང་བ་དང་གང་དུ་འགྲོ་རྒྱུ་ཡིན་པ་སོགས་དྲིས་མཐར། རྒྱ་གར་གཞུང་གི་འགྲོ་སྐྱོད་ཆོག་པའི་ཆོག་མཆན་ཡོད་ན་འགྲོ་ཆོག་ཅེས་བརྗོད་ཡོད་འདུག ཡིན་ནའང༌། ད་ལྟའི་ཆར་ཁོ་ཚོ་བཏང་ཡོད་མེད་གསལ་ཆ་མི་འདུག
