གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༦ཚེས་༡༠ཉིན། ཁ་ཎ་ཌ་རུ་ཡོད་པའི་བོད་ཀྱི་རིག་གཞུང་མཐུན་ཚོགས་ནས་ཨ་རུ་ནཱ་ཅལ་མངའ་སྡེའི་བོད་མི་༡༠༠༠ཁ་ན་ཌར་གནས་སྤོ་བྱེད་པའི་ལས་གཞིར་རོགས་སྐྱོར་གནང་རྒྱུ་ཡིན་འདུག ༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༠༧ ལོར་ཁ་ཎ་ཌའི་སྲིད་བློན་སྐུ་ཞབས་སི་ཊེ་ཕན་ཧར་པར་མཆོག་ལ་ཇི་ལྟར་ཐུགས་སྐུལ་གནང་བ་བཞིན་ཁ་ཎ་ཌ་གཞུང་གིས་ཁས་ལེན་གནང་ཏེ། ཨ་རུ་ནཱ་ཅལ་མངའ་སྡེའི་བོད་མིའི་གཞིས་ཆགས་ མེའོ་དང་ཏི་ཛུ། བསྟན་འཛིན་སྒང། ཊུ་ཊིང་བཅས་ནས་བོད་མི་༡༠༠༠ཁ་ཎ་ཌ་རུ་ལེན་འཆར་ཡོད་པ་ལྟར། ཉེ་ཆར་ཁ་ཎ་ཌ་རུ་ཡོད་པའི་བོད་ཀྱི་རིག་གཞུང་མཐུན་ཚོགས་ཀྱི་ཚོགས་ཆེན་ཐོག ལས་གཞི་དེར་བསྔགས་བརྗོད་དང་བཅས་རོགས་སྐྱོར་གནང་རྒྱུ་ཐག་གཅོད་གནང་ཡོད་འདུག
མཐུན་ཚོགས་ཀྱི་ཚོགས་གཙོ་བཀྲ་ཤིས་ཚེ་བརྟན་ལགས་ཀྱིས་གསུངས་དོན། ང་ཚོའི་ཚོགས་མི་ཚོས་གལ་འགངས་ཆེ་བའི་ལས་གཞི་འདི་ལ་རོགས་སྐྱོར་གནང་རྒྱུ་ཐག་གཅོད་བྱུང་བ་ཧ་ཅང་དགའ་བོ་བྱུང༌། ང་རང་ཚོ་བོད་མི་རིགས་སུ་སྐྱེས་པ་ཞིག་ཡིན་པར་བརྟེན། ༧གོང་ས་མཆོག་གི་བཀའ་དགོངས་ཇིོ་བཞིན་དུ་འགྲུབ་པར་རོགས་འདེགས་ཕྲན་ཙམ་རེ་བསྒྲུབ་ཐུབ་པ་བྱུང་བ་སྐལ་བ་བཟང་པོ་རེད་བསམ་གྱི་ཡོད་ཅེས་འགྲེལ་བརྗོད་གནང་འདུག
ལས་གཞི་དེ་ཕྱི་ལོ་༢༠༡༠ཟླ་༡༢པའི་ནང་དུ་ཁ་ཎ་ཌའི་མི་སེར་གནས་སྤོ་ལས་ཁུངས་ཀྱི་འགན་འཛིན་སྐུ་ཞབས་ཇཱ་སན་ཀེན་ནའི་(Jason Kenney)ལགས་ཀྱིས་ཡོངས་ཁྱབ་གསལ་བསྒྲགས་སྤེལ་གནང་ཡོད་པ་དང༌། ལོ་༥ཡི་ནང་ཚུན་དུ་ལག་བསྟར་གྱིས་ཁ་ཎ་ཌའི་གྲོང་ཁྱེར་ཊོ་རོན་ཊོ་དང་ཀལ་གྷ་རའི་གཉིས་ཀྱི་ནང་དུ་གནས་སྤོ་བྱ་འཆར་ཡོད་པ་མ་ཟད། དེ་ཁུལ་གྱི་བོད་རིགས་དང་དེ་བཞིན་ཚོགས་པ་ཁག་ནས་ཀྱང་ལས་གཞི་དེར་རྒྱབ་སྐྱོར་གནང་རྒྱུ་ཁས་ལེན་བྱས་ཡོད་འདུག
གནས་ཚུལ་ཞིབ་ཕྲ་མཁྱེན་འདོད་ཡོད་རིགས་ནས་མཐུན་ཚོགས་ཚོགས་གཙོ་བཀྲ་ཤིས་ཚེ་བརྟན་ལགས་ཀྱི་གློག་འཕྲིན་ཁ་བྱང་ནི། This e-mail address is being protected from spambots, you need JavaScript enabled to view it http://www.tcsofbc.org/
