གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༧ཚེས་༡༡ཉིན། ཟླ་འདིའི་ཕྱི་ཚེས་༧ཉིན་བོད་ཀྱི་རྒྱལ་ས་ལྷ་སའི་ཉེ་འགྲམ་དུ་ཡོད་པའི་འདམ་གཞུང་རྫོང་ནས་རང་ལོ་༢༣ཡིན་པའི་ཚེ་དབང་རྡོ་རྗེ་ལགས་ཀྱིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེ་སྲེག་བཏང་རྗེས། ཁོང་ལ་གདུང་སེམས་མཉམ་སྐྱེད་མཚོན་ཆེད། ཁ་སང་ཕྱི་ཚེས་༡༠ཉིན་གྱི་དགུང་མོར་དྷ་ས་ས་གནས་བོད་ཀྱི་གཞོན་ནུས་གོ་སྒྲིག་འོག གཞི་རྒྱ་ཆེ་བའི་མར་མེ་ཁྲོམ་སྐོར་ཞིག་བྱས་ཡོད། ཟླ་འདིའི་ཕྱི་ཚེས་༧ཉིན་ཚེ་དབང་རྡོ་རྗེ་ལགས་ཀྱིས་རང་ལུས་མེ་སྲེག་བཏང་བ་དང༌། དེ་སྔོན་ཕྱི་ཟླ་༤པའི་ཚེས་༦ཉིན་ཁམས་རྫོག་ཆེན་དགོན་པའི་ཁྲི་ཟུར་སྤྲུལ་སྐུ་ཐུབ་བསྟན་སྙན་གྲགས་མཆོག་དང༌། ཁོང་གི་ཚ་མོ་བཙུན་མ་ཨ་ཚེ་གཉིས་ཀྱིས་བོད་བསྟན་པ་ཆབ་སྲིད་ཀྱི་དོན་དུ་རང་ལུས་མེ་སྲེག་བཏང་བ་ཤེས་རྟོགས་བྱུང་རྗེས། ཕྱི་ལོ་༢༠༠༩ཟླ་༢པའི་ཚེས་༢༧ནས་ཕྱི་ལོ་༢༠༡༢ཟླ་༧ཚེས་༧བར་ལོ་༣དང་ཟླ་བ་༤རིང་ཁྱོན་ཕྱི་ནང་གཉིས་སུ་གནས་པའི་བོད་མི་༤༨ཀྱིས་རང་ལུས་མེ་སྲེག་བཏང་བའི་ནང༌། བོད་ནང་དུ་ཁྱོན་བོད་མི་གྲངས་༤༥དང༌། དེའི་ནང་བུད་མེད་༨ཀྱིས་རང་ལུས་མེ་སྲེག་བཏང་བའི་ནང་ཨ་མ་༣ བཙུན་མ་༤ སློབ་མ་ ༡ ཚུད་ཡོད།
དཔའ་བོད་ཚེ་དབང་རྡོ་རྗེ་ལགས་ཀྱིས་རང་ལུས་མེ་སྲེག་བཏང་བའི་གནས་ཚུལ་ཐོན་རྗེས། བོད་མི་མང་སྤྱི་འཐུས་ལྷན་ཚོགས་ཀྱིས་གསལ་བསྒྲགས་ཤིག་སྤེལ་ཡོད་པའི་ནང་། ཕྱི་ལོ་༢༠༡༢ ཟླ༧ ཚེས་ ༧ ཉིན་བོད་ནང་གི་ཉིན་གུང་ཆུ་ཚོད་ ༡༢ ཡས་མས་ལ་བོད་ལྗོངས་ལྷ་ས་གྲོང་ཁྱེར་འདམ་གཞུང་རྫོང་འདམ་ཆུ་ཁ་གྲོང་བརྡལ། མཆོད་རྟེན་ཁུག་གྲོང་སྡེ་ནས་ཡིན་པའི་འབྲོག་པ་ན་གཞོན་རང་ལོ་ ༢༢ ཡིན་པ། མཚན་ལ་ཚེ་དབང་རྡོ་རྗེ་ཞུ་བ་ཞིག་གིས་འདམ་གཞུང་རྫོང་ཐོག་ཏུ་མི་ཚོགས་འདུ་འཛོམས་ཆེ་སའི་ཁྲོམ་གཟིགས་སྒང་ཟེར་བའི་སྒོ་རའི་མདུན་དུ་སྐད་ཤུགས་ཆེན་པོས་ སྐད་འབོད་ཁྲོད་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་གནང་ཡོད་འདུག མེ་འབར་ནས་དུས་ཚོད་སྐར་མ་གསུམ་ཙམ་སོང་རྗེས་རྒྱ་གཞུང་གི་ཉེན་རྟོག་པས་ཁོང་གི་སྐུ་ལུས་ཀྱི་མེ་བསད་དེ། རྫོང་སྨན་ཁང་དུ་བཙན་ཁྱེར་བྱས་རྗེས་མི་སུ་གཅིག་ཀྱང་ཁོང་ལ་ཐུག་འཕྲད་བྱེད་བཅུག་མེད་པ་མ་ཟད། ཁོང་ཉིན་དེའི་མཚན་ལ་སྐུ་གཤེགས་ཡོད་པའི་གནས་ཚུལ་ཡང་ཁྱབ་འདུག རྒྱལ་གཅེས་པ་ཁོང་ནི། ནམ་རྒྱུན་ཚོང་ཙག་ཙིག་རེ་བརྒྱབ་སྟེ་སྡོད་མཁན་ཞིག་དང༌། ད་ལྟ་ཤུལ་དུ་ལུས་པ་ནི་མ་རྒན་གཅིག་མ་གཏོགས་སུ་གཅིག་ལྷག་མེད་ཚོད་འདུག
ད་ལྟའི་ཆར་འདམ་གཞུང་རྗོང་ཡོངས་དམ་དྲག་ཧ་ཅང་ཆེན་པོའི་འོག་གནས་ཡོད་འདུག་ལ། ཁ་པར་ཚང་མ་བཀག་སྡོམ་གྱིས་ཕྱི་ཕྱོགས་ནས་འབྲེལ་བ་བྱེད་ཐབས་མེད་པ་མ་ཟད། ཐ་ན་ལྷ་ས་གྲོང་ཁྱེར་སོགས་བོད་ནང་ཁུལ་གྱི་ས་ཆ་ཕན་ཚུན་ནས་ཀྱང་འདམ་གཞུང་རྫོང་ཐོག་ཏུ་ཁ་པར་མཐུད་ཐབས་མེད་པ་ཆགས་ཡོད་འདུག ཁོང་གིས་སྐུ་ལུས་མེར་བསྲེགས་གནང་སའི་སྒོ་རའི་ནང་སྐབས་དེར་ཡོད་པའི་མི་ཚང་མ་ རྒྱ་གཞུང་གིས་འཇུ་བཟུང་བྱས་ཏེ། ཐ་ན་གནས་ཚུལ་དེའི་སྐོར་སུ་གཅིག་གིས་ཀྱང་ཕྱི་ལ་ཤོད་མི་ཆོག་པའི་བཙན་བཀའ་བཏང་ཡོད་འདུག ད་ཆ་ན་གཞོན་ཁོང་གི་འབོད་ཚིག་གང་ཞིག་བསྒྲགས་ཡོད་མེད་དང༌། སྐུ་ཕུང་ཅི་ཞིག་བྱས་ཡོད་མེད་ཀྱི་གནས་ཚུལ་ཞིབ་ཕྲ་གང་ཡང་ཤེས་རྟོགས་ཐུབ་ཀྱི་མི་འདུག་ཅེས་བོད་ནས་ཁུངས་ལྡན་གནས་ཚུལ་འབྱོར་བ་འབྲེལ་ཡོད་ནས་མཁོ་སྤྲོད་གནང་བྱུང༌།
ཉེ་བའི་ཆར་རྒྱ་གཞུང་གིས་བོད་ཀྱི་རྒྱལ་ས་ལྷ་ས་ནས་མདོ་སྟོད་སྨད་གཙོས། ལྷ་ས་བ་མིན་པའི་བོད་མི་རྣམས་ཕྱིར་འབུད་བཏང་བ་དང༌། རྒྱ་མི་ལས་གཞན་བོད་མི་རྣམས་ལྷ་སར་ཡོང་མི་ཐུབ་པ་སོགས་མི་རིགས་དབྱེ་འབྱེད་དང༌། རོགས་རམ་གྱི་མིང་འོག་ནས་བོད་རིགས་སློབ་ཐོན་པ་ཚོ་རྒྱ་ནག་གི་ས་ཁུལ་ཁག་ཏུ་གཏོང་བ་དང༌། བོད་ཀྱི་ས་ཁུལ་དུ་རྒྱ་རིགས་སློབ་ཐོན་པ་ཚོར་ལས་ཀའི་གོ་སྐབས་སྤྲོད་པ་སོགས་ ཀྱི་སྲིད་བྱུས་སྣ་ཚོགས་ཤིག་ལག་བསྟར་བྱེད་བཞིན་པ་འདི། བོད་རིགས་བོད་སར་གནས་མི་ཐུབ་པ་དང༌། བོད་ཡུལ་རྒྱ་ཡུལ་ཅན་དུ་བསྒྱུར་བའི་སྲིད་བྱུས་ཤིག་ཡིན་པས། རྒྱལ་སྤྱིའི་ཚོགས་སྡེ་ཁག་དང་རྒྱལ་ཁབ་ཁག་གིས། རྒྱ་གཞུང་གིས་བོད་མི་ཚོར་སྡུག་སྦྱོང་མནར་གཅོད་གཏོང་བཞིན་ཡོད་པ་དང༌། བོད་མི་ཚོའི་ཚེ་སྲོག་དང་འབོད་སྒྲ་རྣམས། འགྲོ་བ་མིའི་ཚེ་སྲོག་དང་ཐོབ་ཐང་རྩོད་པའི་འབོད་སྒྲ་ཡིན་པ་ཤེས་བཞིན་དུ། ད་དུང་ཡང་ཉིན་འགྱངས་ཞག་ཕུད་བྱས་ནས་དེ་མུར་བཞག་ན། དྲང་བདེན་དང་ཞི་བདེ་ལ་མོས་པའི་འགྲོ་བ་མི་ཀུན་གྱི་ཡིད་ཆེས་དང་རེ་བ་བརླག་ངེས་པ་དང༌། ས་ཡི་གོ་ལའི་ཁྱོན་ལ་ཉེས་ཅན་རྒྱ་ཡན་དུ་འགྲོ་རྒྱུ་ཡིན་པས། ངེས་པར་དུ་རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་སྒྱུར་བཅོས་ཡོང་བར་གནོན་ཤུགས་སྤྲོད་དགོས་ཞེས་ནན་བརྗོད་བྱེད་རྒྱུ་ཡིན་ཞེས་བསྒྲགས་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས།
