གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༨ཚེས་༡༧ཉིན། བོད་རང་བཙན་སློབ་ཕྲུག་ཚོགས་པ་དང་ལྡི་ལི་བསམ་ཡས་གླིང་ས་གནས་བོད་ཀྱི་གཞོན་ནུའི་ལྷན་ཚོགས། རོ་ཧི་ནི་ས་གནས་གཞོན་ནུ་ལྷན་ཚོགས་བཅས་ཀྱིས། ༧གོང་ས་སྐུ་ཕྲེང་བཅུ་གསུམ་པའི་བོད་རང་བཙན་ཁྱབ་བསྒྲགས་ཀྱི་ཡིག་ཆ་བསྐྱར་བསྐྲུན་བྱས་ནས་མང་ཚོགས་ལ་འགྲེམས་སྟོན་བྱས་པ།
ཟླ་འདིའི་ཕྱི་ཚེས་ ༡༥ ཉིན་གྱི་དགོང་དྲོའི་ཆུ་ཚོད་༥:༣༠་ནས་༧:༣༠ ཐོག་བོད་རང་བཙན་སློབ་ཕྲུག་ཚོགས་པ་དང་ལྡི་ལི་བསམ་ཡས་གླིང་ས་གནས་བོད་ཀྱི་གཞོན་ནུ་ལྷན་ཚོགས། རོ་ཧི་ནི་ས་གནས་གཞོན་ནུ་ལྷན་ཚོགས་བཅས་ཀྱིས་མཉམ་རུབ་ཐོག་བོད་མི་དང་བོད་དོན་རྒྱབ་སྐྱོར་བ་ཉིས་བརྒྱ་ལྷག་བསྐོངས་ནས་རྒྱ་གར་རྒྱལ་ཁབ་ཆེན་པོའི་རང་བཙན་གྱི་ཉིན་མོ་ཐེངས་དྲུག་ཅུ་རེ་དྲུག་པ་དེ་སྲུང་བརྩི་ཞུས་པ་དང་ཆབས་ཅིག་ཕྱི་ལོ་༡༩༡༣་ ལོར་༧གོང་ས་སྐུ་ཕྲེང་བཅུ་གསུམ་པ་ཆེན་པོས་མཛད་པའི་བོད་རང་བཙན་ཁྱབ་བསྒྲགས་ཀྱི་ཡིག་ཆ་བསྐྱར་བསྐྲུན་བྱས་ཏེ་དེར་འདུས་ཀྱི་མང་ཚོགས་ཡོངས་ལ་འགྲེམས་སྟོན་བྱས་ཡོད།
དེ་ཡང་ཐང་གའི་བཟོ་དབྱིབས་ལྟར་བསྐྱར་བསྐྲུན་བྱས་པའི་ཡིག་ཆ་རྩ་ཆེན་དེ་བོད་ཀྱི་གྲོགས་པོ་རྙིང་པ་དང་བོད་དོན་རྒྱལ་སྐྱོར་བ།མིང་དུ་གྲགས་པའི་གསར་འགོད་པ་བཻ་ཇེ་གེ་རན་ཏེ་ལགས་ཀྱི་ཞལ་འབྱེད་གནང་ཡོད་པ་མ་ཟད།རང་བཙན་གསལ་བསྒྲགས་ཀྱི་ཡིག་ཆའི་ནང་དོན་རྣམས་བོད་ཧིན་དབྱིན་གསུམ་གྱི་ལམ་ནས་སྒྲོགས་སྦྱངས་བྱས་ཡོད།
དེ་རིང་ནི་རྒྱལ་གཅེས་དཔའ་བོ་ཚེ་དབང་ནོར་བུ་ལགས་ཀྱིས་བོད་རྒྱལ་ཁབ་དང་མི་རིགས་ཀྱི་དོན་དུ་རང་ལུས་མཆོད་མེ་ཕུལ་ནས་མི་ལོ་ཧྲིལ་བོ་གཅིག་འཁོར་བའི་ཉིན་མོ་ཡིན་ལ།ཁོང་ནི་ཉིས་སྟོང་དགུ་ནས་བརྩིས་པའི་བོད་ནང་གི་རང་ལུས་མེར་བསྲེགས་གཏོང་མཁན་གྱི་བོད་མི་གསུམ་པ་དེ་ཆགས་ཀྱི་ཡོད།
ཁོང་ཚོའི་རང་སྲོག་བློས་གཏོང་གི་ལས་འགུལ་དེ་དག་ནི་ཁེར་རྐྱང་དང་འབྲལ་མེད་ཀྱི་དོན་རྐྱེན་ཞིག་མ་ཡིན་ལ། ལམ་ལམ་དུ་འབར་བའི་མེ་ལྕེ་ཁྲོད་དུ་༧གོང་ས་མཆོག་བོད་དུ་གདན་འདྲེན་ཞུས་དགོས། བོད་ལ་རང་བཙན་དགོས་ཞེས་པའི་ལྷང་ལྷང་གི་འབོད་ཚིག་དེ་དག་གིས་སྔར་ལོ་རྒྱུས་ཐོག་བྱུང་མ་མྱོང་བའི་རྒྱ་ནག་གི་དྲག་གནོན་ལ་ཕྱོགས་པའི་བོད་མི་ཚོའི་བཙན་རྒོལ་གྱི་རྦ་རླབས་དྲག་པོ་ ཞིག་གི་དབུ་བཙུགས་པའི་བརྡ་ལན་གསལ་པོ་སྟོན་གྱི་ཡོད་པ་རེད།
ཕྱི་ལོ་༢༠༡༡་ལོའི་ཟླ་བརྒྱད་པ་ནས་བཟུང་རང་ལུས་མེར་བསྲེགས་གཏོང་མཁན་གྱི་བོད་མི་འཐབ་རྩོད་པའི་གྲངས་ཀ་མང་དུ་ཕྱིན་ཡོད་མ་ཟད།
ཕྱི་ལོ་༢༠༡༢་ལོའི་ཟླ་བརྒྱད་པའི་ཚེས་༦་ནས་༡༣་པར་ཉུང་མཐར་ཡང་བོད་མི་ལྔས་བོད་པའི་རྩ་དོན་གྱི་སླད་དུ་རང་ལུས་མཆོད་མེར་ཕུལ་ཡོད་ལ།ད་བར་དུ་རང་ལུས་མེར་བསྲེགས་གཏོང་མཁན་གྱི་གྲས་ནས་བོད་མི་༣༩ཙམ་འདས་གྲོངས་སུ་ཕྱིན་ཡོད།
བོད་ནང་གི་བོད་མི་ཚོའི་འགོག་རྒོལ་གྱི་ཚད་མཐོ་ཤོས་དང་བློས་གཏོང་གི་རྣམ་པ་ཚབས་ཆེ་ཤོས་ལ་སླེབས་པའི་དུས་སྐབས་འདིར་ང་ཚོས་བོད་ནི་ལོ་རྒྱུས་ཐོག་རང་དབང་རང་བཙན་གྱི་རྒྱལ་ཁབ་ཅིག་ཡིན་པ་ཡིད་ལ་དྲན་པར་བྱ་རྒྱུ་དང༌།
མེས་པོས་བཞག་པའི་རང་བཙན་གྱི་ཁ་ཆེམས་དེ་ཡིད་ལ་བཅངས་ནས་རང་བཙན་རྩོད་ལེན་བྱེད་པར་བློ་ཐག་རྦད་གཅོད་ཐོག་ཐུན་མོང་གི་ནུས་ཤུགས་ཕྱོགས་གཅིག་ཏུ་སྤུངས་རྒྱུ་ནི་དུས་ལ་བབས་པའི་ང་ཚོའི་འོས་འགན་ཉག་ཅིག་རེད་ཅེས་བོད་རང་བཙན་སློབ་ཕྲུག་ཚོགས་པའི་རྒྱ་གར་སྡེ་ཚན་གྱི་རྒྱལ་ཡོངས་འགན་འཛིན་རྡོ་རྗེ་ཚེ་བརྟན་ལགས་ཀྱིས་བརྗོད་སོང༌།
ད་དུང་ཁོས་མུ་མཐུད་ནས་དུས་ད་ལྟའི་བར་དུ་བོད་ནང་དུ་བོད་མི་༥༠ མ་ཟིན་ཙམ་གྱིས་རང་ལུས་མེར་སྲེག་བཏང་བ་དང་འདས་ལོ་གཅིག་པུ་ལ་ཆ་བཞག་ནའང་བོད་མི་༤༧ཙམ་གྱིས་དེ་དེ་བཞིན་གྱིས་བློས་གཏོང་མཛད་པའི་བོད་མིའི་ལོ་རྒྱུས་ཁྲོད་ཀྱི་ཆེས་ཡ་ང་བའི་དུས་སྐབས་འདིར།
བོད་རང་བཙན་ཁྱབ་བསྒྲགས་ཀྱི་ཡིག་ཆ་བསྐྱར་བསྐྲུན་བྱས་ཏེ་རྒྱ་གར་རང་བཙན་གྱི་ཉིན་མོར་མི་མང་བརྒྱ་ཕྲག་མང་པོར་སྤྱན་འབུལ་བྱེད་ཐུབ་པ་བྱུང་བ་འདིས་འཛམ་གླིང་གི་ས་ཕྱོགས་གང་སར་གནས་པའི་བོད་མི་སྤྱི་བོ་གནམ་བསྟན་ཡོངས་ལ་རང་བཙན་རྩོད་ལེན་བྱེད་པའི་རེ་བ་གསར་བ་ཞིག་བསྐྲུན་ཐུབ་པར་ཡིད་ཆེས་ཡོད་ཅེས་བརྗོད་སོང༌།
ངས་དེ་རིང་འདིར་རྒྱ་གར་གྱི་མི་མང་ཡོངས་ལ། ང་ཚོས་སོ་སོའི་རྒྱལ་ཁབ་ཀྱི་རང་བཙན་ཉིན་མོ་སྲུང་བརྩི་བྱེད་པ་དང་དུས་མཚངས་སུ།བོད་མི་ཚོའི་རང་བཙན་འཐབ་རྩོད་ཀྱི་ལས་འགུལ་ལ་ཡང་ཕྱོགས་ཡོངས་ནས་རྒྱབ་སྐྱོར་དང་གདུང་སེམས་མཉམ་བསྐྱེད་བྱེད་རོགས་ཞེས་འབོད་སྐུལ་ཞུ་བཞིན་ཡོད་ཅེས་ལྡི་ལི་བོད་རང་བཙན་སློབ་ཕྲུག་ཚོགས་པའི་གཞི་རིམ་འབྲེལ་མཐུད་པ་ཟུར་བ་དང་ཧྥ་རན་སི་བོད་རང་བཙན་སློབ་ཕྲུག་ཚོགས་པའི་དྲུང་ཆེ་རྒྱ་གར་བུ་མོ་ཇོ་ཚེ་ནཱ་ལགས་ཀྱིས་བརྗོད་སོང༌།
ཁོ་མོས་མུ་མཐུད་ནས་དེ་རིང་ང་ཚོས་འདིར་རྒྱ་གར་གྱི་ཕྱི་སྲིད་བློན་ཆེན་ཨེསི་ཨམ་ཁིར་ཞི་ནཱ་ངོས་ནས་བོད་ནང་གི་ད་ལྟའི་ཛ་དྲག་གི་གནས་བབ་ཐོག་ལ་ཁ་ཞེ་གཉིས་མེད་ཀྱི་རྒྱབ་སྐྱོར་ཡོངས་བར་མཚན་རྟགས་བསྡུ་རུབ་ཀྱི་ལས་འགུལ་ཞིག་ཀྱང་རྩོམ་གྱིན་ཡོད་ཅེས་བརྗོད་སོང༌།
མཚན་རྟགས་བསྡུ་རུབ་ཀྱི་ལས་འགུལ་དེ་ནི་རྒྱ་གར་གྱི་མི་སེར་ཁོ་ནའི་ལས་འགུལ་ཞིག་ཡིན་འདུག་ལ།བསྡུ་རུབ་བྱས་པའི་མཚན་རྟགས་དེ་དག་རྒྱ་གར་གྱི་སེམས་དཔའ་ཆེན་པོ་གྷན་དྷི་མཆོག་གི་འཁྲུངས་སྐར་ཉིན་རྒྱ་གར་གྱི་ཕྱི་སྲིད་བློན་ཆེན་ལ་འབུལ་འཆར་ཡོད་འདུག
དེ་རིང་གི་ལས་འགུལ་དེའི་ཐོག་ལ་བོད་མི་མང་སྤྱི་འཐུས་ཨཙཱརྱ་ཡེ་ཤེས་ཕུན་ཚོགས་དང་གཡུ་སྒྲོན་ལགས། རྒྱ་གར་བོད་དོན་རྒྱལ་སྐྱོར་བ་བཻ་ཇེ་གེ་རན་ཏེ།
གྷན་ངྷིའི་ཞེ་བདེ་ཐེབས་རྩ་ཁང་གི་སྤྱི་ཁྱབ་དྲུང་ཆེ་སུའུ་རན་ངྷིར་གོ་མར་ལགས་བཅས་མཉམ་ཞུགས་གནང་ཡོད་པ་མ་ཟད།
མཛད་སྒོར་ཞུགས་མཁན་གྱི་བོད་མི་ཉིས་བརྒྱ་བརྒལ་བ་ལྷག་དང་རྒྱ་གར་གཞོན་སྐྱེས་བོད་དོན་རྒྱལ་སྐྱོར་བ་མང་པོ་ལ་རིན་བྲལ་གྱི་གསུངས་བཤད་ཀྱང་གནང་ཡོད་པ་རེད།
ཕྱི་ལོ་༢༠༡༣ ནི་༧གོང་ས་སྐུ་ཕྲེང་བཅུ་གསུམ་པས་བོད་རང་བཙན་ཁྱབ་བསྒྲགས་བསྐྱངས་ནས་མི་ལོ་བརྒྱ་ཐམ་པ་འཁོར་གྱི་ཡོད་སྟབས། བོད་རང་བཙན་སློབ་ཕྲུག་ཚོགས་པའི་ངོས་ནས་བསྐྱར་བསྐྲུན་བྱས་པའི་བོད་རང་བཙན་ཁྱབ་བསྒྲགས་ཀྱི་ཡིག་ཆ་དེ་སང་ལོ་བར་འཛམ་གླིང་གི་གྲོང་ཁྱེར་ཆེ་ཁག་བརྒྱ་ཙམ་གྱི་ནང་དུ་འགྲེམས་སྟོན་བྱེད་རྒྱུའི་དམ་བཅའ་བཞག་ནས་ད་ཆ་ལས་འཆར་ཡོངས་རྫོགས་འགོ་རྩོམ་བཞིན་ཡོད་པ་རེད།
