གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན་དྲ་བས་ཕྱི་ལོ༢༠༠༩ལོའི་ཟླ༤པའི་ཚེས༢༢ཉིན་སྤེལ། སུད་སིའི་གྲོང་ཁྱེར་ཇེ་ནེ་ཝར་ཕྱི་ཚེས་༢༠ནས་༢༤བར་བསྐོང་འཚོགས་བྱ་རྒྱུ་གཏན་འཁེལ་ཡོད་པའི་མི་རིགས་དབྱེ་འབྱེད་རིང་ལུགས་ཀྱི་བརྗོད་གཞིའི་འོག་རྒྱལ་ཚོགས་ཀྱི་ཌི་ཨར་སིས་(DRC)ཞེས་པའི་གཟིགས་ཞིབ་ལྷན་ཚོགས་ནས་བོད་ཀྱི་འགྲོ་བ་མའི་ཐོབ་ཐང་དང་མང་གཙོ་ལྟེ་གནས་ཁང་གི་ཚོགས་མི་ལྷན་ཞུགས་གནང་བཅུག་རྒྱུའི་ཚབ་ཏུ་ཕྱིར་འབུད་བཏང་ཡོད་འདུག་ལ། དེ་ཡང་མི་རིགས་དབྱེ་འབྱེད་རིང་ལུགས་ཀྱི་བརྗོད་གཞིའི་འོག་རྒྱལ་སྤྱིའི་གཟིགས་ཞིབ་གྲ་སྒྲིག་ཚོགས་ཆུང་གིས་བོད་ཀྱི་ཚོགས་པ་དེ་ངོས་ལེན་རྒྱབ་སྐྱོར་ལྡན་པའི་ཚད་མཐུན་ཚོགས་པ་ཞིག་ཏུ་ངོས་འཛིན་མ་གནང་བའི་ཐག་གཅོད་དེར་བོད་མི་མང་གཙོ་བྱས་པའི་རྒྱལ་སྤྱིའི་བོད་དོན་རྒྱབ་སྐྱོར་པ་དག་བློ་ཕམ་ཆེན་པོ་བྱུང་ཡོད་འདུག
རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ཀྱི་ལྟེ་གནས་ཁང་འདི་ཚད་མཐུན་ཚོགས་པ་ཞིག་ཡིན་པའི་ངོས་འཛིན་ལ་དགག་པ་བཏང་ཐོག། གཞུང་འབྲེལ་མ་ཡིན་པའི་ཚོགས་པ་འདིའི་དེབ་སྐྱེལ་དང་ངོས་ལེན་ཐད་ཆབ་སྲིད་དང་ཕྱི་འབྲེལ་གྱི་ལམ་ནས་དྲང་བདེན་མ་ཡིན་པའི་ལས་འགུལ་གང་མང་སྤེལ་ཏེ་འགལ་རྐྱེན་བཟོས་ཡོད་འདུག
རྒྱ་ནག་གཞུང་གིས་བོད་མདོ་དབུས་ཁམས་གསུམ་དུ་མི་འབོར་སྐྱེལ་འདྲེན་གྱི་སྲིད་བྱུས་བརྒྱུད་ནས་མི་རིགས་དབྱེ་འབྱེད་དང་མི་སེར་སྤེལ་བའི་ལས་དོན་ལག་ལེན་འགེལ་གྱིན་ཡོད་པ་མ་ཟད། འདས་པའི་ལོ་མང་པོའི་ནང་རྒྱ་གཞུང་གིས་རྒྱ་མི་འབོར་ཆེན་བོད་ནང་དུ་སྤོ་སྐྱེལ་བྱས་རྐྱེན། ད་ལྟ་བོད་ནང་དུ་མི་རིགས་དབྱེ་འབྱེད་དང་འབྲེལ་བའི་གནད་དོན་དང་གནས་སྟངས་ཁག་ཤིན་ཏུ་ཚབས་ཆེན་དུ་གྱུར་ཡོད་པ་རེད།
རྒྱ་གཞུང་གིས་བོད་ཀྱི་འགྲོ་བའི་ཐོབ་ཐང་དང་མང་གཙོ་ལྟེ་གནས་ཁང་ལ་སྤྲིངས་ཡོད་པའི་འཕྲིན་ཡིག་ནང༌། ལོ་སྔོན་མའི་ཕྱི་ཟླ༣པའི་ནང་ཁ་བྲལ་རིང་ལུགས་པའི་བསམ་ངན་སྐུལ་འདེད་འོག་ལྷ་ས་རུ་མི་༡༨ལྷག་རྐྱེན་ལམ་དང་བརྒྱ་ཕྲག་ལྷག་ལ་རྨས་སྐྱོན་བཏང་བ་སོགས་ཀྱི་ངོ་ལོག་ཟིང་འཁྲུག་བསླང་ཞེས་འཁོད་འདུག་མོད། འོན་ཀྱང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་གི་ཡིག་ཐོག་དཔྱད་གཞི་ཁག་ལ་གཞིགས་ན་སྔར་ལོའི་ཞི་རྒོལ་དང་འབྲེལ་བ་ཡོད་མཁན་བོད་མི་ངོ་རྒོལ་བ༡༣༥ལྷག་རྒྱ་གཞུང་གིས་དམར་གསོད་བཏང་ཡོད་ལུགས་གནས་ཚུལ་ར་འཕྲོད་ཡོད་པ་འཁོད་ཡོད་པ་རེད།
ཕྱི་ལོ༢༠༠༡ལོར་ལྷོ་ཨ་ཕི་རི་ཀའི་དྷུར་བྷན་༼Durban༽གྲོང་ཁྱེར་ནང་སྐོང་ཚོགས་བྱས་ཡོད་པའི་མི་རིགས་དབྱེ་འབྱེད་རིང་ལུགས་ལ་ངོ་རྒོལ་གྱི་རྒྱལ་སྤྱིའི་ལྷན་ཚོགས་ཐོག མཉམ་འབྲེལ་རྒྱལ་ཚོགས་ཀྱིས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་དེ་ངོས་ལེན་ཡོད་པའི་ཚད་མཐུན་ཚོགས་པ་ཞིག་ཡིན་པར་ངོས་འཛིན་གནང་ཡོད་ཀྱང། ཐེངས་འདིར་རྒྱ་ནག་གི་གནོན་ཤུགས་དང་ཐེ་ཇུས་འོག་ཡོ་རོབ་གནའ་འབྲེལ་དང་ཨོ་སི་ཊོ་ལི་ཡ་སོགས་ཀྱི་རྒྱལ་ཁབ་ཁག་གིས་ཀྱང་བོད་ཀྱི་ལྟེ་གནས་ཁང་དེ་ལ་རྒྱབ་སྐྱོར་རོགས་འདེགས་བྱས་མེད་ཁར། ལྷན་ཚོགས་ནས་ཕྱིར་འབུད་གཏོང་རྒྱུའི་ཐག་གནོད་ལ་མོས་མཐུན་གནང་ཡོད་འདུག
བོད་ཀྱི་འགྲོ་བ་མིའི་ཐོབ་ཐོང་དང་མང་གཙོ་ལྟེ་གནས་ཁང་གིས་ཐེངས་འདིའི་ལྷན་ཚོགས་སུ་མཉམ་ཞུགས་གནང་མཁན་གྱི་གཞུང་འབྲེལ་མ་ཡིན་པའི་ཚོགས་པ་ཁག་ལ་རེ་སྐུལ་ཞུས་ཡོད་དོན། ཚོགས་པ་ཁག་གིས་མི་རིགས་དབྱེ་འབྱེད་རིང་ལུགས་ཀྱི་འབྱུང་རྩ་ཐེར་འདོན་དང༌། མི་རིགས་དབྱེ་འབྱེད་ཀྱི་སྲིད་བྱུས་དང་ལམ་ལུགས་ལག་བསྟར་བྱེད་མཁན་གྱི་རྒྱལ་ཁབ་ཁག་ལ་ངོ་རྒོལ་མཐའ་གཅིག་ཏུ་བྱེད་དགོས། ཞེས་འབོད་སྐུལ་དྲག་པོ་ཞུས་ཡོད་འདུག
