གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ༢༠༡༠ལོའི་ཟླ་༨ཚེས་༢༤ཉིན། ཨ་རིའི་བོད་གཞུང་སྐུ་ཚབ་དོན་གཅོད་ཁང་ནས་བོད་གཞུང་དྲ་གནས་སུ་བཏང་གནས་གཞིགས་ན། ཨ་རི་ཤར་ཕྱོགས་ཁུལ་གྱི་རྒྱ་ནག་མང་གཙོ་ཚོགས་པའི་འགོ་ཁྲིད་གྲས་སྐུ་ཞབས་ཐང་ཡོན་ཅུན་གྱིས་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ལ་འབྲེལ་མོལ་གནང་བ་ལྟར། འདི་ཚེས་ ༡༧ ཉིན་རྒྱ་ནག་སྐམ་ས་ཆེན་པོ་ནས་སླེབས་ཤིང༌། དེང་སྐབས་ནིའུ་ཡོཀ་ནང་གཏན་སྡོད་བྱེད་བཞིན་པའི་རྒྱ་རིགས་ ༩ ནས་སྐུ་ཚབ་དོན་ཁང་དུ་གཟིགས་སྐོར་དང་འབྲེལ་བོད་དོན་སྐོར་བསམ་ཚུལ་བརྗེ་རེས་བྱེད་པར་ཕེབས་ཡོད། རྒྱ་རིགས་གྲོགས་པོ་དེ་རྣམས་རྒྱ་ནག་ཏུ་ཡོད་སྐབས་བོད་དོན་སྐོར་གསལ་པོ་ཞིག་ཤེས་ཐབས་བྲལ་སྟབས་བོད་ཀྱི་གནས་ཚུལ་ལ་སེམས་ཁུར་ཡོད་ཀྱང་ཞིབ་ཕྲ་ཤེས་ཀྱི་མེད།
དེར་བརྟེན་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་ནས་དོན་ཁང་གི་ལས་བྱེད་རྣམས་དང༌། དོན་ཁང་གི་ལས་དོན་སྐོར་ངོ་སྤྲོད་མདོར་བསྡུས་ཤིག་དང༌། དབུ་མའི་ལམ་གྱི་སྲིད་བྱུས་སྐོར་ངོ་སྤྲོད་སྙིང་བསྡུས་གནང༌། དེ་རྗེས་བོད་རྒྱ་འབྲེལ་མོལ་གྱི་གནས་སྟངས་སྐོར་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་དྲུང་འཕར་ཚེ་དབང་ཕུན་ཚོགས་ཀྱིས་ངོ་སྤྲོད་གནང་སྐབས་ཚང་མས་དོ་སྣང་ཆེན་པོ་གནང་འདུག
དེ་ཉིན་ཕེབས་པའི་རྒྱ་རིགས་ཚོས་བོད་ཆེན་པོ་ཟེར་བའི་སྐོར་དང༌། གལ་སྲིད་དབུ་མའི་ལམ་གྱི་ཐོག་ནས་བོད་དོན་ཐག་གཅོད་བྱུང་བའི་ཉིན་ད་ལྟ་བོད་ནང་ཡོད་བཞིན་པའི་རྒྱ་རིགས་རྣམས་ལ་ཐོབ་ཐང་ཇི་ཡོད། འཛིན་སྐྱོང་ལས་ཁུངས་གཅིག་གི་འོག་བོད་རིགས་ཡོངས་རྫོགས་ལ་རང་སྐྱོང་མིང་དོན་མཚུངས་ལ་དགོས་འདུན་གནང་གི་ཡོད་པ་ལྟར་འཛིན་སྐྱོང་ལས་ཁུངས་གཅིག་ཟེར་བའི་ལས་ཁུངས་དེར་མིང་ག་རེ་འདོགས་རྒྱུ་ཡིན་མིན་སྐོར་དོགས་འདྲི་གནང་ཡོད། སྐབས་དེར་རྒྱ་རིགས་གྲོགས་པོ་གཅིག་གིས་བསམ་ཚུལ་བརྗོད་དོན། ྋགོང་ས་མཆོག་གིས་འདོན་གནང་མཛད་པའི་དབུ་མའི་ལམ་ལ་རྒྱབ་སྐྱོར་ཡོད། འོན་ཀྱང་རྒྱ་རིགས་ཤིག་གི་ངོས་ནས་བོད་ས་ཡོངས་རྫོགས་འཛིན་སྐྱོང་གཅིག་གི་འོག་རང་སྐྱོང་དགོས་ཟེར་བ་དེར་མོས་མཐུན་བྱེད་ཐུབ་རྒྱུ་མིན་པའི་བསམ་ཚུལ་བཏོན། དེ་ལ་རྒྱ་རིགས་གཞན་ཚོས་ལན་འདེབས་བྱས་དོན། ཁྱིམ་ཚང་ཞིག་གི་པ་ཕས་ཕྲུ་གུ་གཅིག་ལ་ལྟ་སྐྱོང་བྱེད་ཀྱི་ཡིན། ཕྲུ་གུ་གཞན་ཚོར་ལྟ་སྐྱོང་བྱེད་ཀྱི་མིན་ཞེས་བཤད་ན། དེ་འདྲའི་ཕ་དེ་ཚད་དང་ལྡན་པ་ཞིག་མིན་པའི་རྒྱུ་མཚན་ལྟར། ྋགོང་ས་ཏཱ་ལའི་བླ་མ་མཆོག་ནས་བོད་ས་ཁ་ཤས་ཤིག་ལས་རང་སྐྱོང་མིང་དོན་མཚུངས་ལ་དགོས་དོན་མི་འདུག་གསུང་ན་འགྲིག་ཐབས་མེད། ང་ཚོས་ྋགོང་ས་མཆོག་ལ་རྒྱབ་སྐྱོར་ཡོད་ཅེས་གནས་ལུགས་དང་ལྡན་པའི་རྒྱུ་མཚན་འགྲེལ་བརྗོད་གནང། དེ་བཞིན་ཁོང་ཚོའི་དྲི་བ་རྣམས་ལ་དྲུང་འཕར་ཚེ་དབང་ཕུན་ཚོགས་ལགས་དང༌། རྒྱ་རིགས་འབྲེལ་མཐུད་པས་ཞི་ཞིང་དུལ་བའི་ཐོག་ནས་གསལ་བཤད་ལན་འདེབས་གནང༌།
མཇུག་ཏུ་རྒྱ་རིགས་འབྲེལ་མཐུད་པས་ཁོང་རྣམས་ནས་ཐུགས་སྣང་ཆེན་པོས་དོན་ཁང་དུ་ཕེབས་ཏེ་གནས་ཚུལ་ཤེས་རྟོགས་གནང་བར་ཐུགས་རྗེ་ཆེ་ཞུས་པ་དང༌། མ་འོངས་པར་ཡང་ག་དུས་ཕེབས་རུང་དགའ་བསུ་ཞུ་རྒྱུ་ཡིན། རྒྱ་རིགས་གྲོགས་པོ་རྣམས་དང་ཡང་ཡང་ཐུག་འཕྲད་ཀྱིས་གོ་བསྡུར་བྱེད་རྒྱུ་དེ་ནི་ྋགོང་ས་མཆོག་དང༌། བཙན་བྱོལ་བོད་གཞུང་གི་དགོངས་གཞི་ཡིན་པའི་སྐོར་བསྐྱར་ཟློས་གནང་བ་དང་འབྲེལ་བོད་སྐོར་གྱི་རྒྱ་ཡིག་ཡིག་ཆ་གལ་ཆེ་ཁག་གཅིག་དང༌། རང་གཞུང་གི་རྒྱ་ཡིག་དྲྭ་རྒྱའི་ཁ་བྱང་སོགས་དཔྱད་གཞིརའོས་པའི་དྲྭ་རྒྱ་ཁག་གཅིག་གི་གནས་ཚུལ་མཁོ་སྤྲོད་ཞུས། དེ་ཉིན་སྐུ་ཚབ་དོན་གཅོད་མཆོག་ཁེ་ཎ་ཌའི་ཊོ་རོན་ཊོ་གྲོང་ཁྱེར་དུ་གཞུང་དོན་ཕྱོགས་བསྐྱོད་ཕེབས་སྟབས་ཚོགས་འདུ་དེར་ཞུགས་མེད། མདོར་དོན་དེ་ཉིན་གྱི་དུས་ཡུན་ཆུ་ཚོད་གཉིས་ཀྱི་ཚོགས་འདུ་དེ་འཁྲུག་ཆ་དོད་ཅིང་དོན་སྙིང་ལྡན་པ་བྱུང་བའི་ཚོར་བ་བྱུང་ཡོད་པ་ཅེས་འཁོད་འདུག
