གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༡ཟླ་༣ཚེས་༡༩ཉིན། ཉི་ཧོང་གི་རྒྱལ་ས་ཊོ་ཁོའི་ཡི་གྷོ་ཁོ་ཁའི་ཇའི་གཙུག་ལག་ཁང་དུ་བོད་རིགས་དང་ཉི་ཧོང་བ་ཚོས་ས་ཡོམ་གྱི་གནོད་འཚེའི་ཁྲོད་ཚེ་སྲོག་ཤོར་བའི་ཉི་ཧོང་བ་སྟོང་ཕྲག་མང་པོར་སྨོལ་ལམ་ཚོགས་ཡོད་འདུག
ཐེངས་འདིའི་ས་ཡོམ་གནོད་འཚེའི་ཁྲོད་ཚེ་སྲོག་ཤོར་བའི་ཉི་ཧོང་བ་སྟོང་ཕྲག་མང་པོའི་ཆེད་དུ། བཞུགས་སྒར་དྷ་རམ་ས་ལ་དང་དེ་བཞིན་དགོན་པ་ཁག་ནས་ཤེས་རབ་སྙིང་པོ་སོགས་བསགས་ཡོད་པ་ལྟར། ཉི་ཧོང་ནང་ཡོད་པའི་བོད་རིགས་མི་མང་རྣམས་འདུ་འཛོམས་ཀྱིས་འདས་པོ་རྣམས་ལ་སྨོན་ལམ་ཚོགས་ཡོད་འདུག
དེའི་སྐོར་སྐུ་སྒེར་ཡིག་ཚང་གི་ངག་དབང་རྒྱལ་པོ་ལགས་ཀྱིས་འགྲེལ་བརྗོད་གནང་རྒྱུར། ང་ཚོས་ས་ཡོམ་ཁྲོད་ཚེ་འདས་སུ་གྱུར་བའི་འདས་པོ་རྣམས་དང། ཤུལ་དུ་ལུས་བའི་མི་མང་གི་འཚོ་བ་སླར་གསོ་ཡོང་བའི་སྨོན་ལམ་རྒྱག་གིན་ཡོད། ཉི་ཧོང་མི་མང་ལ་དཀའ་ངལ་ཆེན་པོ་འཕྲད་བཞིན་པའི་སྐབས་འདིར་ང་ཚོ་བོད་རིོགས་མི་མང་གིས་གདུང་སེམས་མཉམ་སྐྱེད་དང་བརྩེ་སེམས་མཚོན་པར་བྱས་པ་ཡིན་ཞེས་བརྗོད་འདུག
སྐབས་དེར་ཉི་ཧོང་གི་བུད་མེད་ཅིག་གིས་མིག་ཆུ་ཁྲོམ་ཁྲོམ་དུ་བཞུར་གྱིན་༧གོང་ས་མཆོག་གིས་འདས་པོ་རྣམས་དང་གནོད་ཐེབས་མི་མང་ལ་ཐུགས་སྨོན་གནང་བར་སྙིང་ཐག་ནས་ཐུགས་རྗེ་བཀའ་དྲིན་ཞུ་ཞེས་བརྗོད་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས་བོད་སྒྱུར་མདོར་བསྡུས་བྱས།
