The Tibet Post

དེ་ཡང་ཟླ་འདིའི་ཚེས་༡༦ཉིན་ཨ་རིའི་གྲོས་ཚོགས་འོག་མའི་འཐུས་མི་ལྕམ་ཐམ་མིད་བྷལ་ཌི་ཝིན་ལགས་ཀྱིས། སྤྱིར་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཕྱི་ལོ་༢༠༡༠ཟླ་༣པའི་ཚེས་༡༠སྟེ། གསུམ་བཅུའི་དུས་དྲན་ཐེངས་༥༢པའི་ཐོག་ཉིན་སྩལ་བའི་གསུང་འཕྲིན་དེ་ཉིད་ཨ་རིའི་གྲོས་ཚོགས་ནང་འབུལ་སྐབས། ལྕམ་ཐམ་མིད་ལགས་ཀྱིས། ཚོགས་གཙོ་མཆོག གསུམ་པའི་བཅུ་ཉིན་ནི་བོད་མི་ཚོས་རང་དབང་སྒེར་ལངས་བྱས་ཏེ་མི་ལོ་ ༥༢ འཁོར་བའི་དུས་དྲན་གྱི་ཉིན་མོ་ཞིག་ཡིན་པ་དང༌། སྤྱིར་ཉིན་མོ་འདི་ནི་སྐྱོ་གནས་ཤིག་ཡིན་ན་ཡང་དུས་དྲན་འདིས་རྒྱ་ནག་གིས་བོད་དེ་ཁྲིམས་འགལ་གྱི་བཙན་འཛུལ་བྱས་པའི་ཉིན་མོ་ཞིག་དྲན་གསོ་གཏོང་གིན་ཡོད་པ་རེད།

སྐབས་དེར་བོད་ཀྱི་༧གོང་ས་ཏཱ་ལའི་བླ་མ་མཆོག་ཀྱང་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་དགོས་བྱུང་ཡོད། ཐེངས་འདིའི་གསུམ་བཅུ་དུས་དྲན་སྲུང་བརྩི་ཉིན་མོར་ཨ་རིའི་བྱང་ཕྱོགས་མངའ་སྡེའི་ཝིད་སི་ཀོ་སིན་གྱི་རྒྱལ་ས་གྲོང་ཁྱེར་མེ་ཌི་སོན་ནང་ཡོད་པའི་དཔེ་མཛོད་ཁང་ཞིག་གི་ནང་ཝི་སི་ཀོན་སིན་གྱི་བོད་པ་དང་ཨ་རིའི་མི་མང་གང་མང་མཉམ་འཛོམས་ཐོག་གསུམ་བཅུའི་དུས་དྲན་སྲུང་བརྩི་ཞུས་སྐབས་ངའི་ལས་བྱེད་པ་ཞིག་མཛད་སྒོའི་ཐོག་མཉམ་ཞུགས་བྱེད་རྒྱུའི་གོ་སྐབས་བྱུང་ཡོད། དྲན་རྟེན་གྱི་ཉིན་མོ་འདིར་ངས་བཙན་བྱོལ་དུ་ཡོད་པའི་བོད་མི་དང་གཞིས་ལུས་རྒྱ་ཆེའི་མི་མང་རྣམས་ལ་རང་དབང་ཐོབ་པའི་ཡིད་ཆེས་དང་རྒྱབ་སྐྱོར་ཡོད། ངས་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་གི་བོད་རྒྱའི་དཀའ་རྙོག་སེལ་ཐབས་གཉིས་སྨན་དབུ་མའི་ལམ་ལ་རྒྱབ་སྐྱོར་ཤུགས་ཆེ་ཡོད། ཨ་རིའི་གཞུང་ལ་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་ལ་རྒྱབ་སྐྱོར་བྱེད་དགོས་པའི་འགན་འཁྲི་ཡོད་པ་བཞིན་ཨ་རི་གཞུང་གིས་དེ་དག་ཐོག་རྒྱབ་སྐྱོར་གནང་བའི་ཡིད་ཆེས་བརྟན་པོ་ཡོད། ཅེས་གསུངས།

ཡང་ཁོང་གིས་༧གོང་ས་མཆོག་གིས་ཆབ་སྲིད་ཀྱི་སྐུ་དབང་འོས་འདེམས་བྱས་པའི་འགོ་ཁྲིད་དེར་རྩིས་སྤྲོད་གནང་རྒྱུའི་ཐག་གཅོད་གནང་ཟིན་པ་དང༌། འཛམ་གླིང་གི་ས་ཕྱོགས་གང་སར་གཅིག་སྡུད་དབང་འཛིན་པ་ཚོས་སོ་སོའི་མི་མང་གིས་མང་གཙོའི་དོན་དུ་གཉེར་གྱི་ཡོད་ཀྱང་་ད་དུང་ལྟ་བ་འཁྲེགས་འཛིན་ཐོག་དབང་ཆ་བཟུང་ནས་སྡོད་སྐབས། ༧གོང་ས་ཏཱ་ལའི་བླ་མ་མཆོག་གིས་བོད་མིའི་མངོན་འདོད་བསྒྲུབ་ཆེད་ཆབ་སྲིད་ཀྱི་སྐུ་དབང་དོར་རྒྱུའི་དགོངས་བཞེས་དེ་ནི་འཛམ་གླིང་མི་མང་གི་སེམས་འགུལ་ཐེབས་འོས་པ་ཞིག་རེད་ཅེས་གསུངས་འདུག