གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༥ཚེས་༢༡ཉིན། ཁ་སང་ཕྱི་ཚེས་༢༠སྟེ་རེས་གཟའ་ཉི་མའི་ཉིན་ཨོ་སི་ཊི་རི་ཡའི་རྒྱལ་ས་ Klagenfurt ཀལ་གྷན་ཕོར་ཊིའི་ནང་༧གོང་ས་སྐྱབས་མགོན་ཆེན་པོ་མཆོག་གིས། ཨོ་སི་ཊི་རི་ཡ་དང་དེ་བཞིན་སུད་སི་སོགས་ནས་ཡོང་བའི་བོད་མི་༣༥༠ཙམ་ལ་དུས་ཡུན་ཆུ་ཚོད་༡ཙམ་རིང་བཀའ་སློབ་གསུང་བཤད་གནང་འདུག
ཐོག་མར་༧གོང་ས་མཆོག་གིས། ང་ཚོ་ཚང་མ་བོད་པ་རེད། ས་ཕྱོགས་གང་ཞིག་ཏུ་སོང་ཡང་རྒྱུན་དུ་ནས་སེམས་ནང་སོ་སོ་བོད་པ་ཡིན་བསམས་པ་ཞིག་དང་བོད་མིའི་ངོ་བོ་དེ་མ་བརླག་པར་བརྟན་པོ་ཉར་དགོས་པ་དེ་ཧ་ཅང་གལ་ཆེན་པོ་རེད། དེ་བཞིན་བོད་ནང་དུ་ཡོད་པའི་བོད་མི་དེ་ཚོས་འཇིགས་ཞུམ་མེད་པའི་ཐོག་ནས་བོད་པའི་རྩ་དོན་ཐོག་ཞི་བའི་ལས་འགུལ་སྤེལ་བཞིན་ཡོད་པ་དེ་ཚོ་ང་ཚོས་རྒྱུན་དུ་ནས་མ་བརྗེད་པ་བྱེད་དགོས།
ང་ཚོས་ཕྱི་ལོ་༡༩༥༩ཡི་དུས་སྐབས་སུ་ཕྱིར་བལྟས་ཤིག་བྱས་པ་ཡིན་ན། སྤྱིར་བོད་ས་ཡོངས་སུ་ཕན་ཚུན་ཆོས་ཕྱོགས་ཀྱི་འབྲེལ་བ་ཞིག་ཡོད་པ་རེད་དེ། ཆབ་སྲིད་ཀྱི་འབྲེལ་ལམ་དེ་ཧ་ཅང་སྐྱོ་པོ་རེད། དེར་བརྟེན་ནས་རྒྱ་མིས་དབང་སྒྱུར་བྱས་པ་རེད། ད་ལྟའི་ཆར་བོད་མི་རྣམས་ཕན་ཚུན་གདུང་སེམས་མཉམ་སྐྱེད་ཀྱི་རྣམ་པ་ཤུགས་ཆེན་པོ་ཡོད་པ་རེད།
བོད་མིའི་ངོ་བོ་དང་སྐད་ཡིག་དེ་བོད་ནང་དང་དེ་བཞིན་ཉེ་འཁོར་གྱི་ས་ཁུལ་དེ་དག་ལའང་དར་ཁྱབ་ཕྱིན་ཡོད། དེ་བོད་མིར་སྤོབས་པ་སྐྱེ་ཆོག་པ་ཞིག་ཡོད་པ་རེད། བོད་མིའི་སྐད་ཡིག་ལ་མཚོན་ན་ནང་སེམས་ཀྱི་རྣམ་གཞག་སྐོར་འགྲེལ་བཤད་ཆ་ཚང་བ་ཞིག་རྒྱག་ཐུབ་མཁན་ཞིག་ཆགས་བསྡད་ཡོད་པ་རེད་ལ། དེར་བརྟེན་བོད་མིའི་ནང་ཆོས་དང་རིག་གཞུང་དེ་འཛམ་བུ་གླིང་འདིའི་ནང་རིན་ཐང་ལྡན་པ་ཞིག་ཆགས་ཡོད། སྤྱིར་ནང་པའི་ཆོས་དེ་བོད་ལས་རྒྱ་ནག་ནང་སྔར་བ་དར་ཡོད་པ་རེད། འོན་ཀྱང་ད་ལྟའི་ཆར་རྒྱ་ནག་ནང་བོད་ནང་དུ་ནང་བཞིན་ནང་དོན་རིག་པའི་སྐོར་གྱི་པོ་ཏི་མང་པོ་ཡོད་པ་མ་རེད།
ང་ཚོས་རྒྱ་ནག་གཞུང་གིས་ང་ཚོའི་རིག་གཞུང་གཏོང་བཤིག་གཏོང་གིན་འདུག་ཅེས་ལབ་ཀྱི་ཡོད་པ་རེད། འོན་ཀྱང་ང་ཚོ་རང་དབང་ལུང་པའི་ནང་ཡོད་མཁན་ཚོས་རིག་གཞུང་སྲུང་སྐྱོབ་མ་བྱས་པ་ཡིན་ན་འགལ་བ་ཆགས་ཀྱི་རེད། དེར་སྲུང་སྐྱོབ་བྱེད་པར་གཙོ་བོར་བོད་མི་གཞོན་སྐྱེས་ཚོས་སོ་སོའི་བོད་སྐད་ཡིག་ལ་འབྲི་ཀློག་བྱེད་དགོས་པ་དེ་གལ་ཆེན་པོ་ཞིག་ཆགས་བསྡད་ཡོད་པ་རེད།
རྒྱ་ནག་གཞུང་གི་དབང་འཛིན་པ་ཚོས་ག་རེ་བྱས་ནས་བོད་མིའི་སྐད་ཡིག་གཏོང་བཤིགས་གཏོང་ཐབས་བྱེད་ཀྱིན་ཡོད་པ་ཟེར་ན། ཁོང་ཚོས་བོད་མིའི་སྐད་ཡིག་དེས་བོད་མིའི་ངོ་བོ་སྲུང་སྐྱོབ་བྱེད་ཀྱིན་ཡོད་པ་ཤེས་ཀྱི་ཡོད་པ་རེད། དེར་བརྟེན་ང་ཚོས་བཙན་བྱོལ་དུ་འབྱོར་རྗེས་ཆེས་ཐོག་མ་སློབ་གྲྭ་དེ་ཚོ་རྒྱག་རྒྱུའི་འབད་བརྩོན་བྱེད་དགོས་དོན་ཡང་དེ་རེད་ཅེས་གསུངས་འདུག
ཡང་མགོན་པོ་གང་ཉིད་ཀྱིས་གང་ཉིད་ཀྱི་ཆབ་སྲིད་ཀྱི་སྐུ་དབང་དེ་སྔ་ལོ་འོས་འདེམས་བྱས་པའི་དབུ་ཁྲིད་ལ་རྩིས་སྤྲོད་བྱས་པ་དེ་ཡང་བསམ་བློ་གསར་པ་ཞིག་མ་ཡིན་པར། དེ་ནི་ཕྱི་ལོ་༡༩༥༡དང་༡༩༥༢ཙམ་ནས་བོད་ནང་དུ་བཅོས་སྒྱུར་བྱ་རྒྱུ་འབད་བརྩོན་བྱ་ས་པ་ཞིག་ཡིན་ཡང༌། རྒྱ་མིས་ཁོང་ཚོའི་འདོད་པ་ནང་བཞིན་བཅོས་སྒྱུར་བྱས་པ་ཞིག་རེད།
ཕྱི་ལོ་༢༠༠༡ལོར་བོད་མིའི་ཆབ་སྲིད་ཀྱི་དབུ་ཁྲིད་མི་མང་གིས་འོས་འདེམས་བྱས་པ་ནས་བཟུང༌། གང་ཉིད་ཕྱེད་བགྲེས་ཡོལ་ཏུ་ཕེབས་ཡོད་པ་དང༌། དེ་སྔོན་ངོས་རང་ལོ་ན་༡༦སྐབས་སུ་སྲིད་སྐྱོང་སྟག་བྲག་རིན་པོ་ཆེས་གནང་བའི་ཆབ་སྲིད་ཀྱི་སྐུ་དབང་དེ་མཁས་དབང་བློ་བཟང་སེང་གེར་རྩིས་སྤྲད་པ་དང༌། བོད་གཞུང་དགའ་ལྡན་ཕོ་བྲང་དེ་དེང་སང་སྔོན་མའི་གནས་སྟངས་སྟེ། གང་ཉིད་སྐུ་སྒེར་གྱི་བླ་བྲང་ཞིག་ཏུ་བསྒྱུར་ཡོད་ལུགས་སོགས་གསུངས་ཡོད་པ་རེད།
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས་ཀྱིས་བོད་སྒྱུར་བྱས།
