The Tibet Post

རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༥ཚེས་༢༣ཉིན། ཁ་སང་ཕྱི་ཚེས་༢༢ཉིན། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཨི་ཊ་ལིའི་གྲོང་ཁྱེར་ཨུ་ཌིན་དུ་ཞབས་སོར་བདེ་བར་འཁོད་ཡོད་པ་རེད།

ཕྱི་ཟླ་༥ཚེས་༢༡ཉིན་ཨོ་སི་ཊོ་ལི་ཡའི་ནང་གི་མཛད་འཆར་རྣམས་ལེགས་པར་གྲུབ་རྗེས། ༧གོང་ས་སྐྱབས་མགོན་ཆེན་པོ་མཆོག་ཕྱི་ཚེས་༢༢ ཉིན་ཨི་ཊ་ལིའི་གྲོང་ཁྱེར་ཨུ་ཌིན་དུ་ཞབས་སོར་བདེ་བར་འཁོད་དེ། ཆོས་ལུགས་འདྲ་མིན་གྱི་སྐུ་ཚབ་ལྷན་ཚོགས་ཀྱི་༼དྲང་བདེན་དང་ཞི་བདེ། ཁོར་ཡུག་སྲུང་སྐྱོབ་དར་སྤེལ་གཏོང་ཐབས་བཅས་སུ་ཆོས་ལུགས་ཀྱི་ལས་འགན་༽ཞེས་པའི་ བགྲོ་གླེང་ཐོག་༧མགོན་པོ་གང་ཉིད་ཆིབས་བསྒྱུར་གྱིས་གསུང་བཤད་གནང་ཡོད་པ་དང༌། སྐབས་དེར་ཨི་ཊ་ལིའི་རིག་གཞུང་ཞིབ་འཇུག་ཁང་གི་འགན་འཛིན་བྷ་སི་མཱ་ཨི་ཝ་ཌི་ལགས་དང་རཱ་བྷི་སི་འགྲོ་བ་མིའི་ཐོབ་ཐང་ཚོགས་པའི་ཚོགས་མི་མིལ་གྷོ་རོན་ལགས་སོགས་ཕེབས་སྟེ་གསུང་བཤད་གནང་ཡོད་འདུག

སྐབས་དེར་༧མགོན་པོ་གང་ཉིད་ནས་དཀའ་ངལ་ལ་གདོང་ལེན་བྱེད་སྟངས་སོགས་ཀྱི་སྐོར་གསུང་བཤད་གནང་དོན། ང་ཚོ་འགྲོ་བ་མིའི་རིགས་ཀྱིས་རང་ཉིད་ཀྱི་ཐུན་མོང་མ་ཡིན་པའི་རྣམ་དཔྱོད་ཀྱི་ནུས་པར་བརྟེན་ནས་སོ་སོའི་རེ་འདོད་མངོན་འགྱུར་བྱེད་དུ་འཇུག་བཞིན་ཡོད་ཀྱང༌། རང་ཉིད་ཀྱི་རེ་འདོད་མངོན་འགྱུར་བྱུང་དགོས་ན་ལུས་སེམས་ཞི་ལྷོད་དང་སྤྲོ་སྣང་ལྡན་པ། སེམས་པ་བཟང་པོ་བྱེད་རྒྱུ་ཧ་ཅང་གལ་ཆེན་པོ་རེད་ཅེས་སོགས་དཀའ་ངལ་འཕྲད་པའི་སྐབས་སུ་ཚང་མ་མཉམ་རུབ་ཀྱིས་ལུས་སེམས་བག་ལྷོད་ཀྱིས་གདོང་ལེན་བྱེད་པའི་སྐོར་བཀའ་སློབ་གནང་ཡོད་འདུག

ཉིན་གུང་གསོལ་ཚིགས་ཀྱི་རྗེས་སུ། ཚན་རིག་པ་ཁག་ཅིག་དང་ལྷན་དུ་༼དྲག་རྩུབ་དང་འཚེ་བར་བྱམས་བརྩེས་གདོང་ལེན་བྱེད་ཕྱོགས་དང་འཚེ་མེད་ཞི་བ་གོང་འཕེལ་གཏོང་ཐབས༽་ཞེས་པའི་བརྗོད་གཞིའི་ཐོག་གསུང་བཤད་བཀའ་དྲིན་བསྐྱངས་ཡོད་འདུག

སང་ཉིན་ཕྱི་ཚེས་༢༤ཉིན། ༧མགོན་པོ་གང་ཉིད་ཀྱིས་ཨུ་ཌིན་གྱི་གཙུག་ལག་སློབ་གྲྭ་ཆེན་མོ་ཞིག་ཏུ་འཇིག་རྟེན་ཀུན་ཁྱབ་ཀྱི་ལྟ་སྤྱོད་གོང་འཕེལ་གཏོང་ཕྱོགས་ཀྱི་སྐོར་བཀའ་སློབ་གསུང་བཤད་གནང་རྒྱུ་ཡིན་འདུག