གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༧ཚེས་༣༡ཉིན། ཟླ་འདིའི་ཕྱི་ཚེས་༡༨ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དྭགས་སུ་ཞབས་སོ་བདེ་བར་འཁོད་དེ། དེ་གར་ཁྱོན་དུས་ཡུན་ཉིན་གྲངས་༢༠རིང་གྱི་མཛད་འཕྲིན་ནང་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་རྒྱུ་མ་ཟད། དམིགས་བསལ་ཆོས་ཕྱོགས་ཀྱི་མཛད་འཕྲིན་རྒྱ་ཆེ་བསྐྱངས་དང་སྐྱངས་འཆར་ནང༌། ཟླ་འདིའི་ཕྱི་ཚེས་༢༧ཉིན་ལ་དྭགས་ཀྱི་རྒྱལ་ས་སླེ་རུ་ཡོད་པའི་ལམ་སྒྲོན་སློབ་གྲྭའི་ཚན་རིག་སློབ་ཁྲིད་ཐོག་ཁང་དབུ་འབྱེད་དང༌། ས་གནས་ཁ་ཆེའི་ལྷ་ཁང་དུ་ཆིབས་བསྒྱུར་བཀའ་དྲིན་བསྐྱངས་ཏེ། མི་མང་སྟོང་ཕྲག་མང་པོར་བཀའ་སློབ་ལམ་སྟོན་གནང་ཡོད་འདུག
སྐུ་སྒེར་ཐེབས་རྩ་ནས་གསར་བཞེངས་གནང་བའི་ལ་དྭགས་སླེའི་ལམ་སྒྲོན་སློབ་གྲྭའི་ཚན་རིག་ཐོག་ཁང་ལེགས་འགྲུབ་བྱུང་ཏེ། ཟླ་འདིའི་ཕྱི་ཚེས་༢༧ཉིན། ༧གོང་ས་ྋསྐྱབས་མགོན་ཆེན་པོ་མཆོག་གིས་དབུ་འབྱེད་དང་སློབ་གྲྭ་དེའི་དགེ་སློབ་གཅིག་སྟོང་ལྷག་དང་སེར་སྐྱ་མི་མང་ལ་བཀའ་སློབ་ལམ་སྟོན་གནང་ཡོད་འདུག
སྐབས་དེར་༧མགོན་པོ་གང་ཉིད་ཀྱིས། སློབ་གྲྭ་དེའི་ཕྱི་ནང་གཉིས་ཀའི་ཆ་རྐྱེན་སྔར་ལས་ཡར་རྒྱས་ཆེན་པོ་ཕྱིན་ཡོད་པ་ལྟར། དགེ་རྒན་དང་སློབ་དེབ་ཁོ་ནར་བརྟེན་ནས་མ་བསྡད་པར་རང་རང་སོ་སོའི་ཐོག་ནས་སློབ་སྦྱོང་ལ་ཤུགས་སྣོན་རྒྱག་དགོས་པ་མ་ཟད། སློབ་མ་ཚོའི་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་འཕེལ་ཡོང་བར་བྱ་རྒྱུ་གནད་འགག་ཡིན་པ་དང༌། རྒྱུ་མཚན་རྣམས་ཡང་ནས་ཡང་དུ་དཔྱད་པ་བྱ་རྒྱུ་དེ་ནི། ཤེས་རབ་ཀྱི་རྒྱུན་མཐར་ཐུག་པ་རྗེ་བཙུན་འཇམ་དཔལ་དབྱངས་ལྟ་བུར་འགྱུར་རྒྱུའི་འགྲོ་ལམ་དེ་ཡིན་ཞིང༌། སློབ་སྦྱོང་ནི་གལ་ཆེན་པོ་ཡིན་པ་ཤེས་པ་ཙམ་མ་ཡིན་པར། དགེ་རྒན་གྱིས་སློབ་ཁྲིད་བྱས་པ་རྣམས་དོན་ལ་བསམ་བློ་བཏང་ནས་དཔྱད་པ་བྱས་ཏེ། དཔྱད་པ་དང་དོན་ཀྱི་ངེས་པ་རྙེད་པ་ཞིག་ཡོང་རྒྱུ་གལ་ཆེན་པོ་རེད། ཅེས་དང༌།
ཡང་ཁོང་གིས་མུ་མཐུད་དུ་གསུངས་དོན། ཧི་མ་ལ་ཡའི་ཆོས་དང་རིག་གཞུང་བོད་ནས་མཆེད་པ་ཞིག་ཡིན་སྟབས། ཆོས་དང་རིག་གཞུང་ཉམས་པ་སླར་གསོ་དང༌། མི་ཉམས་རྒྱུན་འཛིན་ཡོང་རྒྱུར་ཧི་མ་ལ་ཡ་ཁུལ་གྱི་བཙན་བྱོལ་བའི་ཆོས་སྒར་ཁག་ནང་སློབ་གཉེར་གནང་མཁན་ཚོས་ཞབས་འདེགས་ཞུས་ཡོད་ལ། ད་དུང་ཡང་ཕྲུ་གུ་རྣམས་བཙན་བྱོལ་གྱི་ཆོས་སྒར་ཁག་ནང་སློབ་གཉེར་དུ་འཛུལ་ཞུགས་བྱ་རྒྱུར་གོ་སྐབས་གནང་རྒྱུ་ཡིན་ཞེས་བཀའ་བསྕལ་ཡོད་འདུག
མཐའ་དོན་དུ་༧མགོན་པོ་གང་ཉིད་ཀྱིས། ལམ་སྒྲོན་སློབ་གྲྭའི་ཚན་རིག་སློབ་གཉེར་བ་ཚོས་འབྱུང་འགྱུར་དུས་རབས་ཉེར་གཅིག་པའི་སྨད་ཆར་ཕྱི་གཟིགས་ཅན་དང་ནང་ཤེས་པ་ཡི་ཚན་རིག་ཀུན་ལ་སློབ་གཉེར་གྱིས་ཚན་རིག་པ་མང་པོ་ཐོན་ཏེ། མིའི་རིགས་ལ་བདེ་སྐྱིད་བསྐྲུན་པར་རོགས་ཕན་བྱེད་ཐུབ་པར་རེ་བ་དང་སྨོན་ལམ་ཡོད་ཅེས་བཀའ་སློབ་ལམ་སྟོན་ཟབ་རྒྱས་གནང་ཡོད་འདུག
དེ་རྗེས་༧མགོན་པོ་གང་ཉིད་ས་གནས་དེའི་ཁ་ཆེའི་ལྷ་ཁང་དུ་ཆིབས་བསྒྱུར་བཀའ་དྲིན་བསྐྱངས་ཏེ། དེར་འདུས་ཀྱི་སེར་སྐྱ་རྒན་གཞོན་༡༠༠༠ལྷག་ལ་བཀའ་སློབ་གནང་དོན། ཕྱིའི་དཔལ་འབྱོར་གྱི་མཐུན་རྐྱེན་དང་ཆོས་ཀྱི་དད་མོས་སོགས་མི་འདྲ་བ་ཙམ་མ་གཏོགས་དོན་དངོས་སུ་མི་ཚང་མ་གཅིག་པ་ཡིན་ལ། ཀུན་ལ་བྱམས་བརྩེ་དང་སྙིང་རྗེ་སོགས་ལྷན་སྐྱེས་སུ་ཡོད་པས། ཆོས་ལུགས་ཀུན་ལ་གུས་བརྩི་ཡོད་པའི་སྒོ་ནས་ལྷན་སྐྱེས་ཀྱི་ཡོན་ཏན་དེ་ཚོ་ཡར་རྒྱས་སུ་གཏོང་དགོས་ཤིང༌། རྩ་བའི་ཆོས་ལུགས་ཀྱིས་བཟོད་པ་དང་སྙིང་རྗེ། ཆོག་ཤེས་སོགས་གཅིག་མཚུངས་སུ་བཤད་ཀྱི་ཡོད་པས། ལྟ་གྲུབ་མི་འདྲ་བ་དེ་ཕར་བཞག་ནས་ཕན་ཚུན་སློབ་སྦྱོང་དང་གུས་ཞབས་ཀྱི་སྒོ་ནས་ནང་སེམས་ཀྱི་བདེ་སྐྱིད་འཚོལ་ཐབས་བྱེད་དགོས་པ་ནི། དོན་དམ་གྱི་ཆོས་ལུགས་མཐུན་སྒྲིལ་དང་ཕན་ཚུན་བསམ་བློ་བརྗེ་རེས་ཆགས་བཞིན་ཡོད་སྐོར་སོགས་བཀའ་སློབ་གནང་ཡོད་འདུག
