གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༨ཚེས་༡༣ཉིན། ཟླ་འདིའི་ཕྱི་ཚེས་༩ཉིན། ཨ་རིའི་གྲོས་ཚོགས་འཐུས་མི་གཉིས་ཀྱིས་ཨ་རིའི་ཕྱི་སྲིད་ལས་ཁུངས་ཀྱིས་བོད་དོན་ཐོག་མངོན་གསལ་ལྡན་པའི་རྒྱབ་སྐྱོར་གནང་དགོས་པའི་རེ་འདུན་ཤུགས་ཆེ་བཏོན་ཡོད་འདུག
ཕྱི་ལོ་ ༢༠༡༢ ཟླ་ ༨ ཚེས་ ༩ ཉིན་ཨ་རིའི་གྲོས་ཚོགས་འཐུས་མི་སྐུ་ཞབས་ཇེམ་སི་མེཀ་གོ་ཝན་(James P McGovern) མཆོག་དང་སྐུ་ཞབས་ཕེ་རེངྐ་ཝུལ་ཕུ་མཆོག (Frank R Wolf) རྣམ་གཉིས་ཀྱིས་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་ (Hillary Clinton) མཆོག་ལ་འབོད་སྐུལ་གྱི་ཞུ་སྙན་ཞིག་ཕུལ་ཏེ་ཨ་རིའི་ཕྱི་སྲིད་ལས་ཁུངས་ནས་རྒྱལ་སྤྱིའི་སྟེང་བོད་དོན་ཐོག་མངོན་གསལ་ལྡན་པའི་རྒྱབ་སྐྱོར་གནང་སྟེ་བོད་ནང་གི་ཛ་དྲག་གནས་སྟངས་ལས་སྐྱོབ་ཐབས་གནང་དགོས་པའི་རེ་འདུན་ཤུགས་ཆེ་བཏོན་ཡོད།
དེ་ཡང་ཞུ་སྙན་དེའི་ནང་ད་ལྟའི་བོད་ནང་དུ་རྒྱ་ནག་གཞུང་གིས་བོད་མི་ཚོར་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་ཞི་རྒོལ་ཆེད་བོད་མི་ཚོས་རང་ལུས་མེར་སྲེག་བཏང་དང་གཏོང་བཞིན་པ་དེར་ཧ་ཅང་སེམས་འཚབ་ཡོད་སྐོར་འཁོད་དོན།
ང་ཚོས་ཨ་རིའི་གཞུང་གི་འབྲེལ་ཡོད་ལས་བྱེད་པ་རྣམ་པས་རྒྱ་ནག་གཞུང་གི་འབྲེལ་ཡོད་ལས་བྱེད་པ་ཚོ་དང་ལྷན་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ཁྱད་པར་བོད་ཀྱི་གནད་དོན་སྐོར་གྲོས་མོལ་ཡང་ཡང་བྱེད་བཞིན་ཡོད་པ་གསལ་རྟོགས་ཡོད། འོན་ཀྱང་རྒྱ་ནག་གཞུང་གིས་ད་ལྟའི་བོད་མིའི་ཐོག་དམ་བསྒྲགས་བྱེད་བཞིན་པའི་བྱ་སྤྱོད་དེ་འགོག་ཆེད་ཨ་རིའི་གཞུང་གིས་གནོན་ཤུགས་སྤྲོད་ཐུབ་པ་དགོས། དེར་བརྟེན་ཨ་རིའི་གཞུང་གིས་བོད་མིའི་ཐོག་རྒྱབ་སྐྱོར་གྱི་རྣམ་འགྱུར་མངོན་གསལ་དོད་པོ་ཞིག་འདོན་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་འཁོད་ཡོད།
གཞན་ཡང་ཞུ་སྙན་དེའི་ནང་ཨ་རིའི་གཞུང་གིས་བོད་ཀྱི་གནད་དོན་ཐོག་རྒྱལ་སྤྱིའི་ལྷན་ཚོགས་གོ་སྒྲིག་གནང་དགོས་པའི་བསམ་འཆར་བཏོན་ཡོད་པ་དང་དུས་དུས་སུ་གཞུང་དང་མང་ཚོགས་དབར་བགྲོ་གླེང་ལྷན་ཚོགས་གོ་སྒྲིག་གནང་རྒྱུ། དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ནང་ཨ་རི་དང་མཐུན་ཕྱོགས་རྒྱལ་ཁབ་ཚོའི་དབར་བོད་དོན་ལས་འགུལ་གྱི་འབྲེལ་ལམ་གསར་འཛུགས་ཐོག་བོད་དོན་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས་པ་སོགས་འབོད་སྐུལ་ཞུས་ཡོད།
མཐར་ཞུ་སྙན་དེའི་ནང་དེང་སྐབས་ཨ་རིའི་གཞུང་གིས་ཨེ་ཤི་ཡའི་གླིང་ཆེན་ནང་དོ་སྣང་ཆེན་པོ་སྤྲོད་བཞིན་པའི་སྐབས་དང་བསྟུན། བོད་མི་ཚོས་རྒྱབ་སྐྱོར་དགོས་པའི་སྨྲེ་ངག་འདོན་བཞིན་པ་དེ་ང་ཚོས་གོ་ཐུབ་ཀྱི་ཡོད་པའི་བརྡ་ལན་གཏོང་ཐུབ་པ་དགོས་ཞེས་སོགས་འཁོད་ཡོད།
བཙན་བྱོལ་བོད་མིའི་སྒྲིག་འཛུགས་ཀྱི་དྲ་བ་ལས།
