གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༡༠ཚེས་༢༥ཉིན། ཁ་སང་གཟའ་ལྷག་པ་ཉིན་ཨ་རིའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་མས་ད་ལྟའི་བོད་ནང་གི་ཛ་དྲག་གནས་སྟངས་ལ་སེམས་འཚབ་ཆེན་པོ་ཡོད་པ་མ་ཟད། རྒྱ་གཞུང་གིས་གང་མགྱོགས་ཀྱིས་བོད་མིའི་འདོད་བློ་མ་ཁེངས་བའི་གནད་དོན་དག་ཐག་གཅོད་གནང་དགོས་པའི་འབོད་སྐུལ་གནང་ཡོད་འདུག
ཁ་སང་ཕྱི་ཚེས་༢༤ཉིན། ཨ་རིའི་རྒྱལ་ས་ཝ་ཤིང་ཊོན་གྱི་གསར་འགོད་གསལ་བསྒྲགས་ཤིག་གི་ཐོག་ཨ་རིའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་མ་ལྕམ་ཝེ་ཀེ་ཊོ་རི་ཡ་ནོ་ལན་ཌི་(Victoria Nuland)མཆོག་གིས། ད་ལྟའི་བོད་ནང་གི་ཛ་དྲག་གནས་སྟངས་ཐད་སེམས་འཚབ་ཆེན་པོ་ཡོད་ལ། རྒྱ་གཞུང་གིས་གང་མགྱོགས་ཀྱིས་བོད་མི་ཚོའི་འདོད་བློ་མ་ཁེངས་པའི་གནད་དོན་ཁག་ཐག་གཅོད་གནང་དགོས་པའི་འབོད་སྐུལ་གནང་ཡོད་པ་མ་ཟད། ལོ་རེ་ནས་ལོ་རེ་བཞིན་ཛ་དྲག་ཅན་དུ་འགྱུར་བཞིན་པའི་བོད་ནང་གི་གནས་སྟངས་ཐག་གཅོད་ཡོང་བར་རྒྱལ་སྤྱིའི་སྤྱི་ཚོགས་ཀྱིས་ཀྱང་རྒྱ་གཞུང་ལ་གནོན་ཤུགས་སྤྲོད་དགོས་ཞེས་དང་།
ཡང་ཁོང་མོས། ང་ཚོས་ཐོག་མཐའ་བར་གསུམ་དུ་བོད་ནང་རིམ་པར་བྱུང་བའི་རང་ལུས་མེར་སྲེག་གི་དོན་རྐྱེན་སོགས་ཛ་དྲག་གི་གནས་ལ་སེམས་འཚབ་ཆེན་པོ་ཡོད་པ་གསལ་སྟོན་བྱས་ཡོད་ལ། མ་འོངས་པར་ཡང་ཨ་རིའི་གཞུང་སྒེར་གཉིས་ཀྱི་ངོས་ནས་རྒྱ་གཞུང་གིས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་འཛིན་བྱེད་པར་བཙན་གནོན་དམ་དྲག་བྱེད་བཞིན་པ་མཚམས་འཇོག་ཡོང་བར་འབོད་སྐུལ་བྱ་རྒྱུ་ཡིན་ཅེས་གསུངས་ཡོད་འདུག
ཡང་སྐབས་དེར་གསར་འགོད་པ་ཞིག་ནས་རྒྱ་གཞུང་གིས་གལ་སྲིད་རང་ལུས་མེར་སྲེག་གཏོང་འཆར་ཡོད་མཁན་ཐེར་འདོན་བྱས་ཚེ། ཨ་སྒོར་༨༠༠༠གི་བྱ་དགའ་སྤྲོད་རྒྱུ་ཡིན་ཞེས་བརྗོད་ཡོད་པ་ཤེས་རྟོགས་བྱུང་ངམ་ཞེས་དྲིས་པར། དེ་ཤེས་རྟོགས་མ་བྱུང་ཡང་། ད་ལྟའི་བོད་ནང་གི་ཛ་དྲག་གནས་སྟངས་ཐད་སེམས་འཚབ་ཆེན་པོ་ཡོད་ལུགས་གསུངས་འདུག
དེ་བཞིན་གོང་ཚེས་ཉིན། བོད་མི་མང་སྤྱི་འཐུས་ནས་གསལ་འགོད་གསལ་བསྒྲགས་ཤིག་སྤེལ་བའི་ནང་འབོད་སྐུལ་གནང་དོན། རྒྱ་གཞུང་གིས་གཡོ་རྫུན་གྱི་འཁྱོག་བཤད་དེ་དག་ཇི་སྐད་བཤད་པ་ལྟར་གནས་ཚུལ་བདེན་པ་ཡིན་ན། རྒྱལ་སྤྱིའི་ངོ་བོ་ཅན་གྱི་སྒྲིག་འཛུགས་ཁག་གི་སྐུ་ཚབ་དང་རྒྱལ་ཁབ་ཁག་གི་རྟོག་ཞིབ་པ། དེ་བཞིན་གསར་འགོད་པ་བཅས་བཀག་སྡོམ་མེད་པར་ཤར་གཏོང་གིས་ཞིབ་འཇུག་བྱེད་དུ་འཇུག་པ་དང་། ཕྱོགས་ལྷུང་གི་སྲིད་བྱུས་བཅོས་བསྒྱུར་ཡོ་བསྲང་གིས་ཐབས་སྡུག་གི་གནས་ཚུལ་དེའི་རིགས་མི་ཡོང་རྒྱུར་འགན་འཁྱེར་དགོས་ཞེས་ནན་བརྗོད་བྱེད་ཀྱི་ཡིན་ཞེས་དང་།
དེ་བཞིན་རྒྱལ་སྤྱིའི་ངོ་བོ་ཅན་གྱི་སྒྲིག་འཛུགས་དང་། རྒྱལ་ཁབ་ཁག་གིས་ཀྱང་འགྲོ་བ་མིའི་རང་དབང་དང་ཐོབ་ཐང་། དྲང་བདེན་ལ་རྒྱབ་སྐྱོར་གྱིས་བོད་ནང་གི་ཛ་དྲག་གི་གནས་ཚུལ་ལ་མངོན་གསལ་དོད་པོས་ངོས་འཛིན་དང་རྒྱབ་སྐྱོར་ཐོག་རྒྱ་གཞུང་ལ་གནོན་ཤུགས་སྤྲོད་རྒྱུ་དང། ཕ་མ་བུ་ཕྲུག་དང་བཟའ་ཟླ་ནང་མི། ལུས་སྲོག་ལོངས་སྤྱོད་ཡོངས་རྗོགས་བློས་གཏོང་གིས་རྒྱལ་སྤྱིའི་ཐོག་རེ་བའི་མིག་འབུར་གཏོད་པའི་ངོ་རྒོལ་གྱི་ལས་འགུལ་འདི་དག་ལ་བསམ་ཞིབ་ཐོག ཁ་ཡོད་ལག་ཡོད་ཀྱིས་རྒྱབ་སྐྱོར་གནང་རྒྱུར་རེ་སྐུལ་ནན་མོ་བྱེད་རྒྱུ་ཡིན་གསུངས་འདུག
