གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༡༠ཚེས་༢༩ཉིན། དེ་རིང་ཕྱི་ཚེས་༢༩ཉིན་གྱི་ཞོགས་པ་ཆུ་ཚོད་༩ཙམ་ལ། དྷ་ས་ཐེག་ཆེན་གཙུག་ལག་ཁང་དུ་༧གོང་ས་སྐྱབས་མགོན་ཆེན་པོ་མཆོག་གིས་ཀོ་རི་ཡའི་དད་ལྡན་ནང་པ་ཚོར་ཉིན་གྲངས་གསུམ་རིང་གི་གསུང་ཆོས་དབུ་འཛུགས་གནང་སོང་། ཀོ་རི་ཡའི་དད་ལྡན་ནང་པ་ཁག་ཅིག་གིས་ཇི་ལྟར་གསོལ་འདེབས་ཞུས་པ་ལྟར། དེ་རིང་ཞོགས་པ་ཆུ་ཚོད་༩ཙམ་ལ་ཐེག་ཆེན་གཙུག་ལག་ཁང་དུ། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཉིན་གྲངས་གསུམ་རིང་༼དབུ་མ་རྩ་བ་ཤེས་རབ༽ཀྱི་གསུང་ཆོས་དབུ་འཛུགས་གནང་པ་དང་། ཐེངས་འདིའི་གསུང་ཆོས་སྐབས་ཀོ་རི་ཡ་ནས་དད་ལྡན་པ་༢༥༠དང་རྒྱ་ནག་ནས་༢༢། དེ་མིན་གྱི་རྒྱལ་ཁབ་ཁག་༦༢ཙམ་ནས་༡༤༤༦དང་། དེ་བཞིན་དྷ་ས་ཁུལ་དང་ཕྱོགས་མཐའ་ཁག་ནས་ཕེབས་པའི་བོད་རིགས་སེར་སྐྱ་མི་མང་བཅས་ཁྱོན་མི་གྲངས་༥༠༠༠ལྷག་འཛོམས་འདུག
གསུང་ཆོས་ཀྱི་ཐོག་མར་༧མགོན་པོ་གང་ཉིད་ནས་ཀོ་རི་ཡའི་དད་ལྡན་པ་རྣམས་གཙོ་བོར་བའི་ཆོས་ཞུ་བ་ཡོངས་ལ་འཚམས་འདྲི་དང་བཅས་གསུངས་དོན། ཞི་བདེ་ཟེར་བ་དེ་ནང་སེམས་ཀྱི་ཞི་བདེ་བསྐྱེད་ནས་ཡོང་དགོས་ཀྱི་ཡོད་པ་ལས། ཞི་བདེ་ཟེར་དུས་ཕྱི་ལོག་ནས་འབད་བརྩོན་བྱས་བསྡད་པ་འདྲ་བོ་དང་། ཡིག་ཆ་བཞག་པ་སོགས་ཀྱིས་ཕན་གྱི་ཡོད་པ་མ་རེད། ཞི་བདེ་ངོ་མ་ཞིག་བསྐྲུན་དགོས་ན་ནང་སེམས་ཀྱི་ཞི་བདེ་བསྐྲུན་དགོས་པ་རེད། ཅེས་དང་།
ཡང་ཁོང་གིས་གཞན་གྱི་སེམས་ལ་ཞི་བདེ་བསྐྲུན་པར་རང་གི་སེམས་ལ་ཞི་བདེ་དགོས་པའི་སྐོར་སོགས་ལ་གསུངས་རྒྱུར། ང་རང་ཚོ་ཆོས་པ་ཞིག་དང་ལྷག་པར་དུ་སངས་རྒྱས་པའི་ཆོས་པ་ཞིག་གི་ངོས་ནས་བཤད་པ་ཡིན་ན། སེམས་ཀྱི་ཞི་བདེ་བསྐྲུན་པ་དེ་སོ་སོའི་ཕ་མེས་ནས་ཡོད་པའི་སངས་རྒྱས་པའི་ཆོས་དེ་ཆོ་ག་ཕྱག་ལེན་བྱས་བསྡད་པ་འདྲ་བོ་དང་། རྐྱེན་སེལ་བསྒྲུབ་པ་འདྲ་བོ་ཞིག་མ་ཡིན་པར་གཙོ་བོ་སེམས་རྒྱུད་འདུལ་བའི་ཐོག་ནས་སེམས་ལ་ཞི་བདེ་ཡོང་བའི་སྐོར་ལ་སངས་རྒྱས་པའི་ཆོས་ཀྱི་ནང་དུ་ཐབས་ལམ་མང་པོ་གསུངས་ཡོད་ལ། དེ་ཚོ་ང་རང་ཚོས་ལག་ལེན་བསྟར་དགོས་པ་རེད། འཛམ་བུ་གླིང་འདིའི་ཐོག་སངས་རྒྱས་ཀྱི་ཆོས་སྤེལ་བའི་དོན་དུ་མ་རེད། སོ་སོ་སོ་སོའི་ཕ་མེས་ཀྱི་ཆོས་ལུགས་དེ་ཉམས་སུ་བླངས་ན་བརྟན་པ་དང་ཡག་པོ་ཡོད་པ་རེད། ཡིན་ནའང་། ང་ཚོ་སངས་རྒྱས་པའི་ཆོས་ཉམས་ལེན་བྱེད་མཁན་ཞིག་གིས་སངས་རྒྱས་པའི་ཆོས་ཀྱི་ནང་དུ་གསུངས་བཞག་པའི་སེམས་འདུལ་བའི་སྐོར་དེ། ཆོས་མེད་མཁན་ཚོར་གྲོགས་པོ་གྲོགས་མོའི་འདུ་ཤེས་ཀྱི་ཐོག་ནས་བཤད་ཐུབ་པ་ཞིག་དང་། དེ་བཤད་པ་ལ་སངས་རྒྱས་པའི་ཆོས་བྱེད་མཁན་རང་ཉིད་ཀྱི་སེམས་འདུལ་བ་ཞིག་དགོས་པ་རེད། སངས་རྒྱས་པའི་ཆོས་བྱེད་མཁན་ཡིན་ཟེར་ནས་ཆགས་སྡང་གི་དབང་དུ་སོང་བ་ཡིན་ན། སངས་རྒྱས་པའི་ཆོས་པ་ཆགས་ཀྱི་ཡོད་པ་མ་རེད། དེ་འདྲ་ཡིན་དུས། གཞན་ཀྱི་སེམས་ལ་ཞི་བདེ་བསྐྲུན་པ་ལ་རང་གི་སེམས་ལ་ཞི་བདེ་དགོས་པ་རེད་ཅེས་སོགས་གསུངས་སོང་།
ཐེངས་འདིའི་གསུང་ཆོས་ཀོ་རི་ཡའི་སྐད་དང་དབྱིན་སྐད། ཉི་ཧོང་གི་སྐད། ཨུ་རུ་སིའི་བཅས་སུ་ཐད་བསྒྱུར་གྱིས་དྲ་བྱང་http://dalailama.com/livewebབརྒྱུད་ནས་རྒྱང་སྲིང་ཞུ་བཞིན་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས།
