གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༡༡ཚེས་༡ཉིན། ཀོ་རི་ཡའི་དད་ལྡན་ཁག་ཅིག་གིས་ཇི་ལྟར་གསོལ་འདེབས་ཞུས་པ་ལྟར་ཉིན་གྲངས་གསུམ་རིང་དྷ་ས་ཐེག་ཆེན་གཙུག་ལག་ཏུ། ༧གོང་ས་མཆོག་གིས་དབུ་མ་རྩ་བ་ཤེས་རབ་བཀའ་འཁྲིད་གནང་ནས་ཉིན་མཐའ་མ་དེར། ༧མགོན་པོ་གང་ཉིད་ཀྱིས་ཀོ་རི་ཡའི་དད་ལྡན་རྣམས་གཙོ་བོར་གྱུར་བའི་ཆོས་ཞུ་བ་རྣམས་ལ་བཀའ་དབང་དང་སྡོམ་པ་འབོགས་འཇོག་བཅས་གནང་ཡོད་འདུགསྐབས་དེར་༧མགོན་པོ་གང་ཉིད་ཀྱིས་ང་ཚོ་རང་ཉིད་ལ་བདག་གཅེས་བྱེད་བཞིན་ཡོད་པས་སེམས་ཅན་གཞན་རྣམས་ལའང་བསམ་ཤེས་དང་། གཞན་གྱི་དཀའ་ངལ་སེལ་བར་བྱེད་དགོས་པ་རེད། དཔེར་ན། ཁྱེད་ཀྱིས་སྲིན་བུ་ཞིག་ལ་མཇུབ་མོ་ཐུག་པ་ཡིན་ན། སྲིད་བུ་དེ་འཕྲལ་དུ་འཕུར་འགྲོ་ངེས་རེད། དེའི་ཐོག་ནས་སྲིད་བུར་ཡང་དཀའ་སྡུག་མྱོང་འདོད་མེད་པ་གསལ་བོ་མཚོན་ཡོད་པ་རེད། ང་ཚོས་ངེས་པར་དུ་ང་ཚོ་མིའི་རིགས་ཀྱི་རྣམ་དཔྱོད་བེད་སྤྱད་དེ་ཅ་དངོས་ཀྱི་གནས་ལུགས་རྟོགས་པར་བྱེད་དགོས་པའི་སྐོར་སོགས་བཀའ་སློབ་ལམ་སྟོན་གནང་ཡོད་འདུག
ཀོ་རི་ཡའི་དགེ་འདུན་པ་བྷམ་གྷོག་(Bumguk)ལགས་ཀྱིས་གསར་འགོད་པར་བརྗོད་རྒྱུར། དུས་ཡུན་ཐུང་ཐུང་ཉིན་གསུམ་ཙམ་གྱི་རིང་གི་༧གོང་ས་མཆོག་གི་བཀའ་སློབ་དེ་ཚོ་ཧ་ཅང་གལ་ཆེན་ཤ་སྟག་ཡིན་ལ། དེ་རིང་ང་རང་སེམས་པ་ཧ་ཅང་སྐྱིད་པོ་འདུག དེ་རིང་འདིར་ཕེབས་པའི་ཀོ་རི་ཡའི་ནང་པ་མང་པོས་མི་ལོ་༡༠ལྷག་གི་རིང་ལ་ནང་ཆོས་ལ་སློབ་སྦྱོང་བྱས་ཡོད་ལ། ད་ཐེངས་འདིར་ཡོང་ནས་༧གོང་ས་མཆོག་གི་མདུན་ནས་གསུང་ཆོས་ཞུ་བའི་གོ་སྐབས་བྱུང་བ་ཧ་ཅང་ལེགས་པོ་བྱུང་། ཞེས་སོགས་བརྗོད་འདུག
ཟླ་འདིའི་ཕྱི་ཚེས་༤ཉིན་ནས་༡༣བར༧མགོན་པོ་གང་ཉིད་ཀྱིས་ཉི་ཧོང་གི་ནང་དུ་བློ་སྦྱོང་ཚིག་བརྒྱད་མའི་གསུང་ཆོས་བཀའ་དྲིན་སྩལ་རྒྱུ་དང་། དེ་བཞིན་མི་མང་ལ་༼རྐྱེན་ངན་བྱུང་སྐབས་བཟང་ཕྱོགས་ཀྱི་རེ་བ་༽་དང་། ཚན་རིག་པ་དང་དགེ་འདུན་པ། ནང་པའི་མཁས་དབང་བཅས་ལྷན་འཛོམས་ཐོག་ནང་ཆོས་ཕྱི་ནང་གི་མཚན་རིག དེ་བཞིན་དཀའ་ངལ་ལས་འགྲོལ་བའི་ནུས་ཤུགས་དང་། མ་འོངས་པའི་མི་རབས་གཞོན་པའི་སྐོར་སོགས་ཀྱི་བརྗོད་གཞིའི་ཐོག་བཀའ་སློབ་གསུང་བཤད་གནང་རྒྱུ་ཡིན་འདུག
