གསར་འགྱུར། 
རྒྱལ་སྤྱིའི་བོད་ཆ་འཕྲིན། ཕྱི་ལོ་༢༠༡༡ཟླ་༣ཚེས་༢ཉིན། རྒྱ་གཞུང་གིས་རོང་འབྲོག་ཁུལ་གྱི་སློབ་ལོ་ལོན་པའི་བྱིས་པ་ཁྲི་༥༠ལྷག་ཚུད་པའི་སློབ་གྲྭ་ཁག་གི་སློབ་མ་ཚོར། སློབ་གསོའི་སྲིད་བྱུས་གསར་བ་ཞིག་གཏན་འབེབས་བྱེད་འཆར་ཡོད་ཅེས་བརྗོད་འདུག
རེས་གཟའ་ཟླ་བ་ཉིན། སློབ་གསོ་ཁང་གི་མགྲིན་ཚབ་པ་ཚེ་རིང་རྡོ་རྗེ་ཡིས་རོང་འབྲོག་ཁུལ་གྱི་སློབ་གསོའི་གནས་ཚད་གོང་དུ་སྤེལ་བའི་ཆེད་དུ། སྲིད་གཞུང་ནས་སློབ་མའི་རོགས་དངུལ་ལྡབ་གཅིག་གིས་འཕར་སྣོན་བྱས་སྟེ་ད་ལོར་རྒྱ་སྒོར་དུང་ཕྱུར་༡་༠༡ཙམ་གྱིས་རོགས་སྐྱོར་བྱ་རྒྱུ་ཡིན་ཞེས་དང༌། ཡང་ཁོང་གིས། རོང་འབྲོག་ཁུལ་ནས་ཡིན་པའི་བྱིས་པ་ཚོར་བྱིས་སློབ་ཁང་ནས་བཟུང་མཐོ་འབྲིང་བར་དུ་མི་རེར་རྒྱ་སྒོར་༢༠༠༠རེ་སྤྲོད་རྒྱུ་དང་དེའི་ཐོག ལོ་ལྟར་སློབ་སྦྱོང་མཁོ་ཆས་དང་ཟས་གོས་གནས་མལ་སོགས་ཀྱི་ཐོག་རོགས་སྐྱོར་བྱ་རྒྱུ་ཡིན་ཞེས་བརྗོད་འདུག
དེ་བཞིན་རྒྱ་ནག་གི་ཤིན་ཧྭ་གསར་ཁང་ནས་གནས་ཚུལ་སྤེལ་བ་ལྟར་ན། སྲིད་གཞུང་ནས་བོད་རིགས་བྱིས་པ་ཚོར་རིན་མེད་ཀྱི་ཐོག་ནས་སློབ་སྦྱོང་གི་གོ་སྐབས་ཕུན་སུམ་ཚོགས་པོ་ཞིག་ཐོབ་པའི་ཆེད་དུ། ཕྱི་ལོ་༡༩༨༥ལོ་ནས་བཟུང་རོང་འབྲོག་ཁྱིམ་གྱི་བྱིས་པ་ཚོར་རོགས་དངུལ་སྤྲོད་ཀྱི་ཡོད་ནའང༌། དེའི་ནང་དུ་བྱིས་སློབ་ཁང་གི་བྱིས་པ་ཚོ་ཚུད་མེད་པ་རེད་པས། ད་ལྟ་བྱིས་སློབ་ཁང་དང་སློབ་ཆུང༌། དེ་བཞིན་དམའ་འབྲིང་བཅས་འགྲིམས་བཞིན་པའི་ཡོང་སྒོ་ཉུང་བའི་ཁྱིམ་ཚང་གི་བྱིས་པ་ཚོར་དམིགས་ནས་རྒྱ་སྒོར་ས་ཡ་༡༠ཙམ་གྱི་འགྲོ་གྲོན་བཏང་ཏེ་རོགས་སྐྱོར་བྱ་རྒྱུ་ཡིན་པ་མ་ཟད། བྱ་དགའི་དངུལ་སོགས་སྤྲོད་རྒྱུ་ཡིན་ཞེས་བརྗོད་འདུག
ཡིན་ནའང༌། བོད་རིགས་ཆེད་ལས་པ་ཚོས་རྒྱ་ནག་གི་སློབ་གསོའི་ལས་གཞི་ཁག་ལ་རྒྱུས་ལོན་བྱས་པ་ལྟར་ན། ཕྱི་ལོ་༢༠༠༥ལོའི་ཡར་སྔོན་དུ་བོད་རང་སྐྱོང་ལྗོངས་སུ་བཙུགས་པའི་སློབ་གྲྭ་ཁག་གི་སློབ་མ་བརྒྱ་ཆ་༧༡རྒྱ་རིགས་དང༌། བརྒྱ་ཆ་༢༩བོད་རིགས་ཡིན་པ་དང༌། བོད་ལྗོངས་མི་རིགས་སློབ་གྲྭ་རུ་སློབ་མ་༩༣༨ཡོད་པའི་ནང་དུ་བོད་རིགས་སློབ་མ་༢༢༧ཙམ་མེད་པ་ཤེས་རྟོགས་བྱུང་ཡོད་པ་རེད། གལ་སྲིད་རྒྱ་གཞུང་གིས་བཤད་པ་ལྟར་བོད་རང་སྐྱོང་ལྗོངས་སུ་རྒྱ་རིགས་བརྒྱ་ཆ་༤ལས་མེད་པ་ཡིན་ན། བརྒྱ་ཆ་༤ལས་མེད་པའི་མི་འབོར་གྱིས་སློབ་གསོའི་སྒྲིག་འཛུགས་ཀྱི་ཆ་ཤས་བརྒྱ་ཆ་༧༡བརྒལ་བ་བཟུང་ཡོད་པ་དེ་དངོས་ཡོད་གནས་སྟངས་དང་འགལ་བའི་གནད་དོན་ཆེན་པོ་ཞིག་རེད་བརྗོད་ཀྱི་ཡོད་པ་རེད།
ཕྱི་ལོ་༢༠༠༥ལོའི་བོད་ལྗོངས་སློབ་གྲྭ་ཆེན་མོའི་སློབ་མའི་བསྡོམས་གྲངས་ཀྱི་ཐོ་གཞུང་ནང་དུ། སློབ་གྲྭ་དེར་བོད་རིགས་སློབ་མ་༡༠༡༨ཡོད་པ་དང༌། རྒྱ་རིགས་སློབ་མ༢༠༨ཡོད་ཅེས་བཀོད་ཡོད་ཀྱང༌། སློབ་མཐར་ཕྱིན་པའི་སློབ་མ་ཚོའི་གྲངས་འབོར་ཕན་ཚུན་བསྡུར་བ་ཡིན་ན། ཚན་རིག་དང་ལག་རྩལ་གྱི་སློབ་ཚན་འདེམས་མཁན་བོད་རིགས་སློབ་མ་བརྒྱ་ཆ་༧༠ལྷག་ཟིན་གྱི་ཡོད་ཀྱང༌། སློབ་ཐོན་བྱུང་བའི་བོད་རིགས་སློབ་མ་བརྒྱ་ཆ་༢༦ཙམ་ལས་མེད་པ་གསལ་བོར་ཆགས་ཡོད་པ་རེད།
རྒྱ་གཞུང་གིས་འགྲེམས་སྤེལ་བྱས་པའི་ཕྱི་ལོ་༢༠༠༩ལོའི་ལོ་མཇུག་གི་བོད་རང་སྐྱོང་ལྗོངས་ཀྱི་མི་འབོར་རྩིས་བཤེར་གྱི་ཐོ་གཞུང་དུ། ༢༠༠༩ལོའི་བོད་རིགས་ཀྱི་གྲངས་འབོར་དེ་༡༩༥༩ལོ་ལས་ས་ཡ་༢་༩མང་དུ་སོང་ཡོད་ལུགས་བཀོད་ཡོད་པ་དང༌། ཡང་མི་འབོར་རྩིས་བཤེར་གྱི་ཡིག་ཆ་གཞན་ཞིག་གི་ནང་དུ་ཕྱི་ལོ་༡༩༥༩ལོའི་བོད་མིའི་གྲངས་འབོར་ས་ཡ་༡དེ་༢༠༠༨ལོར་ས་ཡ་༢་༧འཕར་ཡོད་ཚུལ་བཀོད་ཡོད་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས་བོད་སྒྱུར་བྱས།
