The Tibet Post

རྒྱལ་སྤྱིའི་བོད་ཀྱི་ཆ་འཕྲིན་དྲ་བས་ཕྱི་ལོ༢༠༠༩ལོའི་ཟླ༥པའི་ཚེས༢༨ཉིན་སྤེལ།བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱིས་སྔར་ལོར་དཀར་མཛེས་རྫོང་ཐོག་ཏུ་རྒྱ་གཞུང་ལ་ངོ་རྒོལ་གྱི་ཞི་བའི་ལས་འགུལ་ནང་མཉམ་ཞུགས་གནང་མཁན་བོད་མི་བཞི་ལ་གསར་འགོད་གསལ་བསྒྲགས་ཤིག་གོ་སྒྲིག་གནང་ཞིང༌། རྒྱལ་སྤྱིའི་གསར་འགོད་མི་སྣ་༣༠ལྷག་གསར་འགོད་གསལ་བསྒྲགས་ཐོག་འདུ་འཛོམས་བྱུང་ཡོད་པ་རེད།

ཐེངས་འདིའི་གསར་འགོད་གསལ་བསྒྲགས་ཐོག་སྔར་ལོའི་ཞི་རྒོལ་ཆེན་མོར་མཉམ་ཞུགས་གནང་རྐྱེན། རྒྱ་གཞུང་གི་བཙན་དབང་མནར་གཅོད་འོག་སྡོད་ཐབས་བྲལ་ཏེ་ཉེ་འཆར་རྒྱ་གར་ནང་བྲོས་བྱོལ་ལ་ཕེབས་ཡོང་མཁན་ཚེ་རིང་འགྱུར་མེད་ལགས་དང། མ་འདུས་མགོན་པོ།ཚེ་དབང་དོན་འགྲུབ།བློ་བཟང་ཐུབ་བསྟན་སོགས་ངོ་ཕེབས་གནང་ཡོད་ཁར།ཁོང་ཚོས་སྔར་ལོའི་ཞི་རྒོལ་ཆེན་མོ་སྐབས་ཀྱི་མཐོང་ཐོས་མྱོང་གསུམ་གསར་འགོད་པར་ངོ་སྤྲོད་དང་སྒྲོག་འདོན་གནང།

ཚེ་རིང་འགྱུར་མེད་ལགས་ནི་དཀར་མཛེས་རྫོང་ལྷོ་པ་ཤང།ཕུག་ཡུལ་ནང།ཕ་རི་ཚང་གི་ཕ་ཟླ་བ་དོན་འགྲུབ་དང་། མ་དཔལ་བདེ་སྐྱིད་གཉིས་སུ་སྐྱེས་ཤིང།ཕྱི་ལོ༢༠༠༨ལོའི་ཟླ༣པའི་ཚེས༡༨ཉིན་དཀར་མཛེས་རྫོང་ཐོག་ཏུ་དཀར་མཛེས་གསེར་ཆུ་སྟེང་ནས་ཡིན་པ་ཆུ་ཁ་ཚང་གི་དངོས་དགའ་གཙོས་མི་བཅུ་ཕྲག་ལྷག་གིས་སྣེ་ཁྲིད་དེ་མི་དམངས་ཞི་རྒོལ་ཆེན་མོ་བྱས་སྐབས་མཉམ་ཞུགས་བྱས་ཏེ་རྒྱ་གཞུང་ལ་ཞི་རྒོལ་གནང་ཡོད་འདུག མ་འདུས་མགོན་པོ་ནི་མདོ་ཁམས་ཤར་ཕྱོགས་དཀར་མཛེས་རྫོང།སེ་ངོ་ཤང།ཀ་རྡོག་གྲོང་དུ་ཕ་དགེ་ལུ་དང་། མ་བློ་བཟང་མཚོ་གཉིས་སུ་སྐྱེས་ཤིང།དེ་ཡང་ཕྱི་ལོ༢༠༠༨ལོའི་ཟླ༣པའི་ཚེས༡༨ཉིན་ཆུ་ཚོད་དང་པོ་དང་སྐར་མ༥༠ཙམ་ལ་དཀར་མཛེས་རྫོང་ཐོག་ཏུ་ཞི་རྒོལ་གནང་རྐྱེན།དཀར་མཛེས་རྫོང་སྤྱི་བདེ་ཅུས་རང་ནས་ཕྱི་ཟླ༣པའི་ཚེས༡༨ཉིན་བྲོས་བྱོལ་དུ་སོང་བ་དཀར་མཛེས་དགོན་གྱི་དབུ་ཟུར་ཚེ་བརྟན་ཕུན་ཚོགསདང༌། རྩིས་ཚང་དགོན་གྱི་གྲྭ་ཚེ་རིང་འགྱུར་མེད།བུ་མོ་ཞའོ་མེན་མེན།མ་འདུས་མགོན་པོ་བཅས་མི་བཞི་ཅན་ཞིག་འཇུ་བཟུང་བཀའ་རྒྱ་གང་སར་བཀྲམ་པ་མ་ཚད། ཁོང་རྣམས་རྩིས་སྤྲོད་བྱེད་མཁན་བྱུང་ཚེ་རྒྱ་སྒོར་ཁྲི༢༥ནས༢༠བར་བྱ་དགའ་སྤྲད་རྒྱུ་ཡིན་ལུགས་སོགས་གསར་ལམ་དང་བརྙན་འཕྲིན་ཁག་ཏུ་སྤེལ་འདུག

ཚེ་དབང་དོན་འགྲུབ་ལགས་ནི་བྲག་མགོ་རྫོང།ཏྲེ་ཧོར་ཤང་། ཆོག་རི་སྒོ་རོང་གྲོང་དུ་ཕ་བསྟན་འཛིན་གྲགས་པ་དང༌།མ་ནོར་བུ་ལྷ་སྒྲོན་གཉིས་སུ་སྐྱེས་ཤིང།རྒྱ་གཞུང་གིས་བོད་མི་རིགས་ཚོར་བསམ་བློ་བཅོས་བསྒྱུར་དང༌། བཙན་ཐོད་ཀྱིས་ྋགོང་ས་མཆོག་ལ་མཚན་སྨོད་བྱེད་དུ་འཇུག་བཞིན་པའི་སྲིད་བྱུས་ངན་རྒུ་ལ་ངོ་རྒོལ་གནད་སླད།སྔར་ལོའི་ཟླ༣པའི་ཚེས༢༤ཉིན་དཀར་མཛེས་རྫོང་ཐོག་ཏུ་རྒྱ་གཞུང་ལ་རྒོལ་བའི་ཞི་བའི་རྔམ་སྟོན་ཁྲོམ་སྐོར་ནང་ཞུགས་པ་མ་ཟད།རྒྱ་གཞུང་གི་དམིགས་བསལ་དྲག་སྤྱོད་དམག་མིའི་མེ་མདའི་འོག་འཆི་ལ་ཉེ་བའི་བོད་མི་གྲྭ་བ་ངོ་རྒོལ་བ་ཞིག་རང་ཉིད་ཀྱི་སྲོག་ཉེན་ལ་མ་འཛེམས་པར་སྐྱོབ་སྐབས།ཁོའི་ལག་གཡོན་པར་རྒྱ་དམག་གི་མེ་མདའ་ཕོག་སྟེ་ལག་ཡ་གཅིག་ཞ་བོ་ཆགས་ཡོད་འདུག

ཞི་རྒོལ་བྱུང་རྗེས་ཚེ་རིང་དོན་འགྲུབ་དང་ཁོའི་སྤུན་ཟླ་གཉིས་རི་ལ་བྲོས་ཏེ་ཡིབ་སྐོང་བྱ་དགོས་བྱུང་ཞིང། ཁོའི་ཞང་པོ་ཞིག་རྒྱ་གཞུང་གིས་འཇུ་བཟུང་བཙོན་འཇུག་བྱས་ཡོད་འདུག

སྔར་ལོའི་ཟླ༣པའི་ཚེས༢༥ཉིན་རྒྱ་གཞུང་གིས་འཛིན་བཟུང་བྱས་ཏེ་ལོ་གསུམ་གྱི་བཙོན་འཇུག་ཁྲིམས་ཆད་ཕོག་པའི་སེར་མོ་བ་དང་སྐྱ་བོ་དག་ནི།དབང་མོ།ཡེ་ཕུང་སྒྲོན་གཡང་། སྒྲོལ་མ།དབྱངས་མཚོ། སྐལ་བཟང། རྡོར་རྗེ་བཅས་ཡིན་ཞིང།ཨ་ནེ་མཁའ་འགྲོ་ལྷ་མོ། ཆོས་སྒྲོན། གཡང་མཚོ་གསུམ་ལོ༧གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་ཁར། བསོད་ནམས་ཡར་འཕེལ་ལགས་རྒྱ་ཁབ་ཀྱི་གསང་བ་ཕྱིར་བསྒྲགས་པའི་ཁག་འཛུགས་ཉེས་འདོགས་འོག་ལོ༡༠། དེ་མིན་བློ་བཟང་ཡར་འཕེལ་ལགས་ལོ༣དང༌། རྡོ་རྗེ་ལགས་སམ་ཁམས་ཕང་ལོ༤བཙོན་འཇུག་ཁྲིམས་ཆད་ཕོག་ཡོད་འདུག བློ་བཟང་ཐུབ་བསྟན་ལགས་ནི་བྲག་འགོ་རྫོང་། ཏྲེ་ཧོར་ཤང། ཆོག་རི་སྒོ་ལ་གྲོང་དུ་སྐྱེས་ཤིང་། སྔར་ལོའི་ཟླ༣པའི་ཚེས༢༤ཉིན་རྒྱ་གཞུང་ལ་རྒོལ་བའི་ཞི་བའི་རྔམ་སྟོན་ཁྲོམ་སྐོར་ནང་མཉམ་ཞུགས་གནང་ཡོད་འདུག