གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན་དྲ་བས་ཕྱི་ལོ༢༠༠༩ལོའི་ཟླ༦པའི་ཚེས༤ཉིན་སྤེལ། བཞུགས་སྒར་རྡ་རམ་ས་ལར་གཏན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་མི་སྟེ། མི་ལོ༡༢ལ་རྒྱ་ནག་གི་བཙོན་འོག་ནས་བསྡད་མྱོང་བའི་བོད་མི་ཆབ་སྲིད་བཙོན་ཟུར་འཇམ་པ་བཀྲ་ཤིས་ལགས་ཀྱིས་འདི་གའི་གསར་འགོད་པར་ཁོང་ཉིད་ཀྱིས་རྒྱ་དམར་གྱི་བཙན་དབང་འོག་སྡུག་སྦྱོང་མནར་གཅོད་ཇི་ལྟར་མྱངས་ཚུལ་འགྲེལ་བརྗོད་གནང་དོན་གཤམ་གསལ།སློབ་སྦྱོང་གི་གོ་སྐབས་ཐོབ་མ་མྱོང་བའི་ང་རང་ནི། ཁམས་ཀྱི་ཞིང་བ་ཞིག་གི་ཁྱིམ་ནས་འཚར་ལོངས་བྱུང་བ་ཡིན་ལ། ང་རང་བོད་ཀྱི་རྩ་དོན་ལ་ཤུགས་སྣོན་རྒྱག་རྒྱུའྀ་འདོད་མོས་ཟབ་མོ་ཡོད། སྔོན་ཆད་ངས་ནོར་ལུག་གི་རྫི་བོ་བྱེད་པ་ལས་བོད་ཀྱི་ཕྱི་ལོག་ན་འདི་འདྲའི་འཇིག་རྟེན་རྒྱ་ཆེ་བ་ཞིག་ཡོད་པ་ཡིད་ལའང་དྲན་མྱོང་མེད། ཕྱི་ལོ༡༩༨༦དང༨༧ལོའི་ནང༌། ལོ་༡༧སྟེང་དུ་ང་རང་བོད་ཤར་ཕྱོགས་ཀྱི་དགོན་པ་ཞིག་ཏུ་གྲྭ་བ་བཅོས་ནས་བོད་ཡིག་དང་ནང་ཆོས་སློབ་གཉེར་གནང་བ་ཡིན་མོད། ཕྱིས་སུ་དགོན་པ་དེ་རྒྱ་ནག་གཞུང་གིས་གཏོར་བཅོམ་བྱས་ནས་གྲྭ་ཤག་ཆུང་ཞིག་གི་ནང་དུ་གྲྭ་བ༢༥གྲངས་དང་མཉམ་དུ་བསྡད་པ་ཡིན། དེ་ནས་བཟུང་རྒྱ་གཞུང་གིས་གྲྭ་བ་གསར་ཞུགས་བྱས་མི་ཆོག་པའི་བཀའ་རྒྱ་སྤེལ་སོང༌། ང་ཚོས་དགོན་པ་སླར་གསོ་བྱེད་རྒྱུའི་འབད་བརྩོན་བྱས་ཀྱང༌། རྒྱ་གཞུང་གིས་ང་ཚོའི་ཐོབ་ཐང་དང་རང་བཙན་འཕྲོགས་ཏེ་བཀུར་འོས་པའི ༧གོང་ས་ཏཱ་ལའི་བླ་མ་མཆོག་ལ་གསོལ་འདེབས་དང་ཆོས་དད་ཉམས་ལེན་བྱས་མི་ཆོག་པ་བཟོས།
ཕྱི་ལོ༡༩༩༤ལོའི་ཟླ་༥ནང་ངའི་གྲོགས་མང་བོས་འགྲོ་བ་མིའི་ཐོབ་ཐང་ཆེད་དང༌། རང་གི་རྒྱལ་ཁབ་ངེས་ཟིན་ཡོང་རྒྱུའི་ཆེད་དུ དུ་ཞི་བའི་རྔམ་སྟོན་ཁྲོམ་སྐོར་བྱེད་འགོ་བརྩམས་སོང༌། རྒྱ་ནག་གཞུང་གིས་རྒྱུན་དུ་བོད་ཀྱི་རང་དབང་དང་འགྲོ་བ་མིའི་ཐོབ་ཐང་ཐད་ཡར་རྒྱས་གཏོང་གི་ཡོད་ལུགས་བརྗོད་ཀྱིན་ཡོད་མོད། དོན་གྱིས་ང་ཚོར་འགྲོ་བ་མིའི་ཐོབ་ཐང་ཟེར་བ་ཞིག་མེད། ངས་རང་དབང་དེ་དག་གི་སླད་དུ་འཐབ་རྩོད་བརྩོན་ལེན་བྱས་མཐར།ང་ཚོ་དུད་འགྲོ་ནང་བཞིན་དུ་བརྩིས་ནས་ཉེས་མེད་ཉེས་འགལ་བཙུགས་ཏེ་གྲྭ་བ་མང་བོ་བཙོན་འཇུག་དང་གཅར་རྡུང་བཏང་བ་མ་ཟད། ང་རང་མི་ལོ༡༢ལ་བཙོན་འཇུག་ཉེས་ཆད་བཅད་པ་དང༌། ངའི་གྲོགས་པོ་རེ་འགའ་ལོ་༡༥ཁྲིམས་ཐག་བཅད། དེ་ནི་དྲང་བདེན་ཞིག་ཡིན་ནམ།
ང་བཙོན་འཇུག་བྱས་པ་ནས་བཟུང་ཕྱི་རོལ་གྱི་མི་གཅིག་ལའང་ཐུག་འཕྲད་བྱེད་དུ་མ་བཞག རང་དབང་ལྡན་པའི་སྤྱི་ཚོགས་ཤིག་གི་ནང་དུ་དུད་འགྲོ་ཞིག་ཡིན་ནའང་རང་གི་ཐོབ་ཐང་རྩོད་པའི་དབང་ཆ་ཡོད་པ་རེད། རྗེས་སུ་ངའི་གྲོགས་པོ་གསུམ་དང་ང་རང་རྒྱ་ནག་གི་བཙོན་ཁང་གཞན་ཞིག་ཏུ་གནས་སྤོར་བྱས་ཤིང༌། དེ་ནི་བོད་ཤར་ཕྱོགས་ཀྱི་བཙོན་ཁང་ཆེ་ཤོས་དེ་རེད།
དུད་འགྲོའི་ཚུལ་གྱིས་ལོ་བཅུ་དང་བཅུ་ལས་རིང་བར་བཙོན་འོག་ནས་སྡོད་དགོས་བྱུང༌། ང་རང་གིས་ཕྱི་ལོ༡༩༩༤ལོ་ནས༢༠༠༦ལོའི་བར་གྱི་མི་ལོ་བཅུ་གཉིས་ཀྱི་འཚོ་བ་བཙོན་འོག་ནས་བསྐྱལ་ཏེ། སྡུག་སྦྱོང་མནར་གཅོད་ཁུར་བ་ཟད། ཁ་ལ་ཟ་རྒྱུ་དང་ཐང་ན་ཉལ་ས་མེད་པར་ང་ཚོས་རང་གི་ལག་པར་ཁེན་ནས་ཞིང་ཁ་རྨོ་འདེབས་དང༌། གཙང་སྤྱོད་དཀྲུ་བ་སོགས་ཀྱི་ལས་ཀ་བྱས་ནས་ཉིན་མཚན་བསྐྱལ་བ་ཡྀན།
བཙོན་མ་རྣམས་ཚན་ཁག་གསུམ་དུ་བགོས་ཡོད་ཅིང༌། ཁག་རེ་རེར་བཙོན་མ་༤༠༠རེ་ཡོད་ལ་དེའི་ནང་གི་༡༢ལྷག་ཆབ་སྲིད་བཙོན་མ་རྐྱང་རྐྱང་རེད། ཚན་ཁག་དང་པོ་དང་གཉིས་པ་ནི་བོད་པ་དང་གསུམ་པ་རྒྱ་ནག་གི་བཙོན་པ་རེད། གནས་སྟངས་ཧ་ཅང་སྐྱོ་བོ་ཡིན། ཞོགས་པ་རྩམ་པའི་ནང་དུ་ཙི་རྟུག་དང་རིལ་ལུད་འདྲེས་པ་ཞིག་སྟེར་ལ། ཉིན་གུང་ང་ཚོར་ཕག་ཚིལ་དང་ཕག་གོ་འདྲེས་སྦྱོར་གྱི་ཤ་རྡོག་ཆུང་ཆུང་ཞིག་ལས་མེད་པས་བཙོན་མ་མང་བོའི་ལུས་ཕོང་ཟད་དེ་རིད་པོ་ཆགས་ཡོད་ཅིང༌། བཙོན་པ་མང་ཤོས་ཡར་ལངས་ཐུབ་ཀྱི་མེད་པའི་གནས་སྟངས་འོག་ལྷུང་ཡོད།
རྒྱ་ནག་གཞུང་གིས་རྒྱ་ནག་གི་བཙོན་མ་ལ་དམིགས་གསལ་གྱིས་ལྟ་སྐྱོང་བྱེད་པ་མ་ཟད། ཁོ་ཚོའི་ཟ་མའང་ང་ཚོ་ལས་ལྡབ་འགྱུར་གྱིས་བཟང་བའི་འབྲས་དང་ཤིང་ཏོག་གི་ཟས་རིགས་མང་པོ་ཡོད་པ་རེད།
ངའི་གྲོགས་པོ་ཀྲ་ཤིས་ཚེ་རིང་ནི་རྒྱ་གར་ལ་ཆས་ནས་སློབ་སྦྱོང་བྱས་པར་རྒྱ་གཞུང་གིས་གསང་ཉུལ་གྱི་ཉེས་མིང་བཏགས་ཏེ་འཛིན་བཟུང་བཀག་ཉར་བྱས་པ་མ་ཟད། མི་སྤྱོད་ལས་འདས་མནར་སྤྱོད་སྡུག་སྦྱོང་བཏང་བ་རེད། ཁོང་གིས་ད་ལྟའང་རྒྱ་གཞུང་གི་བཙོན་ཁང་དུ་མི་ལོ་བཅོ་ལྔའི་བཙོན་འཇུག་ཁྲིམས་ཐག་འཁུར་བཞིན་ཡོད་པ་རེད།
ཕྱི་ལོ༢༠༠༦ལོར་ང་རང་བཙོན་གྲོལ་ཐོབ་ཀྱང་རྒྱ་གཞུང་གི་ཁྲིམས་དབང་བཙན་པོའི་འོག་ཆབ་སྲིད་ཁེ་དབང་སྤུ་ཙམ་མེད་པར་འཚོ་ཐབས་བྲལ་རྐྱེན། ཕྱི་ལོ༢༠༠༧ལོར་རང་གི་སྤུན་ཟླ་དང་མི་རིགས་ཀྱིས་མྱོང་བཞིན་པའི་སྡུག་སྦྱོངདག་ཕྱིའི་རྒྱལ་ཁབ་ཁག་ལ་དཔང་སྦྱོར་བྱེད་ཆེད་རྒྱ་གར་ལ་བྲོས་བྱོལ་དུ་འོང་བ་ཡིན་ཞིང༌། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་སློབ་གཉེར་ཁང་དུ་བོད་ཀྱི་ཚད་མ་རིག་པ་དང༌། དབྱིན་ཡིག གཞན་ཡང་གློག་ཀླད་ཀྱི་ལས་འཆར་ཁག་ལ་སློབ་གཉེར་བྱས་པ་་ཡིན། ཞེས་འགྲེལ་བརྗོད་གནང་སོང༌།
