The Tibet Post

རྒྱལ་སྤྱིའི་བོད་ཀྱི་ཆ་འཕྲིན་དྲ་བས་ཕྱི་ལོ༢༠༠༩ལོའི་ཟླ༦པའི་ཚེས༣༠ཉིན་སྤེལ། ༄༅། །འདི་གར་འབྲེལ་ཡོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། སྡེ་དགེ་འཇོ་མདའ་རྫོང་པདྨ་ཤང་དང༌། གནས་མདོ་ཤང་གཉིས་ཀྱི་སྡེ་ཁོངས་སུ་གཏོགས་པའི་སྟག་ལུང་དགོན་པར་གྲྭ་པ་གཅིག་ཀྱང་སྡོད་མཁན་མེད་པར་ཟླ་གཅིག་ལྷག་ཕྱིན་ཟིན་ཡོད་འདུག་པ་ལྟར་རྒྱ་གཞུང་གིས་པདྨ་སྨད་པའི་སྡེ་ནང་བོད་མི་གནད་ཡོད་འགན་ཁུར་བ་རྣམས་ལ་དགེ་འདུན་པ་རྣམས་དགོན་པར་བསྡུ་རུག་དགོས་པའི་བཙན་བཀའ་ཐེངས་མང་བཏང་ཡོད་འདུག

འོན་་ཀྱང་ལས་དོན་འགྲུབ་མེད་པར་བརྟེན་ཕྱི་ཟླ་ ༦ ཚེས་ ༢༧ ཉིན་ཤང་གི་ལས་བྱེད་བོད་མི་འགྱུར་མེད་མགོན་པོ་དང༌། རྒྱལ་ཚང་རྡོ་རྗེ་གཉིས་རྒྱ་དམག་གིས་འཛིན་བཟུང་བྱས་ཏེ་སྐྱབས་ཆེ་དགོན་ཕྱོགས་སུ་ཁྲིད་པའི་སྐབས་བོད་མི་ ༢༠ ལྷག་ཙམ་གྱིས་ལམ་ཁ་བཀག་པ་དང་རྒྱ་དམག་དང་འཁྲུག་འཛིང་ཤོར་ཏེ་ཕར་ལ་ཁུ་ཚུར་སོགས་བཞུས་པ་དང༌། ཚུར་ལ་དུག་རྫས་དང་མེ་མདའ་གང་ཡིན་དབྱེར་མ་ཆོད་པ་མང་པོ་བརྒྱབ་ནས་ཤ་གཏོར་བ་དང་རྨ་བཟོས་པ་སོགས་ཀྱིས་བོད་མི་རྣམས་ལ་རྨས་སྐྱོན་ཚབས་ཆེ་ཕོག་ཡོད་འདུག བོད་མི་དེ་རྣམས་ཕལ་ཆེར་རྒྱ་དམག་གིས་འཛིན་བཟུང་བྱས་ཏེ་གནས་མདོ་ཤང་ཁོངས་སྐྱབས་ཆེ་དགོན་དུ་ཁྲིད་ནས་དགོན་པའི་བཤད་གྲྭ་ནང་བཀག་ཉར་བྱེད་བཞིན་ཡོད་འདུག་པ་དང༌། རང་ལོ་ ༤༧ ལ་སོན་པའི་ནོར་ལྷ་དང༌། རང་ལོ་ ༤༣།༤༤ གང་རུང་ལ་སོན་པའི་མགོན་པོ་དར་རྒྱས་གཉིས་གཏེ་བོ་ཡིན་སྐད་ཀྱིས་འཇོ་མདའ་རྫོང་ཕྱོགས་སུ་ཁྲིད་ཟིན་ཡོད་པ་ཤེས་རྟོགས་བྱུང་ཡོད་འདུག བོད་མི་བཀག་ཉར་བྱས་པ་རྣམས་པང་གཅལ་ཐོག་བསྙལ་ནས་རྐང་མཐིལ་དང་ལག་མཐིལ་དུ་ལྕགས་འཛེར་བརྡབ་སྟེ་རྒྱུག་པ་དང༌། ལྕག་ཚན་བཞུ་བ་སོགས་གཅར་བརྡུང་ཚད་ལས་འདས་པ་གཏོང་ཡོད་འདུག

རྨས་མ་ཁ་ཤས་འབྲོག་སྡེ་ཁག་ཏུ་གནས་སྡོད་ཀྱིས་སྨན་བཅོས་སོགས་ཀྱི་མཐུན་རྐྱེན་ཚད་ལྡན་རེག་གི་ཡོད་མི་འདུག བོད་མི་འཛིན་བཟུང་བྱས་པ་ཁག་ཅིག་གི་མིང་ཤེས་རྟོགས་བྱུང་བ་གཤམ་གསལ།

༡༽ རྨུ་ཚ་ཚང་ཚེ་བརྟན། ༢༽ རིས་ཆུང་ཉི་གྲགས། ༣༽ བསམ་འཕེལ་ནོར་བུ། ༤༽ ཨོ་ཡོ་ཚེ་རིང༌། ༥༽ ཨ་བརྟན། ༦༽ ག་དགེ་བཅས་ཡིན་འདུག་པ་དང༌། ༡༽བྱམས་པ་དང༌། ༢༽འགྱུར་མེད། ༣༽བྱང་ཆུབ་ཆོས་འཕེལ། ༤༽དོན་དགའ་བཅས་ལ་གཅར་བརྡུང་ཚད་ལས་འདས་པ་བཏང་སྟེ་ད་ལྟ་གློད་བཀྲོལ་ཟིན་ཡོད་འདུག

འཛིན་བཟུང་བྱས་པ་གཞན་རྣམས་ཀྱི་མིང་ཤེས་རྟོགས་བྱུང་མི་འདུག སྤྱིར་བཏང་སྐྱབས་ཆེ་དགོན་དུ་རྒྱ་དམག་གནས་སྡོད་བྱས་ནས་ཟླ་གཅིག་ལྷག་འགྲོ་བཞིན་ཡོད་འདུག་ཅིང་དུས་ཚོད་དེའི་རིང་སེར་མོ་བ་རྐང་གཅིག་ཀྱང་སྡོད་མཁན་མེད་པ་ཆགས་ཡོད་འདུག་ལ་ད་ལྟའི་ཆར་རྒྱ་དམག་མོ་ཊ་ཆེ་བ་ ༨ དང་ཆུང་བ་ ༨།༩ ཙམ་རྒྱུན་སྡོད་བྱེད་བཞིན་ཡོད་འདུག སྐྱབས་ཆེ་དགོན་གསར་བཞེངས་གྲུབ་ནས་ད་ལོ་སྒོ་འབྱེད་བྱ་འཆར་ཡོད་ནའང་ད་ལྟ་གནས་སྟངས་ཛ་དྲག་ངང་ལྷུང་ཡོད་འདུག་པ་མ་ཟད། གྲྭ་པ་རྣམས་དགོན་པར་ཕྱིར་ལོག་མ་བྱས་ཚེ་སྐྱབས་ཆེ་དགོན་དང་དེའི་ཡན་ལག་ཛམ་ལུང་སྒྲུབ་གྲྭ་སོགས་ཡོད་ཚད་རྩ་མེད་དུ་བཟོ་རྒྱུ་ཡིན་པའི་ཉེན་བརྡ་གཏོང་བཞིན་ཡོད་འདུག དགོན་དེར་གྲྭ་ཤག་བརྒྱད་ཅུ་ལྷག་ཡོད་འདུག

ཕྱི་ཚེས་ ༢༧ ཉིན་བོད་མི་རྣམས་འཛིན་བཟུང་བྱས་རྗེས་སྟག་ལུང་དགོན་གྱི་ཡུལ་སྡེ་ནོར་མ་རུ་བ་དང༌། པདྨ་སྨད་པའི་ཕྱོགས་ཀྱི་མི་མང་པོ་འདུ་འཛོམས་ཀྱིས་བོད་མི་འཛིན་བཟུང་བྱས་པ་རྣམས་གློད་བཀྲོལ་གཏང་རོགས་ཞེས་ཞུ་སྐུལ་ཆེད་ཉིན་ཤས་རིང་སྐྱབས་ཆེ་དགོན་ཕྱོགས་སུ་ཕྱིན་ཡོད་འདུག་ཀྱང་རྒྱ་དམག་གིས་མེ་མདའ་གང་བྱུང་འཕངས་ཏེ་བོད་མི་རྣམས་ཉེ་ས་ལ་ཡོང་བཅུག་གི་ཡོད་མི་འདུག ད་དུང་དེ་རིང་ཕྱི་ཚེས་ ༣༠ ཙམ་ནས་གོང་གསལ་ས་གནས་ཁག་གི་བོད་མི་མང་པོ་ཞིག་འཇོ་མདའ་རྫོང་དུ་འགྲོ་ནས་གཙོ་བོ་བོད་མི་ལས་བྱེད་གཉིས་དང་གཞན་རྣམས་གློད་བཀྲོལ་ཡོང་བའི་ཞུ་འབོད་བྱ་འཆར་ཡོད་འདུག

ད་དུང་གནས་མདོ་དགོན་པ་དང༌། གཏེར་སྟོན་དགོན་པ། རྒྱུ་ནེ་དགོན་པ་བཅས་ཀྱི་སྒྲུབ་བླ་ཁག་ཅིག་ལ་མེ་མདའ་ཁུར་བཅུག་ནས་རྒྱ་དམག་མཉམ་པར་ལེན་ཡང་བྱས་ཡོད་འདུག ཉེ་ཆར་ཉིན་ ༡༥ ཙམ་གྱི་སྔོན་ནས་བཟུང་གནས་མདོ་ཆུས་ཁོངས་ཀྱི་དུད་མི་རེ་བསྐོང་ཚོགས་ཀྱིས་ཏཱ་ལའི་བླ་མ་དང༌། རྒྱལ་བ་ཀརྨ་པ། སྐྱབས་ཆེ་དགོན་པ་བཅས་ལ་དགག་པ་རྒྱག་དགོས་སྐོར་བཤད་ཀྱི་ཡོད་འདུག

གཞན་འཇོ་མདའ་ཁོངས་འཇོ་ཕུ་དགོན་པའི་ཉེ་འགྲམ་གྱི་ས་ཆ་ཞིག་ལ་ལྕགས་རི་བསྐོར་ནས་བཞག་ཡོད་པ་རྣམས་རྒྱ་གཞུང་ལ་དགོས་སྐད་བཤད་པར་བརྟེན་ཁ་སང་ཕྱི་ཚེས་ ༢༩ ཉིན་བོད་མི་ ༥༠༠ ཙམ་གྱིས་དགོན་པའི་ས་ཆ་བཙན་འཕྲོག་བྱས་ན་མི་འགྲིག་པའི་སྐོར་གྱི་སྐད་འབོད་བྱས་པར་རྒྱ་དམག་ ༨༠༠ ཙམ་གྱིས་བཀག་འགོག་བྱས་ཡོད་འདུག སྤྱིར་བཏང་འཇོ་མདའ་གཡས་གཡོན་དུ་དེ་སྔོན་དམག་སྒར་ཡོད་མི་འདུག་ཀྱང་ད་ལོ་རྒྱ་དམག་གིས་སྟག་གཟིག་ར་མདོ་ཕྱོགས་ནས་ཞིང་ཁ་ཉོས་ཏེ་དམག་སྒར་རྒྱག་རྩིས་བྱེད་བཞིན་ཡོད་འདུག་པ་བཅས། གོང་གསལ་གསར་གནས་འདི་བོད་མི་མང་སྤྱི་འཐུས་ཆབ་སྲིད་སྡེ་ཚན་ནས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་འདི་ག་གསར་ཁང་དུ་༢༠༠༩།༦།༣༠ ཉིན་མཁོ་སྤྲོད་གནང་།།