གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༨ཚེས་༢ཉིན། འདི་ལོའི་ཕྱི་ཟླ་༣པའི་༡༤ཉིན། མཚོ་སྔོན་ཞིང་ཆེན་འབའ་རྫོང་ཤིང་ཁྲི་དགོན་གྱི་དགེ་འདུན་པ་ཚོས་དབུ་ཁྲིད་དེ་རྒྱ་གཞུང་ལ་ཞི་བའི་ངོ་རྒོལ་བྱེད་སྐབས། ཉེན་རྟོག་པས་འཛིན་བཟུང་བཙན་ཁྲིད་བྱས་པའི་སེར་སྐྱ་མང་པོ་ཀློད་གྲོལ་བཏང་ཡོད་ཀྱང༌། ད་དུང་དགེ་འདུན་པ་འགའ་གར་ཡོད་ཅི་བྱུང་མེད་པར་གྱུར་འདུགཁ་སང་ཕྱི་ཚེས་༡ཉིན། བྷེལ་ཇམ་དུ་གནས་སྡོད་བྱས་ཡོད་པའི་ཕ་ཡུལ་འབའ་རྫོང་ནས་ཡིན་པ་རྒྱ་མཚོ་ཟེར་བ་ཞིག་གིས་འདྲ་པར་ཞིག་མཁོ་སྤྲོད་གནང་བ་བསྟུན། འབའ་ཤིང་ཁྲི་དགོན་ནས་འཛིན་བཟུང་བྱས་པའི་དགེ་འདུན་པ་གཉིས་ལ་ཁྲིམས་ཐག་བཅད་ཡོད་པ་དང༌། དེ་མིན་ལྔ་གར་ཡོད་ཅི་བྱུང་མེད་པར་གྱུར་ཡོད་པའི་སྐོར་འགྲེལ་བརྗོད་གནང་དོན།
འདྲ་པར་སྟེང་གི་དགེ་འདུན་པ་དེ་འབའ་ཤིང་ཁྲི་དགོན་གྱི་རང་ལོ་༢༩ཡིན་པ་ཐུབ་བསྟན་ཡེ་ཤེས་ལགས་ཡིན་ལ། ཁོང་འབང་རྫོིང་ཐུན་ཏེ་སྡེ་བ་ནས་ཡིན་པ་དང༌། ཁོང་གི་ཕ་མིང་ལ་མཁའ་འགྲོ་སྐྱབས་དང༌། མ་མིང་ལ་མཁའ་ཁོ་ཟེར་བ་དང༌། མིང་སྲིང་བདུན་ཡོད་འདུག ད་ལོ་ཕྱི་ཟླ་༣ཚེས་༡༤ཉིན་སྲིད་གཞུང་ལ་ངོ་རྒོལ་ལས་འགུལ་སྤེལ་སྐབས་སྣེ་འཁྲིད་པ་ཡིན་པའི་ཉེས་མིང་གཡོགས་སྟེ། རྒྱ་གཞུང་ཉེན་རྟོག་པས་ཁོང་འཛིན་བཟུང་བཙན་ཁྲིད་བྱས་ཏེ་གར་ཡོད་ཅི་བྱུང་མེད་པར་གྱུར་ཡོད་འདུག
རྒྱ་མཚོ་ལགས་ཀྱིས་མུ་མཐུད་འགྲེལ་བརྗོད་གནང་བ་ལྟར་ན། གཞན་ཡང༌། སྐབས་དེར་འཛིན་བཟུང་བྱས་པའི་ཤིང་ཁྲི་དགོན་གྱི་དགེ་འདུན་པ་འཇམ་དཔལ་བཟང་པོ་དང་ཀུན་བཟང་རང་གྲོལ་གཉིས་ལ་ལོ་གཅིག་ལྷག་རེས་ཁྲིམས་ཆད་བཅད་ཡོད་པ་དང༌། རྒྱ་གཞུང་གིས་ཉེས་པ་ཚབས་ཆེ་ཤོས་རུ་རྩིས་པའི་ཡེ་ཤེས་རྡོ་རྗེ་དང་བསྟན་འཛིན་རང་ཤར། ཚུལ་ཁྲིམས་རིན་ཆེན། བློ་བཟང་བཅས་ད་ལྟའི་ཆར་གར་ཡོད་ཅི་བྱུང་མེད་པར་གྱུར་ཡོད་པས། ཁྱིམ་མི་གཉེན་འབྲེལ་ཚོས་སེམས་ཁུར་ཆེན་པོ་བྱེད་བཞིན་ཡོད་འདུག
གོང་བརྗོད་དགེ་འདུན་པ་ཚོའི་འདྲ་པར་དང་ཕ་མའི་མིང་སོགས་གནས་ཚུལ་ཞིབ་ཕྲ་འཚོལ་ཞིབ་བྱས་ཡོད་ཀྱང༌། རྒྱ་གཞུང་གི་དམ་དྲག་འོག་ལག་སོན་བྱུང་མེད་པའི་སྐོར་འགྲེལ་བརྗོད་གནང་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས།
