གསར་འགྱུར། 
ཁམས་ལི་ཐང་རྫོང་འགྲམ་སྣ་ཤང་རྫི་པ་གྲོང་དུ་༢༠༠༨ ལོ་ནས་རྒྱ་ནག་གཞུང་གིས་རྒྱལ་གཅེས་ཆོས་གཅེས་ཞེས་པའི་ལས་འགུལ་ཐེངས་མང་སྤེལ་བར་མི་མང་གིས་དང་ལེན་བྱས་མེད་པ་དང༌། ཟླ་འདིའི་ཚེས་༡ དང་ཚེས་༢ ཉིན་སླར་ཡང་རྒྱ་ནག་གཞུང་གི་ལས་བྱེད་དང་ཉེན་རྟོག་པ་ཡོང་ནས་ས་གནས་ཁག་གསུམ་དུ་མི་མང་བསྡུ་སྐོང་བྱས་ཏེ། རྒྱལ་གཅེས་ཆོས་གཅེས་ཞེས་པའི་ལས་འགུལ་གྱི་མིང་འོག་ནས་༧གོང་ས་མཆོག་ལ་མཚན་སྨད་ཞུ་དགོས་པའི་བཙན་བཀའ་བཏང་བ་མི་མང་གིས་དང་ལེན་མ་བྱས་པར་བརྟེན། ཉེན་རྟོག་པས་མི་མང་ལ་གཅར་རྡུང་དང་བོད་ཆས་གྱོན་མཁན་ཚོར་བོད་ཆས་གྱོན་དགོས་དོན་འདྲི་བརྩད་ཀྱིས་གཙབ་ཧྲལ་བཏང་བ་སོགས་བྱས་ཏེ། བོད་མི་ཁག་ཅིག་ལ་རྨས་སྐྱོན་ཐེབས་ཡོད་པ་དང༌། མི་༡༠ཙམ་ལི་ཐང་རྫོང་འགྲམ་སྣ་ཤང་ཐོག་ཏུ་བཀག་ཉར་བྱས་ཡོད་པ་དང་། དེ་དག་གི་ནང་ནས་རྨས་སྐྱོན་ཚབས་ཆེན་ཐེབས་པ་གཉིས་ད་ལྟ་ལི་ཐང་རྫོང་སྨན་ཁང་དུ་སྨན་བཅོས་བྱེད་བཞིན་ཡོད་འདུག ད་ལྟའི་ཆར་ས་གནས་དེར་དམག་མིའི་རླངས་འཁོར་༧ལྷག་འབྱོར་ནས་དམ་དྲག་ཆེན་པོ་བྱེད་བཞིན་ཡོད་འདུག
ཡང་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་འགྲེལ་བརྗོད་གནང་བ་ལྟར་ན། ཕྱི་ལོ་༢༠༧ལོར་རྒྱ་གཞུང་གིས་འཛིན་བཟུང་བཙོན་འཇུག་བྱས་པའི་རོང་རྒྱས་ཨ་གྲགས་ལགས་ལ། བཙོན་སྲུང་བ་ཚོས་རྒྱུན་དུ་ཉེས་རྡུང་མནར་གཅོད་བཏང་རྐྱེན་རྣ་བའི་དབང་པོ་ཉམས་པ་མ་ཟད། མིག་གཅིག་གིས་གསལ་པོ་མི་མཐོང་བ་དང་རྐང་པ་ཡང་ནད་པར་གྱུར་ནས་ཡར་ལངས་མི་ཐུབ་པ་སོགས་སྐུ་གཟུགས་གནས་སྟངས་ཧ་ཅང་ཛ་དྲག་ཏུ་གྱུར་ཡོད་འདུག
