གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༨ཚེས་༡༠ཉིན། བཞུགས་སྒར་དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང༌ཀ་ཉག་ཚེ་རིང་ལགས་རྣམ་གཉིས་ཀྱིས་གནས་ཚུལ་འགྲེལ་བརྗོད་གནང་གསལ་ལྟར་ན། དེ་རིང་སྔ་དྲོའི་བོད་ནང་གི་ཆུ་ཚོད་ ༡༠།༡༥ ཙལ་ལ་བོད་མདོ་སྨད་རྔ་པ་རྫོང་རྨེའུ་རུ་མ་ཞང༌། རུ་ཆེན་དང་པོའི་ཉག་སྐོར་མའི་ཕ་དཔའ་ལོ་དང༌། མ་མ་སྒྲོན་གཉིས་ཀྱི་བུ་གཅོད་པ། རང་ལོ་ ༢༤ ཙམ་ཡིན་པ་ཁོང་གིས་རྨེའུ་རུ་མའི་ཞང་ཐོག་ཏུ་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ། མེ་ལྕེ་དྲག་པོའི་ཀློང་དུ་ངོ་རྒོལ་སྐད་འབོད་བྱས་ཡོད་པ་དང༌། སྐར་མ་ཁ་ཤས་རྗེས་ས་གནས་ཉེན་རྟོག་པ་འབྱོར་ཏེ། ཁོང་གི་ལུས་ཀྱི་མེ་བསད་དེ་བཙན་ཁྲིད་བྱས་ཡོད་འདུག
དངོས་སུ་མཐོང་མཁན་ཁག་ཅིག་གིས་བརྗོད་པ་ལྟར་ན། སྐབས་ཐོག་དེར་འདས་གྲོངས་སུ་གྱུར་ཡོད་མེད་གསལ་པོ་མ་ཤེས་ཀྱང་མེས་ཚིག་པའི་རྨས་སྐྱོན་ཧ་ཅང་ཚབས་ཆེན་ཡིན་སྟབས། གསོན་པའི་རེ་བ་གཏན་ནས་མེད་ཚུལ་བརྗོད་འདུག གནས་ཚུལ་བྱུང་མ་ཐག་ནས་རྨེའུ་རུ་མའི་ཞང་ཐོག་ཡོངས་སུ་དྲག་ཆས་ཉེན་རྟོག་པ་སོགས་ཀྱིས་ཁེངས་ནས་དམ་དྲག་ཤུགས་ཆེན་བྱས་འདུག
ཡང་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། དེ་རིང་གི་རང་ལུས་མེར་སྲེག་གི་གནས་ཚུལ་འབྱུང་རྗེས། ས་གནས་དེར་ཡོད་པའི་བོད་མིའི་ཟ་ཁང་དང་ཚོང་ཁང་ཚང་མ་སྒོ་བརྒྱབ་ཡོད་འདུག་ལ། རྒྱ་གཞུང་གིས་དམག་མི་དང་ཉེན་རྟོག་པས་དམ་དྲག་ཤུགས་ཆེ་བྱེད་བཞིན་ཡོད་པར་བརྟེན། སྲང་ལམ་དུ་བོད་མི་རྣམས་འགྲོ་བསྐྱོད་མི་ཐུབ་པ་ཆགས་ཡོད་འདུག
རྨེའུ་རུ་མ་ནི་རྔ་པ་རྫོང་ཁོངས་ཀྱི་འབྲོག་སྡེ་ཞིག་ཡིན་ཞིང་། རྔ་པ་རྫོང་མཁར་ནས་ཤར་ཕྱོགས་སུ་སྤྱི་ལེ་ ༢༧ གྱི་སར་ཡོད། ཕྱི་ལོ་ ༡༩༥༩ ལོའི་ཡར་སྔོན་དུ་འབྲོག་སྡེ་འདིར་སྡེ་བ་ཆེན་པོ་བརྒྱད་ཡོད་ཀྱང་དེང་སྐབས་རུ་ཆེན་ལྔ་ལ་བགོས་ཡོད། རུ་ཆེན་དང་པོ་ལ་ཉག་སྐོར་མ་དང་ཨ་འབུས་རོ་ཞེས་པའི་སྡེ་བ་གཉིས་ཡོད། རྒྱ་གཞུང་གིས་བཤད་པ་ལྟར་ན་ཕྱི་ལོ་ ༢༠༠༠ ལོར་ ཉག་སྐོར་མ་ལ་དུད་ཁྱིམ་ ༡༡༦ དང་མི་གྲངས་ ༥༤༦ ཡོད་འདུག རྨེའུ་རུ་མ་སྤྱི་ཡོངས་ལ་རྒྱ་གཞུང་གིས་བཤད་པ་ལྟར་ན་ཕྱི་ལོ་ ༢༠༠༠ ལོར་མི་གྲངས་ ༣༩༢༡ དང། ས་ཁྱོན་སྤྱི་ལེ་གྲུ་བཞི་མ་ ༧༣༥ ཡོད་འདུག
