གསར་འགྱུར། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༡༠ཚེས་༢༩ཉིན། ཟླ་འདིའི་ཕྱི་ཚེས་༢༥ཉིན་བོད་མདོ་སྨད་རྨ་ཆུ་མུ་ར་དགོན་པའམ་རྨ་ཡུལ་ཆོས་འཁོར་གླིང་གི་གྲྭ་སྦྱིན་པ་ལགས་གློ་བུར་རྒྱ་གཞུང་གིས་འཛིན་བཟུང་བཙན་འཁྲིད་བྱས་ཡོད་པའི་གནས་ཚུལ་ཐོན་འདུག བཞུགས་སྒར་དྷ་རམ་ས་ལར་གནས་བཞུགས་ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་འདི་གའི་གསར་ཁང་ལ་གནས་ཚུལ་མཁོ་སྤྲོད་གནང་གསལ་ལྟར་ན། ཟླ་འདིའི་ཕྱི་ཚེས་༢༥རེས་གཟའ་ཕུར་བུའི་ཉིན་བོད་མདོ་སྨད་རྨ་ཆུ་མུ་ར་ངག་སྐོར་སྡེ་པའི་ནོར་ཕུན་ཚང་གི་ལོ་ན་༣༨ཡིན་པའི་གྲྭ་སྦྱིན་པ་ལགས་རྒྱ་ནག་གི་གྲོང་ཁྱེར་ཁྲན་ཏུང་དུ་གློ་བུར་ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ། ད་ཆ་ཁོང་གང་ཞིག་ཏུ་བཀག་ཉར་བྱས་ཡོད་མེད་སོགས་ཀྱི་ཤེས་རྟོགས་མེད་པའི་གནས་ཚུལ་ཆགས་ཡོད་འདུག
ཡང་ཁོང་གིས་འགྲེལ་བརྗོད་གནང་གསལ་ལྟར་ན། རྒྱ་ནག་གཞུང་གིས་གྲྭ་སྦྱིན་པ་ལགས་ནི་དེ་སྔོན་ཕྱི་ལོ་༢༠༠༨ལོའི་བོད་ནང་ཞི་བའི་ངོ་རྒོལ་གྱི་གནས་ཚུལ་ཕྱི་ཕྱོགས་སུ་མཁོ་སྤྲོད་བྱེད་མཁན་དང་། རྒྱལ་ཁབ་ཀྱི་གསང་བ་ཕྱིར་སྒྲོག་བྱེད་མཁན་ཞིག་ཡིན་པའི་ཉེས་འཛུགས་དོགས་གཞི་འོག སྔ་ཕྱིར་ཐེངས་མང་འཛིན་བཟུང་བཀག་ཉར་བྱས་ཡོད་འདུག
གྲྭ་སྦྱིན་པ་ལགས་ནི་རྒྱུན་དུ་དགོན་པའི་ནང་འདོན་ཡོན་ཏན་གང་གི་ཆ་ནས་ཀྱང་ཚང་མས་བསྟོད་བསྔགས་བྱེད་ས་ཞིག་ཡིན་འདུག་ཅིང་། ཁོང་གི་ནང་མི་ཉེ་འབྲེལ་དང་མང་ཚོགས་བཅས་ནས་ད་ཐེངས་ཁོང་ལ་དུས་བཀག་བཙོན་འཇུག་གི་ཁྲིམས་ཐག་བཅད་སྲིད་པའི་སེམས་ཕྲལ་དང་བློ་འཚབ་སྐྱེ་བཞིན་ཡོད་འདུག
ད་ཆར་མུ་ར་ས་ཆར་རྒྱ་ནག་གཞུང་གིས་དམག་མི་མང་པོ་འགྲེམས་འཇོག་བྱས་ནས། སློབ་གྲྭ་ཁག་ལའང་དམ་དྲག་ཤུགས་ཆེ་བྱས་ནས། ཁྱིམ་བདག་དང་སློབ་མ་དབར་ཐུག་འཕྲད་ལ་བཀག་སྡོམ་དང་། ཁ་པར་ཚུན་པའི་བརྒྱུད་ལམ་ཁག་ཡོངས་སུ་བཀག་སྡོམ་གྱིས། བོད་མི་རྣམས་ཕར་འགྲོ་ཚུར་འོངས་བྱེད་པར་ཞིབ་བཤེར་སོགས་དམ་བསྒྲགས་ཤུགས་ཆེ་བྱེད་བཞིན་ཡོད་འདུག
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་སངས་རྒྱས།
