གསར་འགྱུར། 
ཟླ་འདིའི་ཚེས་༨ཉིན་རྨ་ཁ་མེད་པའི་གཅར་རྡུང་ཞེས་པའི་རྡུང་ལེན་པ་བཀྲ་ཤིས་དོན་གྲུབ་ཟི་ལིང་གྲོང་ཁྱེར་གྱི་བཙོན་ཁང་ཞིག་ནས་གློད་གྲོད་བཏང་ཡོད་པའི་གནས་ཚུལ་ཐོན་འདུགདེ་ཡང་གསར་ལམ་ཁག་ནས་གནས་ཚུལ་སྤེལ་བ་ལྟར་ན། ཚེས་༨ ཉིན་གྱི་ཞོགས་པ་གློད་གྲོལ་བཏང་རྗེས། དགོང་མོ་ཁོང་གི་ཕ་ཡུལ་མཚོ་སྔོན་ཞིང་ཆེན་རྨ་ལྷོ་ཁུལ་སོག་རྫོང་དུ་འབྱོར་ཞིང། ལམ་བར་དུ་བོད་མི་མང་པོས་དགའ་བསུའི་ཁ་གཏགས་བསྒྲོན་ནས་བསུ་བ་བྱས་པ་མ་ཟད། ཁོང་ཉིད་ཀྱི་ཕ་ཡུལ་རྨ་ལྷོ་སོག་རྫོང་དུ་འབྱོར་སྐབས་ཁོང་གི་གྲོགས་པོ་དང། གཉེན་ཉེ་སོགས་ཀྱིས་དགའ་བསུ་ཟབ་རྒྱས་བྱས་ཡོད་འདུག
གཞས་པ་བཀྲ་ཤིས་དོན་གྲུབ་ནི། ཕྱི་ལོ་༢༠༠༩ ལོའི་ཕྱི་ཟླ་༡༢ ཚེས་༣ ཉིན་ཟི་ལིང་དུ་ཟ་ཁང་ཞིག་ནས་རྨ་ལྷོ་ཡུལ་རྒན་རྫོང་གི་ཉེན་རྟོག་པས་འཛིན་བཟུང་བྱས། དེ་རྗེས་རྨ་ལྷོ་སོག་རྫོང་ཁྲིམས་ཁང་གིས་ཆབ་སྲིད་ཀྱི་ནང་དོན་འདྲེས་ཡོད་པའི་ཉེས་འཛུག་འོག་དུས་ཡུན་ལོ་ ༡ དང་ཟླ་བ་༧བཙོན་འཇུག་བྱ་རྒྱུའི་ཁྲིམས་ཐག་བཅད་ཡོད་པ་རེད།
ཕྱི་ལོ་༢༠༠༨ ལོར་གཞས་པ་བཀྲ་ཤིས་དོན་གྲུབ་ལགས་དང་གྲོགས་པོ་འགས་བཏོན་པའི་༼གཡུ་མཚོ་སྔོན་མོའི་རླབས་སྒྲ་༽དང་༼རྨ་ཁ་མེད་པའི་གཅར་རྡུང་༽ཞེས་པའི་འོད་སྡེར་དེ་དག་ནང་གཞས་ཚིག་ཆབ་སྲིད་ཀྱི་ནང་དོན་འདྲེས་ཚུལ་བསྙད་དེ་འགྲེལ་སྤེལ་བཀག་སྡོམ་ཁོང་ཉིད་འཛིན་བཟུང་བྱས་པ་ཞིག་རེད། རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༡ཟླ་༢ཚེས་༡༡ཉིན།
