གསར་འགྱུར། 
འདི་ལོའི་ཟླ་༩ཚེས་༢༥ཉིན། རང་ལོ་༡༩ཙམ་ཡིན་པའི་ཁམས་འཇོ་མདའ་རྫོང་གི་ན་གཞོན་གཞས་པ་ཆོས་མགོན་ལགས་རྒྱ་གཞུང་གིས་འཛིན་བཟུང་བྱས་ཡོད་འདུགབཙན་བྱོལ་བོད་མིའི་སྒྲིག་འཛུགས་ཀྱི་དྲ་བ་ལས་གནས་ཚུལ་སྤེལ་ལྟར་ན། གཞས་པ་ཆོས་མགོན་ལགས་ནི་སྐྱེས་ཡུལ་ཁམས་འཇོ་མདའ་རྫོང་ཁོངས་ནས་ཡིན་ཞིང༌། མང་ཚོགས་ནས་ཁོང་གིས་བཏང་བའི་གཞས་ལ་ཧ་ཅང་དགའ་མོས་བྱེད་བཞིན་ཡོད་པ་མ་ཟད། ཡོངས་གྲགས་སུ་གཞས་པ་ཀུན་དགའ་ཆུང་བ་ཞེས་འབོད་སྲོལ་ཡང་ཡོད་འདུག ན་གཞོན་གཞས་པ་ཆོས་མགོན་ལགས་ནི་ལོ་ན་ཤིན་ཏུ་ཆུང་ངུ་ཡིན་ནའང་ཁོང་གིས་བཏང་བའི་གླུ་གཞས་ཁག་ལ་མང་ཚོགས་ཁྲོད་དུ་ཧ་ཅང་དགའ་མོས་ཆེན་མོ་བྱེད་བཞིན་ཡོད་སྟབས། དེ་སྔ་ནས་ས་གནས་འབྲེལ་ཡོད་ཚན་པས་ཁོང་ལ་དོགས་གཞི་བྱ་ཡུལ་ཞིག་ཏུ་གྱུར་ཡོད་འདུག
ཉེ་དུས་ཁོང་ཁམས་ནས་ལྷ་ས་བརྒྱུད་གླུ་གཞས་འགྲན་ཚོགས་ཤིག་ཏུ་མགྲོན་འབོད་བྱུང་བ་ལྟར་རྒྱལ་ས་ལྷ་སར་འབྱོར་སྐབས་གློ་བུར་འཛིན་བཟུང་བྱས་པའི་གནས་ཚུལ་ཐོན་ཡོད་པར་བརྟེན། འབྲེལ་ཡོད་ཚོས་ད་ལྟ་བར་རྩད་གཅོད་བྱས་ཀྱང་ཁོང་བཙོན་ཁང་གང་ཞིག་ཏུ་བཀག་ཉར་བྱས་ཡོད་མེད་སོགས་ཀྱི་གནས་སྟངས་གང་ཡང་ཤེས་རྟོགས་མེད་པར་གྱུར་ཡོད་འདུག རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༡ཟླ་༡༠ཚེས༡༢ཉིན།
