དཔྱད་བརྗོད། 
རྒྱལ་སྤྱིའི་བོད་ཀྱི་ཆ་འཕྲིན་དྲ་བས་ཕྱི་ལོ་༢༠༠༩ལོའི་ཟླ་༩པའི་ཚེས་༡༨ཉིན་སྤེལ། ཨ་རིའི་རྒྱལ་ས་ཝ་ཤིན་ཊོན་ནང་རྟེན་གཞི་བྱས་ཡོད་པའི་ཨ་རིའི་མང་གཙོ་ཐེབས་རྩ་ནེ་ཌི་ཞེས་པའི་ལྷོ་ཨེ་ཤ་ཡའི་སྡེ་ཚན་གྱི་ལས་འཆར་དོ་དམ་པ་སྐུ་ཞབས་ཝལ་སོན་ལིའི་ལགས་བཞུགས་སྒར་དྷ་སར་གཟིགས་སྐོར་དུ་སླེབས་ཡོད་པ་དང་སྟབས་བསྟུན་ཏེ། འདི་ག་གསར་ཁང་གིས་ཁོང་ལ་ཨ་རིའི་མང་གཙོ་ཐེབས་རྩ་ཚོགས་པ་དང༌། ཚོགས་པ་དེས་བོད་ཀྱི་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ལ་རོགས་སྐྱོར་བྱེད་དོན་སྐོར་བཅར་འདྲི་རགས་ཙམ་ཞུས་པ་གཤམ་གསལ།
༡༽ཨ་རིའི་མང་གཙོ་ཐེབས་རྩ་ཚོགས་པས་བོད་ཀྱི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་པ་ཁག་ལ་རོགས་སྐྱོར་བྱེད་པའི་ལས་དོན་གཙིགས་ཆེན་དུ་འཛིན་དགོས་དོན་གང་ཡིན་ནམ།
ཨ་རིའི་མང་གཙོ་ཐེབས་རྩ་ཚོགས་པས་མང་གཙོའི་རིན་ཐང་དང་འགྲོ་བ་མིའི་ཐོབ་ཐང་ལ་ཡིད་ཆེས་གོང་བཀུར་དང༌། དེ་བཞིན་གོང་སྤེལ་གྱི་ལས་འཇུག་གནང་མཁན་་ཚོགས་པ་སྒྲིག་འཛུགས་ཁག་ལ་རྒྱབ་སྐྱོར་རོགས་འདེགས་གནང་གིན་ཡོད་ཅིང༌། བོད་མིའི་སྒེར་ལངས་ལས་འགུལ་དག་འདིའི་ཐད་ཀྱི་དཔེ་མཚོན་ཁྱད་པར་ཅན་ཞིག་ཆགས་བསྡད་འདུག གང་ཡིན་ཞེ་ན། ཕུགས་རྒྱང་རིང་ཞིང་བྱམས་སྙིང་རྗེ་ཆེ་བའི་ྋགོང་ས་ཏཱ་ལའི་བླ་མ་མཆོག་གི་དབུ་ཁྲིད་འོག་གི་འཚེ་མེད་ཞི་བའི་ལས་འགུལ་དེ་འཛམ་གླིང་མང་གཙོའི་འཐབ་རྩོད་ལ་དགོས་གལ་ཆེན་པོ་འདུག
བོད་མིའི་སྒེར་ལངས་ལས་འགུལ་གྱི་ཐུན་མོང་མ་ཡིན་པའི་ཁྱད་ཆོས་གཞན་ཞིག་ནི། བཙན་བྱོལ་བོད་གཞུང་གིས་རང་དབང་མང་གཙོའི་ལམ་སྲོལ་གྱི་སྒྲིག་གཞི་ལྟར་ལས་དོན་ཁག་ཕྱག་བཞེས་ཡང་དག་གནང་བཞིན་ཡོད་པ་མ་ཟད། བོད་མི་རིགས་ལ་མང་གཙོའི་ཐོབ་ཐང་དང་རིན་ཐང་ཐད་ཀྱི་ཤེས་རྟོགས་ལྡན་པ་དེ་རེད།
དེང་གི་འཆར་རྒྱ་ནག་གཞུང་འཛམ་གླིང་ཐོག་ཁ་རྒྱལ་དབང་ཐང་ཆེ་སྟབས། བོད་ཀྱི་ཆབ་སྲིད་ལས་འགུལ་ལ་རྒྱབ་སྐྱོར་རོགས་རམ་བྱེད་མཁན་གྱི་ཚོགས་པ་ཉུང་ཉུང་རེད། འོན་ཏེ་བོད་མི་རིགས་ལྟ་བུའི་རང་དབང་མང་གཙོ་ལ་འཚེ་མེད་ཞི་བའི་ལམ་ནས་འཐབ་རྩོད་གནང་མཁན་གྱི་མི་རིགས་ལ་རྒྱབ་སྐྱོར་རོགས་རམ་བྱེད་རྒྱུ་ནི་ང་ཚོའི་ཚོགས་པའི་མཐར་ཐུག་གི་དགོས་དམིགས་གཙོ་བོ་ཡིན། ཞེས་བརྗོད་བྱུང༌།
༢༽རྒྱ་ནག་གཞུང་གིས་ཨ་རིའི་སྲིད་གཞུང་གིས་ཨ་རིའི་མང་གཙོ་ཐེབས་རྩ་ཚོགས་པ་བརྒྱུད་གཞུང་གི་སྲིད་བྱུས་ཁག་གི་དགོས་དོན་སྐོང་གིན་འདུག་ཟེར། གནད་དོན་འདིའི་ཐད་ཁྱོད་ལ་དགོངས་ཚུལ་ག་རེ་ཡོད་དམ།
ཨ་རིའི་མང་གཙོ་ཐེབས་རྩ་ཚོགས་པ་ལ་ཨ་རིའི་གྲོས་ཚོགས་ནས་རོགས་དངུལ་རག་གིན་ཡོད་པ་བདེན་མོད། ང་ཚོ་ནི་ཨ་རིའི་གཞུང་གི་ལས་སྡེ་ཆ་ཤས་ཤིག་མ་ཡིན་པར་རང་ཐག་རང་གཅོད་ཀྱི་ཁྱད་དབང་ལྡན་པའི་གཞུང་འབྲེལ་མིན་པའི་ཚོགས་པ་ཞིག་ཡིན། ང་ཚོས་ཨ་རིའི་གཞུང་གི་སྲིད་བྱུས་ལ་རྒྱབ་སྐྱོར་དང་རྗེས་འབྲང་བྱེད་ཀྱིན་མེད་པ་དཔེར་ན། སྲིད་འཛིན་ཨོ་བྷ་མ་མཆོག་གིས་ྋགོང་ས་ཏཱ་ལའི་བླ་མར་མཇལ་འཕྲད་གནང་གིན་མེད་པ་སོགས་ཨ་རིའི་གཞུང་གིས་ཨ་རྒྱ་གཉིས་ཀྱི་འབྲེལ་ལམ་ཐད་གཟབ་བཞེས་དང་བག་ཟོན་བྱེད་ཀྱིན་ཡོད་ཀྱང༌། ཨ་རིའི་མང་གཙོ་ཐེབས་རྩ་ཚོགས་པས་དེ་ལ་ངོ་རྒོལ་བྱེད་བཞིན་ཡོད། གཞན་ཡང་རྒྱ་ནག་གཞུང་གིས་ཡོ་རོབ་ཤར་མའི་རྒྱལ་ཁབ་དག་ནང་བྱུང་བའི་ཚོན་མདོག་གསར་བརྗེ་ལས་འགུལ་སོགས་ཀྱི་མི་མང་འོས་ལངས་ལས་འགུལ་ལ་ཨ་རིའི་མང་གཙོ་ཐེབས་རྩ་ཚོགས་པས་རོགས་དངུལ་གྱི་རྒྱབ་སྐྱོར་བྱས་ཡོད་པར་ངོས་འཛིན་བྱེད་བཞིན་འདུག འོན་ཏེ་གྱེན་ལངས་ལས་འགུལ་དེ་དག་ནི་ཡུལ་དེའི་མང་ཚོགས་རང་ངོས་ནས་སྐུལ་སློང་དང་རྩ་འཛུགས་བྱས་པ་ཞིག་ལས་ང་ཚོ་དང་འབྲེལ་བ་གཏན་ནས་མེད། ཅེས་བརྗོད་སོང༌།
