གསར་འགྱུར། 
དེ་ཡང་ཡོ་རོབ་ཀྱི་རྒྱལ་ཁབ་ཨི་ཊ་ལིའི་གྲོང་ཁྱེར་ Milano མེ་ལཱ་ནོའི་ནང་རྟེན་གཞི་བྱས་ཡོད་པའི་དགེ་འཕེལ་གླིང་བོད་ཀྱི་སློབ་གཉེར་ཁང་གིས་ཇི་ལྟར་གསོལ་འདེབས་ཞུས་པ་ལྟར་ཟླ་འདིའི་ཕྱི་ཚེས་ ༢༧ ཉིན་ཨ་སི་ཁོ་ཚོགས་ཁང་ཆེན་མོའི་ནང་ཨི་ཊ་ལི་གཙོ་བོར་གྱུར་བའི་འཛམ་གླིང་གི་ཡུལ་གྲུ་ཁག་འདྲ་མིན་ནས་དད་ལྡན་ཆོས་ཞུ་བ་ཁྱོན་མི་གྲངས་ ༨༠༠༠ ཙམ་ལ་༧གོང་ས་སྐྱབས་མགོན་ཆེན་པོ་མཆོག་ནས་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཀའ་ཆོས་གནང་ཡོད།
སྐབས་དེར་མགོན་པོ་གང་ཉིད་ཀྱིས། དེ་རིང་འདིར་ཆོས་འབྲེལ་བྱ་རྒྱུ་བྱུང་བ་རེད། ཁྱེད་རང་ཚོ་ཚང་མར་འཚམས་འདྲི་ཡོད། འཛམ་གླིང་འདིའི་སྟེང་འཚོ་གནས་བྱེད་མཁན་འགྲོ་བ་མིའི་དལ་འབྱོར་གྱི་མི་ལུས་འདི་ཚེ་སྔོན་མ་གཞན་གྱི་ཆེད་དུ་ལས་དོན་དང་ཚོགས། བསོད་ནམས་བསགས་པ་ལས་བྱུང་བ་ཞིག་རེད།
མི་གཞན་ལ་རང་གིས་ལུས་ངག་ཡིད་གསུམ་ཐོག་ནས་གནོད་པ་བསྐྱལ་ཏེ་དལ་འབྱོར་མི་ལུས་སྒྲུབ་ཐབས་མེད། དེར་བརྟེན་དུས་རྒྱུན་དུ་རང་རྒྱུད་ལ་བྱམས་སྙིང་རྗེ་དང་གཞན་ཕན་ཆེད་སྙིང་སྟོབས་གོང་འཕེལ་བཏང་ནས་ཐེངས་འདིར་ཐོབ་པའི་དལ་འབྱོར་མི་ལུས་འདི་ཆུད་ཟོས་མི་འགྲོ་བ་བྱེད་དགོས། གང་ལ་ཞེ་ན། ང་རང་ཚོའི་བློར་ཉོན་མོངས་དུག་གསུམ་གྱིས་གོམས་འདྲིས་ཐེབས་ཡོད་སྟབས། བྱམས་སྙིང་རྗེ་སོགས་རང་བཞིན་གྱིས་རང་རྒྱུད་ལ་སྐྱེ་རྒྱུ་ཧ་ཅང་ཁག་པོ་ཡིན།
དེར་བརྟེན་སེམས་ལ་སྦྱོང་བརྡར་སྤྲོད་རྒྱུ་ཧ་ཅང་གལ་ཆེན་པོ་རེད། སྡིག་པའི་དབང་གིས་ཉོན་མོངས་དུག་གསུམ་དང་འབྲེལ་བའི་ལས་ཀ་ཡོངས་རྫོགས་དེ་ཙམ་འབད་བརྩོན་བྱེད་དགོས་པར་བསྒྲུབ་ཀྱི་ཡོད། འོན་ཀྱང་གལ་ཆེ་ཤོས་ནི་ཉིན་རེའི་འཚོ་བའི་ནང་བྱམས་བརྩེ་དང་གཞན་ཕན་གཉིས་ཁ་མ་བྲལ་བར་བྱ་རྒྱུ་དེ་གལ་འགངས་ཆེན་པོ་རེད་ཅེས་གསུངས་འདུག
ཕྱི་ཚེས་ ༢༨ ཉིན་གྱི་སྔ་དྲོར་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་ཀྱི་བཀའ་དབང་དང་ཕྱེད་ཡོལ་ཁུལ་དེའི་མང་ཚོགས་ལ་༼བདེ་སྐྱིད་འཚོལ་ཐབས་༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་རེད།
