དཔྱད་བརྗོད། 
རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༠ཟླ་༡༢ཚེས་༡༥ཉིན། རྒྱ་ནག་གི་མི་མང་ཕལ་ཆེར་བ་ཞིག་གིས་འགྲོ་བ་མིའི་ཐོབ་ཐང་གི་ཉིན་མོ་སྟེ་ཕྱི་ཟླ་༡༢ཚེས་༡༠ཉིན་ནི་དམིགས་བསལ་གྱི་ཉིན་མོ་ཞིག་ཏུ་བརྩི་བཞིན་མེད་ལ། ཉིན་མོ་དེར་རྒྱ་གཞུང་གིས་ཕྱི་ཕྱོགས་ཀྱི་གསར་འགྱུར་བརྒྱུད་ལམ་ཁག་ནས་སྐུ་ཞབས་ལིའུ་ཞའོ་པའོ་ལགས་ལ་༢༠༡༠ལོའི་ནོར་བྷེལ་ཞི་བདེ་གཟེངས་རྟགས་ཕུལ་བའི་སྐོར་སོགས་བཀག་སྡོམ་ནན་མོ་བྱས་ཏེ་མི་མང་ལ་མཐོང་དུ་བཅུག་མེད་པ་རེད།
རྒྱ་ནག་གི་ཆབ་སྲིད་གནོན་ཤུགས་འོག་ཨུ་རུ་སུ་དང་པཱ་ཀི་སི་ཐན་སོགས་རྒྱལ་ཁབ་ཁག་ཅིག་ནོར་བྷེལ་ཞི་བདེའི་གཟེངས་རྟགས་འབུལ་བཞེས་ཀྱི་མཛད་སྒོར་མཉམ་ཞུགས་བྱས་མེད་པ་དང། དེ་བཞིན་སྐུ་ཞབས་ལིའུ་ཞའོ་པའོ་ལགས་ལ་རྒྱབ་སྐྱོར་བྱེད་མཁན་རྣམས་ལའང་གནོན་ཤུགས་སྤྲད་པར་བརྟེན། ཁོང་གི་ཚབ་བྱས་ནས་གཟེངས་རྟགས་ལེན་མཁན་གཅིག་ཀྱང་མ་བྱུང་པར་རྐུབ་སྟེགས་སྟོང་པར་ལུས་པ་དེས། རྒྱ་ནག་གི་ཆབ་སྲིད་གནས་སྟངས་མུན་ནག་ཅན་དང་མི་བུའི་རང་དབང་ད་དུང་ལྕགས་སྒྲོག་ཏུ་ཚུད་ཡོད་པ་གསལ་པོར་མཚོན་ཡོད་པ་དང། མཚོན་རྟགས་དེས་དུས་དང་ནམ་པ་ཀུན་དུ་རྒྱལ་སྤྱིའི་སྤྱི་ཚོགས་ལ་སྐུལ་མ་དང༌། འདས་པའི་དུས་སུ་འཇར་མན་གྱི་གསར་འགོད་ཞིག་ལའང་ཆབ་སྲིད་ཀྱི་བཙན་གནོན་འོག་ནོར་བྷེལ་ཞི་བདེ་གཟེངས་རྟགས་འབུལ་བཞེས་ཀྱི་ཉིན་མོར་རྐུབ་སྟེགས་སྟོང་པར་ལུས་པའི་ཡིད་སྐྱོའི་གནད་དོན་དེ་དྲན་གསོ་བྱས་ཡོད་པ་རེད།
ཕྱི་ཟླ་༡༢ཚེས་༡༠ཉིན་མང་གཙོའི་རྒྱལ་ཁབ་ཁག་གིས་ཞི་བདེ་གཟེངས་རྟགས་འབུལ་བཞེས་ཀྱི་ཉིན་མོར་རྟེན་འབྲེལ་ཞུ་བ་ཙམ་མ་ཡིན་པར། འགྲོ་བ་མིའི་རིགས་ཀྱི་ཉིན་མོ་གལ་ཆེན་ཞིག་སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བརྩི་སྲུང་ཡང་བྱེད་ཀྱི་ཡོད་ཀྱང། རྒྱ་ནག་གིས་ཉིན་མོ་འདི་ལོ་རྒྱུས་ཙམ་དུ་འགྱུར་རྒྱུ་དང་སྐུ་ཞབས་ལིའུ་ཞའོ་པའོ་ལ་རྒྱབ་སྐྱོར་བྱེད་མཁན་ཉུང་དུ་འགྲོ་བར་རེ་བ་བྱེད་ཀྱི་ཡོད། ཡིན་ནའང། འཛམ་གླིང་མི་མང་གིས་མུ་མཐུད་དུ་རྒྱ་ནག་གི་མུན་ནག་ལ་སེམས་ཁུར་དང་ངོ་རྒོལ་གྱི་ལས་འགུལ་སྤེལ་བར་ཐེ་ཚོམ་མི་དགོས།
རྒྱལ་སྤྱིའི་བོད་ཀྱི་ཆ་འཕྲིན་གྱི་གསར་འགོད་པ་པདྨ་མཚོས་ཕབ་སྒྱུར་བྱས།
